ប្រទេសទុយនីស៊ី ៖ អង្គការអន្តោប្រវេសន៍អន្តរជាតិ បានរាយការណ៍នាយប់ថ្ងៃទី៤ មិថុនាថា តុល្យការនៃការលិចនាវាមួយគ្រឿងរបស់ពួកអន្តោប្រវេសន៍ ក្នុងដែនទឹកនៃឆ្នេរសមុទ្រទុយនីស៊ី កាលពីថ្ងៃទី៣ មិថុនា អ្នកស្លាប់ពេលនេះឡើងដល់៦០នាក់។
នាវានោះលិចកាលពីយប់ថ្ងៃទី២ មកទី៣ មិថុនា នៅជិតប្រជុំកោះ KERKENNA តំបន់ទេសចរណ៍មួយនាភាគខាងត្បូងទុយនីស៊ី។ ក្នុងចំណោមជនរងគ្រោះទាំង៦០នាក់ ដែលបញ្ជូនទៅកាន់កន្លែងទុកសពមួយនៃមន្ទីរពេទ្យ HABIB BOURGUIBA នៃទីក្រុងស្វាក់ ៤៨នាក់ជាជនជាតិទុយនីស៊ី ហើយ១២នាក់មានសញ្ជាតិផ្សេងៗ។
ក្រសួងមហាផ្ទៃទុយនីស៊ី ដែលកាលពីថ្ងៃទី៣ មិថុនា បានប្រកាសថា ជនអន្តោប្រវេសន៍យ៉ាងតិច៤៨នាក់ស្លាប់ដោយការលិចនាវានេះ នាថ្ងៃទី៤ មិថុនា ពុំបានផ្ដល់តួលេខថ្មីឡើយ។ មុននេះក្រសួងនោះធ្លាប់គូសបញ្ជាក់ថា មនុស្ស៦៧នាក់អាចជួយសង្គ្រោះ ដោយកងឆ្មាំឆ្នេរសមុទ្រ៕
ចែករំលែកព័តមាននេះ