រាជធានីភ្នំពេញ ៖ ក្នុងរយៈពេល៥ខែដើមឆ្នាំនេះ គ្រឹះស្ថានអង្គរទទួលបានចំណូលពីការលក់ប័ណ្ណជូនភ្ញៀវទេសចរបរទេសចូលទស្សនារមណីយដ្ឋានអង្គរ មានជាង១,២លាននាក់ គិតជាប្រាក់ជាង៥៤,៩លានដុល្លារ កើនឡើងជាង១៩% បើធៀបនឹងពេលដូចគ្នានៃឆ្នាំ២០១៧ ។ នេះបើយោងតាមរបាយការណ៍គ្រឹះស្ថានអង្គរ ។
របាយការណ៍ក៏បានឲ្យដឹងដែរថា ក្នុងខែឧសភា កន្លងទៅ គ្រឹះស្ថានអង្គរលក់ប័ណ្ណជូនភ្ញៀវទេសចរ មានជាង១៥ម៉ឺននាក់ គិតជាប្រាក់ចំណូលជាង៦,៧លានដុល្លារ កើនឡើងជាង១% បើធៀបនឹងគ្រាដូចគ្នាក្នុងឆ្នាំ២០១៧ ។
កំណើននេះត្រូវបានអ្នកជំនាញនៅក្នុងវិស័យទេសចរណ៍មើលឃើញថា ជាកំណើនគួរឱ្យចាប់អារម្មណ៍ ហើយចង់ឱ្យអ្នកពាក់ព័ន្ធទាំងវិស័យឯកជន និងរដ្ឋ គួរធ្វើអ្វីមួយរួមគ្នាដើម្បីទាក់ទាញភ្ញៀវទេសចរបន្ថែម ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា មានប្រសាសន៍កាលពីថ្ងៃទី៣ មិថុនា ថា កំណើនភ្ញៀវទេសចរ និងចំណូល ដែលគ្រឹះស្ថានអង្គរទទួលបានក្នុងរយៈពេល៥ខែដើមឆ្នាំ២០១៨នេះ ពិតជាគួរឲ្យចាប់អារម្មណ៍ និងជាចំណុចល្អសម្រាប់កម្ពុជា ក៏ដូចជាអ្នកធ្វើអាជីវកម្មប្រតិបត្តិករទេសចរណ៍នៅក្នុងវិស័យនេះទាំងមូល ។
លោកស្រីថ្លែងថា ៖« តំបន់ឧទ្យានអង្គរនេះ ជាតំបន់ទាក់ទាញ និងជាតំបន់សក្តានុពលទេសចរណ៍មួយដែលខ្លាំងជាងគេនៅកម្ពុជា » ។
លោកស្រីលើកឡើងថា ៖« ចំនួនភ្ញៀវទេសចរចូលមកទស្សនាកម្ពុជាមានការកើនឡើងជាលំដាប់ ហើយយើងទាំងអស់គ្នាគួរធ្វើអ្វីម្យ៉ាងរវាងវិស័យឯកជន និងស្ថាប័នរបស់រដ្ឋ ដើម្បីឱ្យវិស័យនេះកាន់តែទាក់ទាញជាងមុនថែមទៀត ដោយសារលំហូរភ្ញៀវទេសចរចូលមកកម្ពុជាកាន់តែកើនទៅៗ ។ យើងមិនគ្រាន់តែអបអរនៃការកើនឡើងប៉ុណ្ណឹងទេ យើងគួរធ្វើអ្វីម្យ៉ាងទាំងអស់គ្នា ព្រោះប្រទេសអាស៊ានផ្សេងទៀតក៏ទទួលបានកំណើនភ្ញៀវដូចកម្ពុជាដែរ » ។
