ខេត្តបន្ទាយមានជ័យ ៖ ក្រោយបញ្ចប់ការឆ្លងឆ្លើយគ្នាក្នុងសន្និសីទសារព័ត៌មាន នាព្រឹកថ្ងៃទី៥ មិថុនា រហូតដល់ថ្ងៃរសៀល ថ្នាក់ដឹកនាំសង្ឃនិងមន្ដ្រីធម្មការ និងសាសនាខេត្ត បានសម្រេចចាប់ផ្សឹកចៅ អធិការវត្តភ្នំបាក់លើ…
ខេត្តបន្ទាយមានជ័យ ៖ ក្រោយបញ្ចប់ការឆ្លងឆ្លើយគ្នាក្នុងសន្និសីទសារព័ត៌មាន នាព្រឹកថ្ងៃទី៥ មិថុនា រហូតដល់ថ្ងៃរសៀល ថ្នាក់ដឹកនាំសង្ឃនិងមន្ដ្រីធម្មការ និងសាសនាខេត្ត បានសម្រេចចាប់ផ្សឹកចៅ អធិការវត្តភ្នំបាក់លើ និងជាព្រះអនុគណក្រុងសិរីសោភ័ណ ដែលហេតុការចាប់ផ្សឹកមន្ត្រីសង្ឃមានមុខមានមាត់ម្នាក់នេះ ពិតជាធ្វើឱ្យញ័ររញ្ជួយកក្រើកវត្តតែម្តង មិនខុសពីការបែកធ្លាយវីដេអូឃ្លីប កាលពីថ្ងៃ៤ មិថុនា កន្លងមកនោះទេ ពីការបដិបត្តិមិនស័ក្តិសមខ្លួនជាអ្នកបួស ហើយបានធ្វើឱ្យមានការថ្កោលទោសពីគ្រប់មជ្ឈដ្ឋាន ។
នៅក្នុងសន្និសីទសារព័ត៌មាននៃព្រឹកថ្ងៃដដែលនេះ មានការនិមន្ដចូលរួមពីថ្នាក់ដឹកនាំសង្ឃ មន្ដ្រីធម្មការ មន្ដ្រីសាលាខេត្ត ចៅអធិការវត្តភ្នំបាក់លើ នាម ស្រិល វណ្ណា ដែលជាអ្នកពាក់ព័ន្ធនឹងនារីឈ្មោះ កាយ លីតា ដែលស្ថិតនៅក្នុងរូបភាព និងវីដេអូជាមួយភិក្ខុអង្គនេះ ព្រមទាំងពុទ្ធបរិស័ទរាប់រយនាក់ និងអ្នកសារ ព័ត៌មានជាច្រើននាក់ដ៏កុះករ ។
ក្រោយការឆ្លើយឆ្លងគ្នាពីសំណាក់អ្នកពាក់ព័ន្ធ នៅទីបំផុតទៅ ថ្នាក់ដឹកនាំសង្ឃក៏បានសម្រេចចាប់ផ្សឹកចៅ អធិការដែលពាក់ព័ន្ធជាមួយស្រីញីនៅថ្ងៃនេះតែម្ដង ហើយនីតិវិធីបន្ដទៀតនោះ គឺការឈានទៅប្ដឹងប្តល់គ្នារវាងភាគីទាំង២ នឹងធ្វើឡើងនៅពេលក្រោយ ព្រោះភិក្ខុសង្ឃអង្គនេះ ជាប់ចោទពីបទរំលោភ និងគំរាម ។
សូមបញ្ជាក់ថា នៅថ្ងៃទី៤ មិថុនា នៅលើបណ្តាញសង្គម Facebook មានការចែកចាយតគ្នាយ៉ាងព្រោង ព្រាត ជុំវិញភិក្ខុសង្ឃមួយអង្គដេកជាមួយនារីម្នាក់ និងអង្គុយធ្វើជាមេខ្លាឃ្លោកទៀតផង ។ ករណីនេះ បានធ្វើឱ្យផ្ទុះការរិះគន់យ៉ាងចាស់ដៃ ពីសំណាក់ប្រជាពលរដ្ឋខ្មែរ ដែលកាន់សាសនាព្រះពុទ្ធ ជាពិសេសនោះ អ្នកដែលធ្លាប់បានយកចង្ហាន់ទៅប្រគេនសង្ឃអង្គនេះដល់ក្នុងវត្ត ក៏ដូចជាអ្នកធ្លាប់បានឱ្យស្រោចទឹកលើកជតា រាសីកន្លងមក ។
