កិច្ចព្រមព្រៀងមួយត្រូវបានចុះហត្ថលេខាជាមួយប្រទេសកាតាដែលនឹងធ្វើពាណិជ្ជកម្មប្រហែលជាចាប់ពីសបា្តហ៍ខាងមុខនេះទៅនូវប្រេងកាតជាច្រើនរយពាន់ធុងក្នុងមួយថ្ងៃពីអណ្តូងប្រេងទាំងឡាយដែលត្រួតត្រាដោយពួកបះបោរលីប៊ី ។ ខណៈដែលពួកសម្ព័ន្ធមិត្តជួយវាយប្រហារតាមអាកាសពួកឧទ្ទាមលីប៊ី បានរុលទាំងមុខយ៉ាងឆាប់រហ័សនៅភាគខាងលិចប្រទេសដោយអង្គការនយោបាយរបស់ពួកបះបោរប្រកាសកាលពីថ្ងៃទី២៧ មីនា ថា ខ្លួននឹងធ្វើការនាំចេញ ប្រេងជាថ្មីឡើងវិញ ។ ពួកឧទ្ទាមវាយដណ្តើមកាន់កាប់អណ្តូងប្រេងមួយផ្នែករបស់ប្រទេស។
លោកអាលីតា ហូនី តំណាងរបស់ពួកបះបោរទទួលបន្ទុកបញ្ហាសេដ្ឋកិច្ច ហិរញ្ញវត្ថុ និងប្រេងកាត ក្នុងសន្និសីទសារព័ត៌មានមួយនាទីក្រុងបេនហ្គាហ្ស៊ី ភាគខាងកើតលីប៊ី និយាយថា យើងផលិតប្រេងប្រមាណពី១០០.០០០ទៅ ១៣០.០០០ធុងក្នុងមួយថ្ងៃហើយយើងអាចបង្កើនដោយស្រួលនូវសង្វាក់នេះរហូតដល់៣០០.០០០ធុងក្នុងមួយថ្ងៃ ។ លោកអះអាងពីទំនុកចិត្តចំពោះសមត្ថភាពនៃបណ្តាទីតាំងប្រេងនៅភាគខាងកើតដែលនៅដំណើរការនាពេលនេះដោយគ្មានពលករបរទេសព្រោះនិយោជិតបរទេសជាច្រើនត្រូវបានជម្លៀសចេញចាប់តាំងពីចាប់ផ្តើមការបះបោរពីថ្ងៃទី១៥ កុម្ភៈ មកប្រឆាំងនឹងរបបវរសេនីយ៍ឯកមូអាម៉ាកាដាហ្វី ៕
ចែករំលែកព័តមាននេះ