រាជធានីភ្នំពេញ ៖តារាសម្តែង និងតារាចម្រៀងខ្លះវិវឍ្ឍខ្លួនជាអ្នកដឹកនាំរឿង ខ្លះជាអ្នកដឹកនាំកម្មវិធីសិល្បៈ ។ តាមការកត់សម្គាល់តារាសម្តែង តារាចម្រៀងទាំងនោះបានប្រែក្លាយជំហានការងារសិល្បៈគួរឱ្យចាប់អារម្មណ៍ ។ តើតារាណាខ្លះ ?
តារាសម្តែងក្នុងចម្រៀងខារាអូខេរឿង«ម៉ាក់ថឺង»អ្នកនាងព្រំ រដ្ឋា បានក្លាយជាចាងហ្វាងផលិតកម្មភីអ(PR)ដែលបានបើកដំណើរការថតយូរមកហើយក្រោយពេលតារាស្រីរូបនេះមានការយល់ដឹងពីការផលិតភាពយន្ត ជាមួយបទពិសោធន៍ក្នុងពិភពសិល្បៈយូរឆ្នាំ។ ការផលិតភាពយន្តរបស់នាងមានដំណើររលូនពី១រឿងទៅ១រឿង ។ ស្នាដៃភាពយន្តរបស់អ្នកនាងព្រំ រដ្ឋា ភាគច្រើនជាភាពយន្តភាគដោយក្តោបបានការចាក់ផ្សាតតាមកញ្ចក់ទញរទស្សន៍ ល្បីៗធ្វើឱ្យម្ចាស់ស្ថានីយពេញចិត្តរហូតទិញសាច់រឿងផ្សាយជាបន្តបន្ទាប់ ។
អ្នកនាងឈួន សុវណ្ណឆៃ ក្រោយពេលចេញបទចម្រៀងបែបចង្វាក់ប្រពៃណីចូលឆ្នាំមកបានដឹកនាំក្រុមសិល្បករមួយចំនួនសម្តែងជាចម្រៀងខារ៉ាអូខេដោយរាល់ប្រាក់ចំណាយ គឺនៅលើនាងរ៉ាប់រងទាំងស្រុង ។ នាងគ្រោងផលិតចម្រៀងនិងថតចម្រៀងបន្តទៀតបន្ទាប់ពីរំលេចបាន អ្វីៗដែលថ្មី បំណងចង់ឱ្យមានការប្លែកអារម្មណ៍សម្រាប់អ្នកគាំទ្រស្នាដៃនាង ។
អ្នកនាងខាត់ សុឃីម ក៏បានធ្លាប់ចំណាយលុយផ្ទាល់ខ្លួនផលិតអឹមវីខារ៉ាអូខេដែរ ដោយចម្រៀងនោះបើសិនជាល្អគឺខាងផលិតកម្មហង្សមាសជួយសម្រួលបញ្ចូលជាផ្លូវការ ។ រហូតមកទល់ពេលនេះដ្បិតតែអ្នកនាងសុឃីមមិនទាន់រំលេចបានបន្តទៀតក៏នៅមិនទាន់បោះបង់ ហើយមានពេលសមស្របនឹងដឹកនាំក្រុមតារាមួយចំនួនថតជាបន្តទៀតសម្រាប់ចម្រៀងរបស់នាង ។
អ្នកនាងកែវ សុវណ្ណនី ដែលពីមុនជាតារាសម្តែងនោះ គេនឹកស្មានមិនដល់ថាបានប្រែក្លាយជាអ្នកដឹកនាំកម្មវិធីប្រគំតន្ត្រីផ្សាយផ្ទាល់មួយរបស់ទូរទស្សន៍ប៉ុស្ត៍លេខ៥ ។ អ្នកនាងបានចំណាយពេលច្រើនពីរៀមច្បងនៃក្រុមការងារដើម្បីក្រេបយកជំនាញថ្មីនេះបើទោះជាត្រូវរងការលំបាកបែបណាក្តី ។ ជាលទ្ឋផលឃើញថាជំនាញថ្មីរបស់នាងកំពុងតែបោះជំហានទៅមុខ ហើយមានថ្នាក់លើលើកសរសើរដែលធ្វើឱ្យសាមីខ្លួនមានទឹកចិត្តជាបន្តទៀត ៕
ចែករំលែកព័តមាននេះ