ខេត្តកំពង់ឆ្នាំង ៖ អ្នកគ្រូមតេ្តយ្យសាលា ម្នាក់បានចងកសម្លាប់ខ្លួននៅក្នុងផ្ទះបាយ និងបង្កការភ្ញាក់ផ្អើលឡើងកាលពីវេលាម៉ោង៦ព្រឹកថ្ងៃទី២ មិថុនា នៅភូមិស្រងាំទេរ ឃុំប្រស្នឹប ស្រុករលាប្អៀរ ។ សមត្ថកិច្ចនគរបាលនៅកន្លែងកើតហេតុបានឲ្យដឹងថា អ្នកគ្រូបង្រៀនរូបនេះ ឈ្មោះ ភួន ភា អាយុ៤៧ឆ្នាំ មានប្ដីឈ្មោះសឹង ប៉ាញ អាយ៥៨ ឆ្នាំ ជាគ្រូបង្រៀនដូចគ្នា និងមានកូន២នាក់រស់នៅក្នុងភូមិ-ឃុំខាងលើ ។
ប្រភពដដែលឲ្យដឹងថា ក្រុមគ្រួសារប្ដីប្រពន្ធជាគ្រូបង្រៀននេះ រស់នៅមិនចុះសម្រុងនឹងគ្នាទេ គឺបានបែកគ្នារយៈពេលជាង២ឆ្នាំមកហើយ ដោយប្ដីចេញពីផ្ទះធំទៅនៅផ្ទះតូចដែលស្ថិតនៅចម្ងាយប្រមាណ១០ម៉ែត្រពីគ្នា ចំណែកប្រពន្ធរស់នៅលើផ្ទះធំជាមួយកូនៗ ។ នៅយប់ថ្ងៃទី១ ខែមិថុនា ប្តីប្រពន្ធនេះបានឈ្លោះទាស់សម្តីគ្នាជាខ្លាំង ហើយប្តីក៏បានយកកូនមកដេកនៅផ្ទះតូចជាមួយខ្លួន លុះព្រឹកឡើងស្រាប់តែឃើញប្រពន្ធចងកនៅនឹងផ្ទះបាយស្លាប់ទៅហើយ។
ភ្លាមៗ ប្តីក៏បានរាយការណ៍ប្រាប់សមត្ថកិច្ចទៅពិនិត្យកន្លែងកើតហេតុ ហើយសមត្ថកិច្ចបានធ្វើកោសល្យវិច័យយ៉ាងយកចិត្តទុកដាក់ ព្រោះខ្លាចមានអំពើឃាតកម្មណាមួយកើតឡើង ។ក្រោយពីការពិនិត្យសពយ៉ាងយកចិត្តទុកដាក់សមត្ថកិច្ចសន្និដ្ឋានថា ស្ត្រីជាគ្រូបង្រៀនរូបនេះពិតជាចងកសម្លាប់ខ្លួនប្រាកដមែន ។ ជាមួយគ្នានេះ សមត្ថកិច្ចបានរកឃើញសំបុត្រមួយច្បាប់ ដែលជាបណ្ដាំរបស់ស្ត្រីរងគ្រោះ មានខ្លឹមសារប្តឹងទៅស្នងការដ្ឋាននគរបាលខេត្ត សូមជួយពិចារណានិងរកយុត្តិធម៌ពីការធ្វើបាបរបស់ប្តី និងមានទាំងថតសំឡេងដាក់ក្នុងទូរស័ព្ទដៃ អំពីការឈ្លោះទាស់សម្តីគ្នា កាលពីយប់ថ្ងៃទី១ ខែមិថុនា ទៀតផង ។ ខ្លឹមសារសំបុត្រ ក៏បានផ្តាំផ្ញើឲ្យបងស្រីលក់ផ្ទះ លក់ដីភូមិ យកលុយសងគេ នឹងមិនបាច់ធ្វើបុណ្យឲ្យខ្លួនឡើយ ។
បើតាមការបញ្ជាក់របស់ប្តីឈ្មោះ សឹង ប៉ាញថា ប្រពន្ធគាត់ជំពាក់គេច្រើនណាស់ ដោយសាររឿងចាញ់ល្បែង ។ ប៉ុន្តែទោះយ៉ាងនេះក្តី មនុស្សបានស្លាប់ទៅហើយ មិនដឹងថាគាត់ពិតជាជំពាក់គេព្រោះរឿងល្បែងឬក៏យ៉ាងណានោះទេ ៕
ចែករំលែកព័តមាននេះ