លោកស្រីបន្តថា ៖« ពីមួយឆ្នាំទៅមួយឆ្នាំ យើងគួរតែធ្វើការសិក្សាទាំងអស់គ្នាថា អ្វីដែលត្រូវការកែលម្អ ? យើងមើលឃើញច្រើនចំណុច ត្រូវការកែលម្អ និងចំណុចទាក់ទាញ វានៅមានកង្វះខាតដូចជា ការថែទាំស្មៅ បរិស្ថាន សំរាម និងអនាម័យ នៅមានការខ្វះខាតនៅឡើយ » ។
លោកស្រីសង្កត់ធ្ងន់យ៉ាងដូច្នេះថា ៖« មានកន្លែងខ្លះ ថង់ប្លាស្ទិកហើរតាមខ្យល់ពាសពេញនៅលើសួនច្បារ និងតាមរមណីយដ្ឋាន ហើយចំណុចទាំងនេះ យើងគួរតែកែលម្អ ដើម្បីកុំឱ្យភ្នែកអ្នកទស្សនាទាំងអស់ក្រឡេកមើលទៅគេទើស ឬបញ្ចេញការយល់ឃើញបែបអវិជ្ជមាន ខណៈយើងមានសម្បត្តិវប្បធម៌សក្តានុពលដ៏អស្ចារ្យ ដែលជាកេរដំណែលបុព្វបុរសរបស់យើង » ។
ប្រាសាទអង្គរវត្ត ត្រូវបានភ្ញៀវទេសចរលើពិភពលោកបោះឆ្នោតគាំទ្រ និងទទួលបានចំណាត់លេខ១ជាប់ៗគ្នារយៈពេល៤ឆ្នាំ ចាប់តាំងពីឆ្នាំ២០១៤មក តាមរយៈគេហទំព័រដ៏ល្បីល្បាញផ្សេងៗគ្នា ហើយកាលពីពេលថ្មីៗនេះ គេហទំព័រផ្សព្វផ្សាយតំបន់ទេសចរណ៍ល្បីជាងគេលើពិភពលោក TripAdvisor បានបន្តផ្តល់ចំណាត់ថ្នាក់លេខ១ដល់ប្រាសាទអង្គរវត្តរបស់កម្ពុជា ក្នុងឋានៈជាសំណង់ដ៏មានសារសំខាន់ផ្នែកប្រវត្តិសាស្ត្រអស្ចារ្យបំផុតក្នុងលោក ។
មន្ត្រីក្រុមប្រឹក្សាអភិវឌ្ឍន៍កម្ពុជា ហៅកាត់ថា CDC បានឲ្យដឹងកាលពីពេលថ្មីៗនេះថា នៅឆ្នាំ២០១៧កន្លងទៅ វិស័យទេសចរណ៍ស្រូបយកវិនិយោគិននៅក្នុងវិស័យនេះមានរហូតដល់៥០% ច្រើនជាងវិស័យហេដ្ឋារចនាសម្ព័ន្ធ(២៤%), វិស័យកសិកម្ម កសិ-ឧស្សាហកម្ម(៦%) និងវិស័យឧស្សាហកម្ម (២០%) ។
តាមរបាយការណ៍ប្រចាំឆ្នាំ២០១៧របស់ក្រសួងទេសចរណ៍បង្ហាញថា ភ្ញៀវទេសចរអន្តរជាតិចូលមកទស្សនាកម្ពុជាសរុប៥,៦លាននាក់ កើនឡើង១១,៨% ប្រៀបធៀបនឹងឆ្នាំ២០១៦ ។ ភ្ញៀវទេសចរចូលមកទស្សនាកម្ពុជាតាមផ្លូវអាកាស មានប្រមាណ៣,៣លាននាក់ ស្មើនឹង៥៩%នៃចំនួនសរុប កើនឡើង២២,៥%។ ផ្លូវគោក មានជាង២,១លាននាក់ ស្មើនឹង៣៨,៣%នៃចំនួនសរុប ថយចុះ០,៥% និងតាមផ្លូវទឹក មានជាង១៤ម៉ឺននាក់ ស្មើនឹង២,៦%នៃចំនួនសរុប ថយចុះ៥,២% ៕
ចែករំលែកព័តមាននេះ