ការតស៊ូរបស់ក្រុមជម្រើសជាតិនីមួយៗទម្រាំបានឡើងមកដល់វគ្គចែកពូល៣២ក្រុម គឺសុទ្ធតែជួបឧបសគ្គមិនធម្មតា ។ មិនតែប៉ុណ្ណោះ ពួកគេនឹងត្រូវហែលឆ្លងព្យុះភ្លៀងជាច្រើនដំណាក់កាលទៀតដើម្បីបន្តក្រសោបក្តីស្រមៃឡើងវគ្គផ្តាច់ព្រ័ត្រដណ្តើមពាន ។ ក្រុមការងារយើងបានវិភាគ ៣ពូលរួចមកហើយ ដែលលើកនេះយើងនឹងលើកយកពូល D…
ការតស៊ូរបស់ក្រុមជម្រើសជាតិនីមួយៗទម្រាំបានឡើងមកដល់វគ្គចែកពូល៣២ក្រុម គឺសុទ្ធតែជួបឧបសគ្គមិនធម្មតា ។ មិនតែប៉ុណ្ណោះ ពួកគេនឹងត្រូវហែលឆ្លងព្យុះភ្លៀងជាច្រើនដំណាក់កាលទៀតដើម្បីបន្តក្រសោបក្តីស្រមៃឡើងវគ្គផ្តាច់ព្រ័ត្រដណ្តើមពាន ។ ក្រុមការងារយើងបានវិភាគ
៣ពូលរួចមកហើយ ដែលលើកនេះយើងនឹងលើកយកពូល D មកបង្ហាញបន្ត ។ សមាសភាពពូល D នេះមានអាហ្សង់ទីនដែលជាជើងខ្លាំងប្រចាំទ្វីបអាមេរិកខាងត្បូង រីឯនីហ្សេរីយ៉ា មកពីទ្វីបអាហ្វ្រិក ខណៈអុីស្លង់ និងក្រូអាស៊ី មកពីទ្វីបអឺរ៉ុប ។
១-អាហ្សង់ទីន
អាហ្សង់ទីនជាក្រុមខ្លាំងមួយដែលពិភពលោកតែងតែលើកយកមកនិយាយជារឿយៗ ហើយកាន់តែពិសេសទៀតនោះ Lionel Messi ដែលគ្រប់គ្នាបានស្គាល់ក៏ស្ថិតក្នុងក្រុមនេះដែរ ។ បើនិយាយពីការប្រឡូកក្នុងព្រឹត្តិការណ៍ World Cup វិញ ក្រុមរងជើងឯករដូវកាលមុនដែលមានរហស្សនាមថា «ពពកស» បានចាក់ឬសគល់យ៉ាងជ្រៅ ដោយចូលរួមប្រកួតដំបូងតាំងពីព្រឹត្តិការណ៍នេះបង្កើតឡើងមកម៉្លេះ ។ ឆ្នាំនេះគឺជាការបង្ហាញខ្លួនលើកទី១៧ របស់ក្រុមជម្រើសជាតិមកពីទ្វីបអាមេរិកខាងត្បូងខាងលើ ក្នុងនោះពួកគេមានឱកាសឡើងដល់វគ្គផ្តាច់ព្រ័ត្រ៥លើក(១៩៣០, ១៩៧៨, ១៩៨៦, ១៩៩០ និង២០១៤) ប៉ុន្តែអាចគ្រងជើងឯកបានតែពីរដងប៉ុណ្ណោះនៅឆ្នាំ១៩៧៨ និង១៩៨៦ ។ លទ្ធផល៥ប្រកួតចុងក្រោយវគ្គជម្រុះ World Cup អាហ្សង់ទីនឈ្នះ១ ស្មើ៣និងចាញ់១ ។
២-នីហ្សេរីយ៉ា
ក្រុមមកពីអាហ្រិ្វកមួយនេះ បានបង្ហាញទម្រង់លេងគួរឱ្យចាប់អារម្មណ៍យ៉ាងខ្លាំង បន្ទាប់ពីទម្លាក់ក្រុមជើងខ្លាំងក្នុងតំបន់ជាច្រើនរួចមក ។ រដូវកាលនេះគឺជាការបង្ហាញខ្លួនលើកទី៦របស់នីហ្សេរីយ៉ានៅ World Cup ក្រោយពីចូលលេងដំបូងអំឡុងឆ្នាំ១៩៩៤ ។ វត្តមាន៥លើកនាពេលកន្លងទៅ នីហ្សេរីយ៉ាធ្វើបានល្អបំផុតត្រឹមឡើងដល់វគ្គ១៦ក្រុមចុងក្រោយ៣ដង ខណៈពីរលើកផ្សេងទៀតពួកគេធ្លាក់នៅវគ្គចែកពូល ។ យ៉ាងណាមិញ កាលពីវគ្គជម្រុះកន្លងទៅ នីហ្សេរីយ៉ាក៏ជាក្រុមមិនណយដែរ គឺការប្រកួត៥ដងចុងក្រោយមិនទាន់ស្គាល់បរាជ័យម្តងឡើយ ដោយឈ្នះ៣ និងស្មើ២ ។ ចាំមើលថាតើពួកគេអាចរក្សាកំណត់ត្រាល្អនេះបានដែរឬទេពេលប្រកួតនៅវគ្គចែកពូល?
