ខេត្តកំពត ៖ ព័ត៌មានបឋមបានឱ្យដឹងថា កាលពីវេលាម៉ោង១រសៀលថ្ងៃទី៣ មិថុនា មានករណីបង្ខាំងមនុស្សក្នុងគោលដៅទាមទារយកឯកសារដីធ្លីពាក់ព័ន្ធទ្រព្យសម្បត្តិរួម កើតឡើងនៅភូមិត្រពាំងព្រីងខាងជើង ឃុំត្រពាំងព្រីង ស្រុកទឹកឈូ ។…
ខេត្តកំពត ៖ ព័ត៌មានបឋមបានឱ្យដឹងថា កាលពីវេលាម៉ោង១រសៀលថ្ងៃទី៣ មិថុនា មានករណីបង្ខាំងមនុស្សក្នុងគោលដៅទាមទារយកឯកសារដីធ្លីពាក់ព័ន្ធទ្រព្យសម្បត្តិរួម កើតឡើងនៅភូមិត្រពាំងព្រីងខាងជើង ឃុំត្រពាំងព្រីង ស្រុកទឹកឈូ ។ ជនសង្ស័យត្រូវបានឃាត់ខ្លួនឈ្មោះ អេង ទ្រី ភេទប្រុស អាយុ៤៨ឆ្នាំ មានស្រុកកំណើតនៅភូមិមាត់ពាម ឃុំកំពង់គ្រែង ស្រុកទឹកឈូ ។
ដើមចមនៃអំពើបង្ខាំងមនុស្សដូចខាងលើនេះ ត្រូវបានគេដឹងថា ជនជាប់សង្ស័យឈ្មោះ អេង ទ្រី នៅឆ្នាំ១៩៩៥ មានប្រពន្ធទី១ នៅភូមិក្រាំង ឃុំត្រពាំងធំ ស្រុកទឹកឈូ ។ ដល់ឆ្នាំ២០០៣ បានលែងលះគ្នាជាមួយប្រពន្ធទី១នោះ ហើយបានទៅសែនព្រេនប្រពន្ធទី២ ឈ្មោះ ហ៊ុន លីហ៊ាង អាយុ៥២ឆ្នាំ នៅភូមិត្រពាំងព្រីងខាងជើង ឃុំត្រពាំងព្រីង ស្រុកទឹកឈូ បានកូនស្រីម្នាក់អាយុ១០ឆ្នាំ ។ រីឯឈ្មោះ ហ៊ុន លីហ៊ាង ដែលជាប្រពន្ធទី២នេះក៏ធ្លាប់មានប្តីមុន និងមានកូន៤នាក់ (ប្រុស២ ស្រី២នាក់) ហើយដែរ ។
នៅពេលរួមរស់ជាមួយប្រពន្ធទី២ ជនរូបនេះមានទ្រព្យរួម ទូកនេសាទ១គ្រឿងតម្លៃជាង៣០០០ដុល្លារអាមេរិក និងដីស្រែ២កន្លែង ក្នុង១កន្លែងតម្លៃជាង៣០០០ដុល្លារអាមេរិក ។ នៅឆ្នាំ២០១៤ ឈ្មោះ អេង ទ្រី ក៏បានលែងលះគ្នាជាមួយប្រពន្ធទី២នោះទៀត ។ ពេលលែងលះជាមួយអ្នកមេម៉ាយកូន៤ ឈ្មោះ ហ៊ុន លីហ៊ាង ហើយ អេង ទ្រី បានយកទូកនេសាទ១គ្រឿងទៅលក់បានប្រាក់ចំនួន៣៨០០ដុល្លារអាមេរិក និងបានវេចលុយនោះចុះចោលប្រពន្ធទី២បាត់ទៅ ។ ចំណែកដីទាំងពីរកន្លែងត្រូវបានអ្នកស្រី ហ៊ុន លីហ៊ាង ជាអ្នកគ្រប់គ្រងជាមួយនឹងកូនស្រីអាយុ១០ឆ្នាំ ។
ប្រភពដដែលនិយាយថា ក្រោយពីលែងលះជាមួយឈ្មោះ ហ៊ុន លីហ៊ាង ដែលជាប្រពន្ធទី២ហើយ បុរសក្លាហានបានទៅយកប្រពន្ធទី៣ម្នាក់ទៀត នៅភូមិត្រពាំងកក់ ឃុំស្ទឹងកែវ ស្រុកទឹកឈូ ខេត្តកំពតនិងបានរស់នៅជាមួយគ្នារហូតសព្វថ្ងៃនេះ ។ក្រោយពេលបានប្រពន្ធទី៣ហើយ នៅថ្ងៃទី១៣ មេសា ២០១៧ គាត់បានទៅលួចយកកូនស្រី១០ឆ្នាំ ពីប្រពន្ធទី២មកនៅជាមួយខ្លួន ។ ហើយនៅថ្ងៃទី៣ មិថុនា ២០១៨ គាត់បានទៅលួងកូនចុងឈ្មោះ លី ប៉ីប៉ី ភេទស្រី អាយុ១៧ឆ្នាំ ពីភូមិត្រពាំងព្រីងខាងជើង ឃុំត្រពាំងព្រីង ស្រុកទឹកឈូឱ្យដឹកម៉ូតូទៅក្រុងកំពតថា យកម៉ូតូនោះទៅឱ្យជាងជួសជុល ។ ម្តាយមីងនាងបាត់កូនយូរពេកនាម៉ោង៣រសៀលថ្ងៃដដែលនោះក៏បានទូរស័ព្ទរកក្មួយ លី ប៉ីប៉ី ក្មួយក៏បានទទួលហើយប្រាប់ថា ពេលនេះឪពុកចុងបានដឹកនាងទៅកាន់កន្លែងផ្នូរខ្មោចចិនមួយនៅក្នុងព្រៃ ហើយមិនឱ្យនាងមកវិញទេ បើចង់បាននាងលី ប៉ីប៉ី មកវិញ លុះត្រាតែម្ដាយ លី ប៉ីប៉ី ទៅជួប។ ជាបន្តបន្ទាប់ បងប្អូននាងបុីបុី បានព្យាយាមទូរស័ព្ទទៅជួប ចង់ដឹងកន្លែងដែលឪពុកចុងយកទៅលាក់ទុក ប៉ុន្តែឈ្មោះ អេង ទ្រី បានគំរាមពីក្រោយខ្នងមិនឱ្យប្រាប់ទីកន្លែងទេ ។
ដោយដឹងថា អតីតប្តីមានគំរោងទុច្ចរិតជាក់លាក់ ម្តាយជនរងគ្រោះ គឺប្រពន្ធចុងទី២បានសម្រេចចិត្តទៅដាក់ពាក្យបណ្តឹងដល់សមត្ថកិច្ចឱ្យជួយចាត់ការលើករណីខាងលើនេះ ។ ក្រោយពីទទួលបណ្តឹង សមត្ថកិច្ចនគរបាលស្រុកទឹកឈូ បានសហការជាមួយកម្លាំងការិយាល័យនគរបាលព្រហ្មទណ្ឌកម្រិតធ្ងន់ខេត្ត បានរៀបគម្រោងចុះទៅសម្របសម្រួលជាមួយឈ្មោះ អេង ទ្រី ដើម្បីរំដោះក្មេងស្រីនោះមកវិញនិងដើម្បីចាត់ការតាមផ្លូវច្បាប់ ។
ឈ្មោះ អេង ទ្រី បានឆ្លើយសារភាពប្រាប់សមត្ថកិច្ចថា ខ្លួនបានរៀបចំគំរោងធ្វើបែបនេះ គឺដើម្បីគំរាមកំហែងទាមទារយកប្លង់ដី១កន្លែង តែបើឱ្យដីទាំង២កន្លែងនោះទាំងអស់ ខ្លួននឹងថែមប្រាក់ ៣០០០ ដុល្លារឱ្យវិញ ។ បុរសក្លាហានបញ្ជាក់ថា ត្រូវឱ្យមេឃុំចុះហត្ថលេខារួចចាំយកមកប្តូរជាមួយកូនចុង លី ប៉ីប៉ី នៅក្បែរផ្លូវរថភ្លើងក្នុងភូមិកំពង់បាយខាងជើង សង្កាត់កំពង់បាយ ក្រុងកំពត ។ ភាគីទាំងពីរក៏បានធ្វើតាមការណាត់ជួបពេលនោះត្រូវសមត្ថកិច្ចដែលរៀបចំផែនការរួចហើយ ក៏ឃាត់ខ្លួនបុរសក្លាហាននេះកាលពីម៉ោង៨និង៤៥នាទីយប់ថ្ងៃ៣ មិថុនា នោះតែម្តងទៅ ។
សូមបញ្ជាក់ថា ជនរងគ្រោះត្រូវបានជនសង្ស័យនាំយកទៅបង្ខាំងទុកក្នុងព្រៃជិតជើងភ្នំបូកគោ ក្នុងភូមិអូរតូច សង្កាត់អណ្តូងខ្មែរ ក្រុងកំពត រយៈពេលប្រមាណ៦ម៉ោង ទើបត្រូវសង្គ្រោះបានមកវិញ ។ ជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងខេត្តតាមនីតិវិធី ៕
ចែករំលែកព័តមាននេះ