ភិក្ខុសង្ឃដែលរងការរិះគន់យ៉ាងព្រោងព្រាត ត្រូវបានគេស្គាល់ថា ជាចៅអធិការវត្តភ្នំបាក់លើ ស្ថិតនៅសង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ មាននាមព្រះគ្រូសារទោ ស្រិល វណ្ណា ដែលគេដឹងថាជាសង្ឃល្បីខាងស្រោចទឹក ធ្វើឱ្យពុទ្ធបរិស័ទជិតឆ្ងាយ អ្នកមាន អ្នកក្រ អ្នកធ្វើការ អ្នករកស៊ី គ្រប់ស្រទាប់ វណ្ណៈ តែងបានទៅឱ្យសង្ឃអង្គនេះស្រោចទឹកផងដែរ ។ ប្រជាពលរដ្ឋរស់នៅខេត្តបន្ទាយមានជ័យម្នាក់បាននិយាយថា លោកក៏ធ្លាប់ទៅវត្តនេះ ហើយឱ្យសង្ឃអង្គនេះស្រោចទឹកទៀតផង និងពេលទៅម្តងៗ ឃើញតែមនុស្សកុះករឱ្យលោកដោះអំពើនានា ដោយអុជធូក ហើយម្នាក់ៗសុទ្ធតែក្តៅដែលត្រូវអំពើរបស់គេ ។
នៅលើបណ្តាញសង្គម Facebook ស្ត្រីម្នាក់ ដែលមានអាខោនឈ្មោះ MoTa Gimmick បានបង្ហោះសារថា «ស្គាល់លោកម្នាក់នេះអត់ ខំគោរពជឿជាក់ តែទីបំផុតរត់តាមស្រី ដេកជាមួយស្រី ហើយកុហកថាទៅមើលជំងឺនៅសុរិន្ទ» ។ ក្រោយពីពិធីផ្សឹកដ៏កក្រើក មានទាំងការស្រោចទឹកផងនោះ សង្ឃអង្គនេះក៏ត្រូវបានឃាត់ខ្លួនពីបទរំលោភ និងគំរាមនៅរសៀលម៉ោង0១ និង១០នាទីថ្ងៃទី៥ មិថុនា នៅវត្តសុម៉ាធិផល ស្ថិត ភូមិបី សង្កាត់ព្រះពន្លា ក្រុងសិរីសោភ័ណ ។
ក្រោយមានរឿងរ៉ាវចៅអធិការវត្តភ្នំបាក់លើ និងជាអនុគណក្រុងសិរីសោភ័ណឈ្មោះ ស្រិល វណ្ណា ហៅអៀម វណ្ណា ជាព្រះសង្ឃ ដែលត្រូវបានបណ្តាញសង្គមហ្វេសបុកបង្ហោះរូបភាពមានប្រឡែងស្រី នៅជាមួយស្រីក្មេង លិទ្ធនិងបៀមពោតស្ងោរ ធ្វើមេខ្លាឃ្លោក ដែលប៉ះពាល់ដល់សាសនា ដែលជាសាសនារបស់រដ្ឋដែលត្រូវរិះគន់ពីសំណាក់មហាជន ។
មន្ត្រីសង្ឃដែលនិមន្តចូលរួមមានព្រះសមណញាណ ណាប់ ម៉ឺន ព្រះបាលាត់គណខេត្ត ព្រះគ្រូសោភ័ណវិមល ប៉ាត សុគន្ធ អនុគណក្រុងសិរីសោភ័ណ និងមន្ត្រីសង្ឃជាច្រើនអង្គ បានកោះហៅចៅអធិការវត្តភ្នំបាក់លើ និងជាអនុគណក្រុងសិរីសោភ័ណ នាម ស្រិល វណ្ណា ហៅអៀម វណ្ណា មានអាយុ៣៨ឆ្នាំ និងភាគីពាក់ព័ន្ធស្ត្រីឈ្មោះ កាយ លីតា អាយុ១៩ឆ្នាំ រស់នៅភូមិក្បាលកោះ សង្កាត់ប៉ោយប៉ែត ក្រុងប៉ោយប៉ែត មានឪពុកម្តាយនិងប្រជាពលរដ្ឋដែលគាំទ្រចៅអធិការវត្តផងដែរ ។
