រាជធានីភ្នំពេញ ៖ បុរសជាអ្នករត់ម៉ូតូរ៉ឺម៉កកង់បីម្នាក់បានដកទុយោសាំង ហើយយកដែកកេះទៅកេះដុត
បណ្តាលអោយឆេះយ៉ាងសន្ធោរសន្ធៅ បង្កអោយមានការភ្ញាក់ផ្អើលយ៉ាងខ្លាំងដល់កម្លាំងនគរបាលចរាចរណ៍នាំគ្នាយកបំពង់ពន្លត់អគ្គិភ័យទៅបាញ់ពន្លត់ ដោយសារតែបុរម្នាក់នោះត្រូវបានប៉ូលិសចាប់មិនអោយបើកបរលើផ្លូវព្រះនរោត្តម និងយកមកធ្វើការផាកពិន័យនោះ។
ហេតុការណ៍នេះដែរបានបង្កឱ្យមានការភ្ញាក់ផ្អើលកាលពីវេលាម៉ោង២និង៤៥នាទីរសៀល ថ្ងៃទី៥ ខែមិថុនា ឆ្នាំ២០១៨ នៅខាងមុខស្នាក់ការនគរបាលចរាចរណ៍ផ្លូវគោករាជធានីភ្នំពេញ (ក្រោយវាំង) ផ្លូវលេខ២១៤ ក្នុងសង្កាត់ជ័យជំនះ ខណ្ឌដូនពេញ។
ម៉ូតូរ៉ឺម៉កកង់បីដែលត្រូវបុរសម្នាក់ជាម្ចាស់ដកទុយោសាំងដុតបង្កអោយមានការភ្ញាក់ផ្អើលនោះគឺម៉ាក សង់កូរ៉េ ពណ៌ក្រហម ពាក់ស្លាកលេខ ឃ ៩៨៦៤-កណ១ ត្រូវបានភ្លើងឆេះផ្នែកម៉ាស៊ីន បណ្តាលឱ្យរងការខូចខាតយ៉ាងដំណំ។
តាមប្រភពពីបុរសម្នាក់បានប្រាប់ឱ្យដឹងថា មុនពេលកើតហេតុ គេបានឃើញម៉ូតូរ៉ឺម៉កកង់បីមួយគ្រឿង ត្រួវបានកម្លាំងនគរបាលចរាចរណ៍ចាប់នាំយកមកពីផ្លូវព្រះនរោត្តម យកមកទុកដើម្បីធ្វើការផាកពិន័យ ខណៈដែលម៉ូតូរ៉ឺម៉កកង់បីនេះមានដឹកភ្ញៀវចំនួន៣នាក់ ដែលមានបុរសជនបរទេសម្នាក់ ស្ត្រីជនជាតិខ្មែរជាប្រពន្ធម្នាក់ រួមទាំងកូនម្នាក់ផងដែរ។ ពេលដែលកម្លាំងនគរបាលចរាចរណ៍បាននាំយកម៉ូតូរ៉ឺម៉កកង់បីនោះមកទុកនៅលើផ្លូវខាងមុខស្នាក់ការចរាចរណ៍ផ្លូវគោករួចហើយ ភ្ញៀវទាំង៣នាក់ដែលជិះលើម៉ូតូរ៉ឺម៉កកង់បីនោះក៏បានចុះពីលើរ៉ឺម៉ក និងនាំគ្នាទៅឈរនៅលើផ្លូវម្ខាង ដើម្បីរង់ចាំជិះបន្តដំណើរទៅទៀត។
តាមប្រភពដដែលបានប្រាប់បន្តទៀតថា ពេលដែលភ្ញៀវទាំង៣នាក់បានចុះពីម៉ូតូរ៉ឺម៉កកង់បីនោះរួចហើយ គេក៏បានឃើញបុរសម្នាក់ទំនងជាខឹងនឹងកម្លាំងនគរបាលចរាចរណ៍ចាប់ម៉ូតូរ៉ឺម៉កកង់បីរបស់គាត់យកមក ផាកពិន័យ ខណៈដែលគាត់កំពុងតែដឹកភ្ញៀវនោះ ក៏ស្រាប់តែគាត់ដកទុយោបង្ហូរសាំង និងយកដែកកេះមកកេះដុតអោយឆេះបង្កជាអណ្តាតភ្លើងឆេះយ៉ាងសន្ធោសន្ធៅរួចរត់គេចខ្លួនបាត់ស្រមោលតែម្តង។
ពេលនោះក៏បង្កឱ្យមានការភ្ញាក់ផ្អើលដល់កម្លាំងនគរបាលចរាចរណ៍នាំគ្នារត់ទៅយកបំពង់ពន្លត់អគ្គិភ័យមកបាញ់ពន្លត់តែម្តង បណ្តាលឱ្យម៉ូតូត្រូវបានភ្លើងឆេះត្រង់ម៉ាស៊ីន និងតួអស់មួយចំនួនធំរងការខូតខាតផងដែរ។ ករណីឆេះម៉ូតូរ៉ឺម៉កកង់បីមួយគ្រឿងនេះដែរ មន្ត្រីនគរបាលចរាចរណ៍ម្នាក់ដែលនៅទីនោះបានប្រាប់អោយដឹងថា ពាក់ព័ន្ធនឹងករណីឆេះម៉ូតូរ៉ឺម៉កកង់បីមួយគ្រឿងខាងលើនេះ លោកមិនទាន់ដឹងពីមូលហេតុឡើយ ដោយរង់ចាំធ្វើការស្រាវជ្រាវសិន ដោយម៉ូតូរ៉ឺម៉កកង់បីមួយគ្រឿងនេះគឺត្រូវបានកម្លាំងរបស់លោកធ្វើការចាប់ឃាត់យកមកពីផ្លូវព្រះនរោត្តម ដើម្បីយកមកធ្វើការផាកពិន័យ។
ក្រោយពេលកើតហេតុ ម៉ូតូរ៉ឺម៉កកង់បីមួយគ្រឿងដែលត្រួវបានបុរសម្នាក់ជាម្ចាស់ដុតនេះ ត្រូវបានកម្លាំងនគរបាលចរាចរណ៍ផ្លូវគោកអូសយកទៅរក្សាទុកនៅនឹងកន្លែងផងដែរ ៕
ចែករំលែកព័តមាននេះ