រាជធានីភ្នំពេញ ៖ បុរសមិនស្គាល់អត្តសញ្ញាណម្នាក់បានជិះម៉ូតូស្គូពីមួយគ្រឿងទៅបុកទ្វារផ្ទះរបស់ប្រជាពលរដ្ឋបង្កជាអណ្តាតឆាបឆេះម៉ូតូ និងបានបង្កអោយមានការភ្ញាក់ផ្អើលដល់ប្រជាពលរដ្ឋដែលកំពុងសំរានលង់លក់ចេញមកមើលកាលពីវេលាម៉ោង២រំលងអធ្រាត្រឈានចូលថ្ងៃទី៥ ខែមិថុនា ឆ្នាំ២០១៨ ត្រង់ចំណុចខាងក្រោយគ្លីនិកមួយកន្លែង ខាងមុខផ្ទះគ្មានលេខ ផ្លូវលំ ក្រុមទី១០ ភូមិបុរីកម្មករ សង្កាត់ទឹកថ្លា ខណ្ឌសែនសុខ។
ម៉ូតូដែលឆាបឆេះបង្កឲ្យមានការភ្ញាក់ផ្អើលខាងលើម៉ាក ហុងដាស្គូពី ស៊េរីឆ្នាំ២០១៣ ពណ៌ស ពាក់ស្លាកលេខ ភ្នំពេញ១GK-៩៤៤០ បើកបរដោយបុរសម្នាក់មិនស្គាល់អត្តសញ្ញាណ មានវ័យប្រមាណជាង៣០ឆ្នាំ។
តាមប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុ គេឃើញបុរសម្នាក់សង្ស័យស្រវឹងស្រាជិះម៉ូតូមួយគ្រឿងម៉ាកស្គូពី តាមបណ្តោយផ្លូវលំ ក្នុងទិសដៅពីកើតទៅលិច និងក្នុងល្បឿនលឿន លុះមកដល់ចំណុចកើតហេតុដោយសារផ្លូវមានទួលដែលគេដាក់សម្រាប់អោយអ្នកបើកបរបន្ថយល្បឿន ហើយម៉ូតូខាងលើក៏បានបើកឡើងទួលនោះដោយមិនបន្ថយល្បឿនបានរេចង្កូតទៅខាងឆ្វេងបានបុកទ្វារដែកផ្ទះកើតហេតុ បណ្តាលឲ្យដួលម៉ូតូរងការខូចខាតបែកក្បាំងខាងឆ្វេង តែមិនបង្កឲ្យទ្វារដែកផ្ទះកើតហេតុរងការខូចខាតនោះទេ ភ្លាមៗនោះស្រាប់តែម៉ូតូខាងលើលេចចេញជាអណ្តាតភ្លើងឆាបឆេះយ៉ាងសន្ធោសន្ធៅ បង្កអោយមានការភ្ញាក់ផ្អើលដល់ប្រជាពលរដ្ឋដែលរស់នៅជុំវិញនោះចេញមកនាំគ្នាយកបំពង់ពន្លត់អគ្គីភ័យបាញ់ពន្លត់អស់បីទៅបួនបំពង់ទំរាំភ្លើងរលត់ តែម៉ូតូរងការខូចខាតឆេះរោលអស់ស្ទើរពាក់កណ្តាលផ្នែកខាងក្រោយ ចំណែកអ្នកបើកបរម៉ូតូបានគេចខ្លួនចេញពីកន្លែងកើតហេតុបាត់ស្រមោល។
បន្ទាប់ពីកើតហេតុ សមត្ថកិច្ចមូលដ្ឋានក៏បានមកដល់ ហើយឆែកឆេរម៉ូតូខាងលើក៏ប្រទះឃើញស្លាកលេខម៉ូតូចំនួនពីរសន្លឹក ក្នុងនោះស្លាកលេខទី១ ភ្នំពេញ ១BP-១៣០០ និងស្លាកលេខទី២ ភ្នំពេញ ១AZ-៩៥០៩ ដែលស្លាកលេខទាំងពីរសន្លឹកនេះរកឃើញនៅក្នុងកែបម៉ូតូដែលឆាបឆេះខាងលើ ។
ក្រោយពេលកើតហេតុ ម៉ូតូដែលឆាបឆេះខាងលើត្រូវបានសមត្ថកិច្ចមូលដ្ឋានយកទៅរក្សាទុកនៅប៉ុស្តិ៍នគរបាលរដ្ឋបាលទឹកថ្លាដើម្បីរងចាំម្ចាស់យកឯកសារពាក់ព័ន្ធម៉ូតូមកធានាយកម៉ូតូត្រលប់ទៅវិញនៅពេលក្រោយ៕
ចែករំលែកព័តមាននេះ