បន្ទាប់ពីការផឹកទឹកសម្បថរួច នារីឈ្មោះ កាយ លីតា បានរៀបរាប់ថា នាងបានស្គាល់ ឈ្មោះ ស្រិល វណ្ណា រយៈពេលជាង១ឆ្នាំមកហើយ ដោយម្តាយនិងខ្លួននាង មានជំងឺត្រូវអំពើគេ ។ លុះមើលជាទៅ ឪពុកម្តាយនាងក៏ស្រលាញ់រាប់អានស្និទ្ធស្នាលគ្នាទាំងសន្យាថា ក្រោយពេលកសាងព្រះវិហាររួចរាល់ និងសឹកចូលដណ្តឹងយកនាងជាអនាគត ។ នាងថា ក្រោយថ្ងៃបុណ្យចូលឆ្នាំថ្មីឆ្នាំ២០១៨កន្លងទៅ សង្ឃឈ្មោះ ស្រិល
វណ្ណា បានមកលេងផ្ទះ ហើយសុំសឹង២យប់នៅនឹងផ្ទះ ព្រមទាំងមានអង្គរក្ស ជាអ្នកបើកបររថយន្ត២នាក់ផង និងបានដេញពួកគេឱ្យទៅដេកខាងក្រៅ ហើយសង្ឃរូបនោះដេកក្នុងបន្ទប់ក្នុងផ្ទះរបស់នាងបន្ទប់មួយផ្សេង ។ ខណៈនាងបានយកភេសជ្ជៈទៅប្រគេនស្រាប់តែចាប់នាងរំលោភរហូតបានសម្រេច ហើយលួចចេញពីផ្ទះរបស់នាង ដោយមិនបានប្រាប់នាង និងឪពុកម្តាយនាងទៀតផង ។
នាងបានបញ្ជាក់ថា ក្រោយពេលរំលោភនាងហើយ លួចចេញពីផ្ទះមិនប្រាប់ ទូរស័ព្ទមិនលើក ទើបដើររកក៏ប្រទះឃើញនៅក្រុងសិរីសោភ័ណ ជួបហើយមិនបាននិយាយគ្នាប៉ុន្មានផង បើកឡានគេចតាមផ្លូវលេខ៣ទៅបាត់ ។ នាងថា ពេលទូរស័ព្ទចូលក៏គំរាមថា បើចង់រករឿងប្រយ័ត្ននៅស្រុកមិនបាន ទើបនាងខឹងបង្ហោះរូបភាពក្នុងអាខោនហ្វេសប៊ុក រាល់រូបភាពប៉ះពាល់កិត្តិយសព្រះសង្ឃ ហើយបានប្តឹងចោទប្រកាន់ពីបទរំលោភនាង ក្នុងបន្ទប់ផ្ទះរបស់នាងបានសម្រេច និងគំរាមហើយសុំឱ្យច្បាប់ចាត់ការដោះស្បង់ ។
ចំណែកចៅអធិការភ្នំបាក់លើ និងជាអនុគណក្រុងសិរីសោភ័ណនាម ស្រិល វណ្ណា ហៅអៀម វណ្ណា បានមានសង្ឃដីកាតបថា ការពិតគ្រួសាររបស់នាងបានរាប់អានគ្នា ក្រោយពេលដែលលោកមើលជំងឺជា ហើយបានសន្យាថា ពេលសាងសង់ព្រះវិហាររួច នឹងសឹកចូលដណ្តឹងនាងតាមប្រពៃណី តែសង្ឃអង្គនេះ បានបដិសេធមិនបានរំលោភដូចការចោទប្រកាន់ និងបានត្រឹមតែប្រឡែងលេងដូចរូបភាពបៀមនិងជញ្ជក់ពោតស្ងោរដែលនាងបង្គាប់ និងបង្ខំឱ្យធ្វើ ហើយថតបង្ហោះនោះទេ ។ មិនបានចេញចូលផ្ទះនាងមួយរយៈ ស្រាប់តែ២ទៅ៣ថ្ងៃនេះ ស្រាប់តែឃើញអាខោនរបស់នាងបង្ហោះរូបភាព ដែលប៉ះពាល់កិតិ្តយសព្រះសង្ឃ ហើយក៏ត្រូវបានរិៈគន់តាមបណ្តាញសង្គមហ្វេសប៊ុកតែម្តងទៅ ។