៣-អុីស្លង់
រដូវកាល២០១៨នេះ គឺជាទំព័រប្រវត្តិសាស្ត្រដំបូងរបស់អុីស្លង់ ដែលអាចឡើងមកដល់វគ្គចែកពូល ។ យ៉ាងណាមិញ វាមិនមែនជាលើកទី១នោះទេដែលអុីស្លង់បង្ហាញខ្លួននៅព្រឹត្តិការណ៍ប្រកួតធំៗ ។ តួយ៉ាងកាលពីឆ្នាំ២០១៦ អុីស្លង់បានទម្លាក់អង់គ្លេសនៅវគ្គ១៦ក្រុមចេញពីការប្រកួតពានរង្វាន់យូរ៉ូ ធ្វើឱ្យពិភពលោកភ្ញាក់ផ្អើលយ៉ាងខ្លាំង ។ ចំពោះការប្រកួតជម្រុះWorld Cupនៅទ្វីបអឺរ៉ុបកន្លងមកអុីស្លង់ធ្វើបានយ៉ាងល្អ ពោលគឺ៥ប្រកួតចុងក្រោយឈ្នះ៤ និងចាញ់១ ។ ទោះយ៉ាងណា ប្រទេសមានប្រជាជនត្រឹម៣៥ម៉ឺននាក់នេះ នៅមានបទពិសោធន៍ខ្ចីណាស់នៅ World Cup ជាពិសេសគឺការប្រកួតជាមួយក្រុមខ្លាំងៗ ។ ក្តីប្រាថ្នាចម្បងនាពេលនេះ អាចនិយាយបានថា បើឆ្លងផុតវគ្គចែកពូល វាគឺជាជោគជ័យដ៏ធំធេងក្នុងប្រវត្តិសាស្ត្រនៃជំហានដំបូងរបស់ពួកគេហើយ ។
៤-ក្រូអាស៊ី
៣រដូវកាលចុងក្រោយចាប់តាំងពីឆ្នាំ២០០២, ២០០៦ និងឆ្នាំ២០១៤ ក្នុងចំណោមការបង្ហាញខ្លួន៤លើក គឺជាប្រវត្តិឈឺចាប់បំផុតរបស់ក្រូអាស៊ី ដែលពួកគេបានធ្លាក់ចេញពី World Cup ត្រឹមវគ្គចែកពូល ។ ដូច្នេះការបង្ហាញខ្លួនលើកទី៥ទាំងប្រផិតប្រផើយនេះក៏មិនបានធ្វើឱ្យអ្នកគាំទ្រសប្បាយចិត្តប៉ុន្មានដែរ ដ្បិតឥឡូវពួកគេស្ថិតនៅពូល D ប្រឈមជាមួយក្រុមខ្លាំងអាហ្សង់ទីន និងនីហ្សេរីយ៉ា ។ លទ្ធផល៥ប្រកួតចុងក្រោយវគ្គជម្រុះ World Cup ក្រូអាស៊ីចាញ់តែម្តងប៉ុណ្ណោះ ដោយឈ្នះ២ និងស្មើ២ ។
វិភាគ ៖ បើទោះជាយើងបានដឹងពីសមាសភាពក្រុមទាំង៤ក្នុងពូលនេះហើយក្តី ក៏យើងនៅតែពិបាកវាយតម្លៃដដែល ។ ប្រសិនបើអាហ្សង់ទីនគឺជាក្រុមដែលឈរនៅកំពូលតារាងដូចដែលយើងបានគិតមែន នោះតំណែងលេខ២សម្រាប់៣ក្រុមផ្សេងទៀតប្រកួតប្រជែងគ្នា វានឹងកាន់តែតានតឹងជាងមុនមិនខាន ព្រោះសមត្ថភាពពួកគេប្រហាក់ប្រហែលគ្នា ។
ទោះបីយ៉ាងណា ក្រូអាស៊ី នៅតែជាក្រុមមានភាគរយខ្ពស់ជាងគេក្នុងការចាប់ឱកាសឡើងទៅវគ្គបន្តជាមួយក្រុមពពកស បើយោងតាមស្ថានភាពពួកគេបច្ចុប្បន្ន និងបទពិសោធន៍ប្រកួត រួមទាំងកីឡាករឆ្នើមច្រើនរូបដែលកំពុងបង្ហាញខ្លួននៅក្លិបធំៗក្នុងទ្វីបអឺរ៉ុប ។
តើប្រិយមិត្តមានយោបល់ដូចការវិភាគខាងលើរបស់ក្រុមការងារយើងដែរឬយ៉ាងណា? តើក្នុងពូលនេះ ក្រុមណាមួយជាក្រុមសំណព្វចិត្តរបស់ប្រិយមិត្ត៕
ចែករំលែកព័តមាននេះ