រាជធានីភ្នំពេញ ៖ រថយន្តហាយឡែនឌ័រមួយគ្រឿងបត់ត្រលប់ក្រោយត្រូវម៉ូតូម៉ាកអាយខនមួយគ្រឿងទៀតជិះទៅបុកចំពាក់កណ្តាលពេញទំហឹង បណ្តាលអោយយុវជនម្នាក់ស្លាប់ភ្លាមៗនៅនឹងកន្លែងកើតហេតុ និងពីរនាក់ទៀតរងរបួសត្រូវបានរថយន្តសង្គ្រោះដឹកយកទៅសង្គ្រោះភ្លាមៗ ។ ហេតុការណ៍ដ៏គួរឲ្យរន្ធត់នេះបង្កអោយមានការភ្ញាក់ផ្អើលឡើងកាលពីវេលាម៉ោង១១និង៤០នាទីយប់ ថ្ងៃទី៤ ខែមិថុនា ឆ្នាំ២០១៨ ត្រង់ចំណុចខាងមុខសាកលវិទ្យាល័យភូមិន្ទភ្នំពេញ តាមបណ្តោយមហាវិថីសហព័ន្ធរុស្សី ស្ថិតក្នុងសង្កាត់ទឹកល្អក់ទី១ ខណ្ឌទួលគោក។
ជនរងគ្រោះដែលស្លាប់នៅនឹងកន្លែងកើតហេតុឈ្មោះ ឆន វិសាល ភេទប្រុស អាយុ១៨ឆ្នាំ មុខរបរជាងកាត់ដេរ ស្នាក់នៅភូមិទឹកថ្លា សង្កាត់ទឹកថ្លា ខណ្ឌសែនសុខ មានស្រុកកំណើតនៅភូមិធំ ឃុំកំពែង ស្រុកគីវង្ស ខេត្តតាកែវ។
តាមប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុ គេបានឃើញជនរងគ្រោះជិះម៉ូតូមួយគ្រឿងម៉ាក ហុងដាអាយខុន ពណ៌ទឹកក្រូចលាយស ពាក់ស្លាកលេខ ភ្នំពេញ១AW-៨០៣៦ រួមដំណើរជាមួយយុវជនពីរនាក់ទៀត បើកបរម៉ូតូតាមបណ្តោយមហាវិថីសហព័ន្ធរុស្សី ក្នុងទិសដៅពីកើតទៅលិច និងក្នុងល្បឿនយ៉ាងលឿន។ លុះមកដល់ចំណុចកើតហេតុក៏ស្រាប់តែមានរថយន្តមួយគ្រឿងទៀតម៉ាកហាយឡែនឌ័រ ពណ៌ទឹកប្រាក់ មិនចាំស្លាកលេខ ធ្វើដំណើរក្នុងទិសដៅបញ្ច្រាសទិសគ្នា ហើយក៏បានបត់ឆ្វេងត្រលប់ក្រោយ ដោយមិនបានប្រុងប្រយ័ត្នក៏ត្រូវម៉ូតូខាងលើបើកទៅបុកចំពាក់កណ្តាលពេញទំហឹង
បណ្តាលឲ្យជនរងគ្រោះដែលជាអ្នកបើកបរម៉ូតូបោកក្បាលទៅនឹងរថយន្តស្លាប់ភ្លាមៗនៅនឹងកន្លែងកើតហេតុ។ រីឯយុវជនពីរនាក់ដែលជិះពីក្រោយ ម្នាក់រងរបួសធ្ងន់ធ្ងរ និងម្នាក់ទៀតរងរបួសស្រាល ភ្លាមៗនោះរថយន្តបង្កហេតុបានបើកគេចខ្លួនបាត់ស្រមោល។
បន្ទាប់មកក៏មានរថយន្តសង្គ្រោះបន្ទាន់របស់គ្លីនិកឯកជនមកដឹកយុវជនដែលរងរបួសទាំងពីរនាក់ទៅព្យាបាលភ្លាមៗផងដែរ។
ក្រោយពេលកើតហេតុ សមត្ថកិច្ចមូលដ្ឋានបានចុះមកដល់កន្លែងកើតហេតុ ហើយបានទាក់ទងទៅសមត្ថកិច្ចជំនាញឲ្យចុះមកធ្វើការវាស់វែងយកម៉ូតូទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគររាជធានីភ្នំពេញ។ ចំណែកសពយុវជនរងគ្រោះត្រូវបានសមត្ថកិច្ចប្រគល់ទៅឲ្យសាច់ញាតិក្រុមគ្រួសារដឹកយកទៅធ្វើបុណ្យទៅតាមប្រពៃណីនៅឯស្រុកកំណើត៕
ចែករំលែកព័តមាននេះ