លោក យិម យឿន ប្រធានមន្ទីរធម្មការ និងសាសនាខេត្តបានបញ្ជាក់ថា ក្រោយពេលឃើញការបង្ហោះតាមបណ្តាញសង្គមនូវរូបភាពសង្ឃនាម ស្រិល វណ្ណា ហៅអៀម វណ្ណា ចៅអធិការវត្តភ្នំបាក់លើ និងជាអនុគណក្រុងសិរីសោភ័ណ ដែលមានរូបភាពប៉ះពាល់ដល់វិស័យព្រះពុទ្ធសាសនា និងមានការរិះគន់ពីមហាជនយ៉ាងខ្លាំង ទើបក្រសួងធម្មការ និងសាសនាបានឱ្យមន្ត្រីសង្ឃខេត្តបន្ទាយមានជ័យបង្កើតគណៈកម្មការកោះហៅសង្ឃនាម ស្រិល វណ្ណា ហៅអៀម វណ្ណា និងស្ត្រីឈ្មោះ កាយ លីតា ដែលពាក់ព័ន្ធចូលខ្លួនមកបំភ្លឺទាំងសងខាង និងបានដឹងថា ភាគីសង្ឃនាម ស្រិល វណ្ណា ត្រូវបានភាគីនារីឈ្មោះ កាយ វីតាចោទប្រកាន់ពីបទរំលោភនិងគំរាម ទើបមន្ត្រីសង្ឃបានសម្រេចរួចហើយ ដោយយោងទៅតាមការប៉ះពាល់វិស័យព្រះពុទ្ធសាសនា ត្រូវផ្សឹកភ្លាមហើយអនុវត្តតាមច្បាប់ ។
ព្រះសមណញាណ ណាប់ ម៉ឺន ព្រះបាលាត់គណខេត្តបន្ទាយមានជ័យ បានមានថេរដីកាថា ក្រោយពេលសាកសួរទាំងពីរភាគីរៀបរាប់ហេតុផលយកត្រូវរៀងខ្លួន និងទំលាក់កំហុសដាក់គ្នា គឺក្នុងនាមមន្ត្រីសង្ឃ បានឱ្យទាំងពីរភាគីមានសង្ឃនាម ស្រិល វណ្ណា និងនារីឈ្មោះ កាយ លីតា ផឹកទឹកមន្ត ដែលជាទឹកសម្បថ ផឹកម្នាក់កន្លះកែវ ហើយសច្ចាថា បើអ្នកណាខុសគឺទទួលយកចុះ រាល់អំពើខុសឆ្គងរបស់ខ្លួន ។
គណៈកម្មការដែលបានបង្កើតឡើងបានប្រជុំចាប់ពីម៉ោង០៨ និង៣០នាទីព្រឹក រហូតដល់ម៉ោង១និង២០នាទីរសៀលថ្ងៃទី៥ ខែមិថុនា ម្សិលមិញយ៉ាងហ្មត់ចត់ ត្រូវបានគណៈកម្មការសម្រេចដោយឱ្យសង្ឃនាម ស្រិល វណ្ណា ហៅអៀម វណ្ណា ដោះស្បង់ចីវរសឹកជាគ្រហស្ត ហើយត្រូវបាននគរបាលខេត្ត នាំខ្លួនចេញពីព្រះវិហារភ្លាម ចូលរថយន្តបើកចេញទៅដោយមានប្រជាពលរដ្ឋដែលគាំទ្រសង្ឃជាចៅអធិការវត្តដេញតាមរថយន្តទាមទារ មិនឱ្យយកសង្ឃដែលបានផ្សឹកទៅហើយនេះ យកទៅស្នងការដ្ឋាននគរបាលខេត្តឡើយ ប៉ុន្តែទប់ទល់មិនបាន ៕
https://www.facebook.com/kim.houng.94849/videos/259489614789379/
ចែករំលែកព័តមាននេះ