រាជធានីភ្នំពេញ ៖ ទេសចរណ៍ គឺជាវិស័យអាទិភាពមួយក្នុងចំណោមវិស័យដទៃទៀត ដែលបានរួមចំណែកបង្កើតនូវកាលានុវត្តភាពការងារ លើកកម្ពស់ជីវភាពរស់នៅរបស់ប្រជាពលរដ្ឋ និងបង្កើនប្រាក់ចំណូលជាតិ ដែលជាកត្តាសំខាន់ និងគន្លឹះសម្រាប់រួមចំណែកដល់ការអភិវឌ្ឍសង្គមសេដ្ឋកិច្ចកម្ពុជា ។ ដើម្បីបង្កើននូវការគ្រប់គ្រងនិងអនុវត្តលើវិស័យទេសចរណ៍ឲ្យមានប្រសិទ្ធភាពខ្ពស់ ក្រសួងទេសចរណ៍បានបណ្តុះបណ្តាលធនធានមនុស្សបន្ថែមទៀត ក្នុងគោលដៅចូលរួមចំណែកអនុវត្តកម្មវិធីកែទម្រង់ហិរញ្ញវត្ថុសាធារណៈ ។
ថ្លែងនៅក្នុងពិធីបើកវគ្គបណ្ដុះបណ្ដាល ស្ដីពីការកត់ត្រាចំណាត់ថ្នាក់ទាំង៧នៃមាតិកាថវិកា និងការអនុវត្តមាតិកាថ្មី និងការរៀបចំផែនការយុទ្ធសាស្ត្រថវិកា នៅព្រឹកថ្ងៃទី៥ មិថុនា ម្សិលមិញ លោក ជា បូរ៉ា រដ្ឋលេខាធិការក្រសួងទេសចរណ៍ បានលើកឡើងថា វិស័យទេសចរណ៍នៅកម្ពុជា កំពុងមានការអភិវឌ្ឍគួរ ឲ្យកត់សម្គាល់ ។ ជាក់ស្តែង នៅឆ្នាំ២០១៧កន្លងទៅ មានភ្ញៀវទេសចរអន្តរជាតិប្រមាណ ៥,៦លាននាក់បានចូលមកទស្សនានៅកម្ពុជា ក្នុងអត្រាកំណើន១១,៨% និងនាំប្រាក់ចំណូលប្រមាណ៣.៤០០លានដុល្លារអាមេរិកចាក់បញ្ចូលក្នុងចរន្តសេដ្ឋកិច្ចជាតិ រួមចំណែកប្រមាណ១៣%នៃផលិតផលក្នុងស្រុកសរុប និងបង្កើតការងារដោយផ្ទាល់ប្រមាណជាង៦២ម៉ឺននាក់ ។ ក្នុងនោះ តាមការព្យាករ កម្ពុជានឹងទទួលភ្ញៀវទេសចរអន្តរជាតិចំនួនប្រមាណ៧លាននាក់នៅឆ្នាំ២០២០ និងនាំមកនូវចំណូលសរុបប្រមាណ៥.០០០លានដុល្លារអាមេរិក និងបង្កើតនូវឱកាសការងារប្រមាណ១លាននាក់ ។
លោកបន្ដថា ៖« ដូច្នេះ វគ្គបណ្តុះបណ្តាលនេះ គឺជាផ្នែកមួយនៃការពង្រឹងធនធានមនុស្សរបស់ក្រសួង សំដៅធានាឲ្យការគ្រប់គ្រង និងអនុវត្តលើវិស័យទេសចរណ៍ឲ្យមានប្រសិទ្ធភាពខ្ពស់ និងធានាបាននូវការអនុវត្តចំណូល ចំណាយបានត្រឹមត្រូវ ព្រមទាំងឆ្លើយតបទៅនឹងការកែទម្រង់ហិរញ្ញវត្ថុសាធារណៈរបស់រាជរដ្ឋាភិបាល » ។
លោក ជា បូរ៉ា បញ្ជាក់ថា រាជរដ្ឋាភិបាលកម្ពុជាបានដាក់ចេញនូវកម្មវិធីកែទម្រង់ហិរញ្ញវត្ថុសាធារណៈ ហើយបានចាប់ផ្តើមអនុវត្តចាប់តាំងពីឆ្នាំ២០០៤មក ដោយមាន៤ដំណាក់កាលគឺដំណាក់កាលទី១ «ការបង្កើនភាពជឿទុកចិត្តនៃថវិកា», ដំណាក់កាលទី២ «ការបង្កើនគណនេយ្យភាពហិរញ្ញវត្ថុ», ដំណាក់កាលទី៣ «ការផ្សារភ្ជាប់ថវិកាទៅនឹងគោលនយោបាយ» និងដំណាក់កាលទី៤ «ការបង្កើនគណនេយ្យភាពចំពោះសមិទ្ធកម្ម» ។
លោកបញ្ជាក់ថា នៅឆ្នាំ២០១៨នេះ គឺជាឆ្នាំទី៣ នៃដំណាក់កាលទី៣ កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដែលជាចំណុចរបត់ដ៏សំខាន់មួយមានវិសាលភាពកាន់តែធំទូលាយដែលមានការផ្ទេរសិទ្ធិអំណាច និងការទទួលខុសត្រូវក្នុងការគ្រប់គ្រងនិងប្រើប្រាស់ធនធានហិរញ្ញវត្ថុសាធារណៈដល់ក្រសួងស្ថាប័នក៏កាន់តែច្រើនឡើង ក្នុងនោះក្រសួងទេសចរណ៍ ក៏ជាប្រតិបត្តិករ និងជាតួអង្គសំខាន់ក្នុងការចូលរួមអនុវត្តការកែទម្រង់នេះឱ្យទទួលបានជោគជ័យ ៕
ចែករំលែកព័តមាននេះ