បន្ទាប់ពីបានវិភាគទៅលើក្រុមនៅក្នុងពូល A និង B រួចមកយើងបានរកឃើញក្រុមខ្លាំងចំនួន៤មកពីពូលទាំងពីរដែលមានភាគរយខ្ពស់ឡើងទៅលេងវគ្គ១៦ក្រុម ក្នុងនោះរួមមាន អ៊ុយរូហ្គាយ រុស្ស៊ី អេស្ប៉ាញ និងព័រទុយហ្គាល់ ។ ពេលនេះយើងសូមទាញចំណាប់អារម្មណ៍ប្រិយមិត្តមកដឹងសមាសភាពក្រុមនៅពូល C វិញម្តង ដែលមានជើងខ្លាំងបារាំង និងដាណឺម៉ាក មកពីទ្វីបអឺរ៉ុប រីឯអូស្ត្រាលីទៅពីទ្វីបអាស៊ី និងប៉េរូទៅពីទ្វីបអាមេរិកខាងត្បូង ។
១-បារាំង
ពិភពលោកបានស្គាល់ បានដឹងហើយថា បារាំងជាក្រុមជម្រើសជាតិខ្លាំងមួយនៅអឺរ៉ុប ដែលតែងតែជារនាំងឧបសគ្គដ៏គួរឱ្យខ្លាចដល់ក្រុមដទៃ ។ បទពិសោធន៍ក្រាស់ក្រែលក្នុងការប្រកួតធំៗ បូករួមទាំងកីឡាករឆ្នើមច្រើនរូបផងនោះ រឹតតែធ្វើឱ្យក្រុមនេះក្លាយជាសត្រូវធំដែលក្រុមដទៃមិនចង់ជួប ។
បារាំងបានចូលរួមប្រកួតចាប់តាំងពី World Cup បង្កើតដំបូងឆ្នាំ១៩៣០មកម៉្លេះ ហើយរហូតមកទល់ពេលនេះ ពួកគេបានបង្ហាញខ្លួនចំនួន១៥លើក ដោយធ្លាប់ឡើងដល់វគ្គផ្តាច់ព្រ័ត្រចំនួន២ដង និងគ្រងជាម្ចាស់ជើងឯកម្តងកាលពីឆ្នាំ១៩៩៨ ។ ចំពោះការប្រកួតវគ្គជម្រុះ World Cup រដូវកាលថ្មីនេះ ក្រុមដែលមានរហស្សនាមថា “មាន់គក” ខាងលើឈ្នះ៣ ស្មើ១ និងចាញ់១ ។
២-អូស្ត្រាលី
បន្ទាប់ពីឆ្លងកាត់ព្យុះភ្លៀងអស់ជាច្រើនដំណាក់កាល មិនថាវគ្គជម្រុះក្នុងតំបន់ និងការប្រកួត Play-offs យ៉ាងលំបាកលំបិនរួចមក អូស្ត្រាលីក៏ដណ្ដើមបានសំបុត្រយន្តហោះ១សន្លឹកមកលេងWorld Cup ។ ថ្វីបើវិស័យបាល់ទាត់អូស្ត្រាលីមិនទាន់ជាក្តីកង្វល់ខ្លាំងសម្រាប់ក្រុមនៅអឺរ៉ុបក្តី ប៉ុន្តែមួយរយៈពេលចុងក្រោយនេះ ពួកគេបានវិវត្តន៍ខ្លួនច្រើនគួរឱ្យស្ញប់ស្ញែង ។
ក្រុមដែលមានរហស្សនាមថា «កង់គូរូ» មួយនេះធ្លាប់ចូលរួមលេង World Cup ៤ដងមកហើយចាប់តាំងពីឆ្នាំ១៩៧៤មក ប៉ុន្តែខកខានអស់ជាច្រើនរដូវកាលរហូតមកដល់ឆ្នាំ២០០៦ទើបមានឈ្មោះលេងជាលើកទី២ហើយបានឡើងដល់វគ្គ១៦ក្រុមផងដែរ ខណៈពីររដូវកាលចុងក្រោយឆ្នាំ២០១០ និង២០១៤ ពួកគេពុំអាចឆ្លងផុតវគ្គចែកពូលនោះបានទេ ។ ចុះរដូវកាលថ្មីនេះ តើអូស្ត្រាលីអាចស្តារមុខមាត់ និងធ្វើឱ្យពិភពលោកវាយតម្លៃកម្រិតមួយផ្សេងទៀតបានឬយ៉ាងណា ស្របពេលដែល៥ប្រកួតចុងក្រោយក្នុងវគ្គជម្រុះថ្មីៗកន្លងទៅ ពួកគេមិនទាន់ចាញ់ម្តងឡើយគឺឈ្នះ៣ និងស្មើ២ ។
៣-ដាណឺម៉ាក
ដាណឺម៉ាកមិនសូវលេចធ្លោ ឬល្បីឈ្មោះប៉ុន្មានឡើយ បើធៀបនឹងក្រុមផ្សេងទៀតក្នុងទ្វីបអឺរ៉ុប ប៉ុន្តែបើនិយាយពីកីឡាករ Christian Eriksen ដែលកំពុងលេងនៅក្លិប Tottenham នោះប្រិយមិត្តច្បាស់ជាស្គាល់ពីសមត្ថភាពខ្សែបម្រើរូបនេះ ។ ដាណឺម៉ាកត្រូវបានគេទទួលស្គាល់ថាជាក្រុមជម្រើសជាតិមួយ ដែលមានសន្ទុះលេងនិងរីកចម្រើនលឿន ហើយក៏ជាក្រុមដែលអាចបង្កគ្រោះថ្នាក់ដល់គូប្រកួតផងដែរ ។ ជ័យជម្នះជាបន្តបន្ទាប់ពេលប្រកួតនៅវគ្គជម្រុះបឋមក្នុងតំបន់គឺជាដើមទុនសម្រាប់ដាណឺម៉ាកបន្តក្តីស្រមៃរបស់ខ្លួនថានឹងអាចដណ្តើមកៅអីឆ្លងផុតវគ្គជម្រុះក្នុងពូលCនេះ ។
ដាណឺម៉ាក ធ្លាប់ចូលរួមប្រកួត World Cup លើកដំបូងឆ្នាំ១៩៨៦ ហើយរដូវកាលថ្មីនេះជាការបង្ហាញខ្លួនលើកទី៥ក្នុងប្រវត្តិសាស្ត្រ ដោយធ្លាប់បានឡើងដល់វគ្គ៨ក្រុមម្តងកាលពីឆ្នាំ១៩៩៨ ។ ដាណឺម៉ាក ក៏មិនទាន់ស្គាល់បរាជ័យដែរនៅក្នុងការប្រកួត៥លើកចុងក្រោយវគ្គជម្រុះ World Cup ពោលគឺឈ្នះ៣ និងស្មើ២ ។
៤-ប៉េរូ
ដ្បិតតែប៉េរូមិនមានឈ្មោះបោះសំឡេងខ្លាំងក្នុងពិភពបាល់ទាត់ ប៉ុន្តែបើនិយាយពីបទសោធន៍វិញ ពួកគេបានប្រឡូកនៅ World Cupតាំងពីឆ្នាំ១៩៨៦មកម៉្លេះ ប៉ុន្ពែពួកគេមិនបានឆ្លងផុតវគ្គជម្រុះក្នុងពូលឡើយ ខណៈការបង្ហាញខ្លួនលើកទី២ឆ្នាំ១៩៧០ ក្រុមមកពីអាមេរិកខាងត្បូងមួយនេះបានឡើងដល់វគ្គ៨ក្រុម ។
រដូវកាល២០១៨នេះ ជាវត្តមានលើកទី៥បន្ទាប់ពីបាត់មុខស្ទើរតែ៤ទសវត្សរួចមក ។ ២រដូវកាល
ចុងក្រោយដែលប៉េរូបង្ហាញខ្លួននៅ World Cup គឺអំឡុងឆ្នាំ១៩៧៨ និង១៩៨២ តែពួកគេសុទ្ធតែហាវអាវនៅគ្គចែកពូល ។ ចាំមើលថាតើឆ្នាំ២០១៨នេះ ប៉េរូអាចបំបែកកំណត់ត្រាអាក្រក់ពីមុនៗបានប៉ុន្មានអន្លើ បើពួកគេមិនទាន់ចាញ់ម្តងផងក្នុងវគ្គជម្រុះ៥ប្រកួតចុងក្រោយដោយឈ្នះ៣និងស្មើ២ ។
វិភាគ ៖ គ្រាន់តែដឹងពីសមាសភាពក្រុមទាំង៤ក្នុងពូល C នេះភ្លាម លោកអ្នកច្បាស់ជាដឹងក្នុងចិត្តហើយថាក្រុមណាមួយមានអាទិភាពឡើងទៅវគ្គបន្តខ្ពស់ជាងគេនោះគឺបារាំង ដោយសារប្រទេសនេះសំបូរទៅដោយកីឡាករល្បីៗកំពុងលេងតាមក្លិបធំជាច្រើននៅអឺរ៉ុបផ្ទាល់ ។ ជាក់ស្តែង Griezmann, Mbappe ឬ Pogba ជាដើម សុទ្ធតែជាតារាឆ្នើមដែលគេជឿជាក់ថានឹងធ្វើឱ្យសន្ទុះប្រយុទ្ធបារាំងកាន់តែខ្លាំងក្លា ។
មិនខុសគ្នាប៉ុន្មានឡើយ ដាណឺម៉ាកក៏មានកីឡាករក្មេងៗ និងឆ្នើមជាច្រើនរូប គួបផ្សំនឹងបទពិសោធន៍ច្រើនផងនោះ ធ្វើឱ្យក្រុមទៅពីអាស៊ីអូស្ត្រាលី និងប៉េរូទៅពីអាមេរិកខាងត្បូង ពិបាកក្នុងការប្រជែងយកកៅអីលេខ២ជាខ្លាំង ។ ជារួម យើងនៅតែគិតថា ក្រុមដែលអាចឡើងវគ្គ១៦ក្រុមបាននោះគឺបារាំង និងដាណឺម៉ាក ។
តើប្រិយមិត្តមានយោបល់យ៉ាងណាដែរ? តើក្នុងពូល C នេះ ក្រុមមួយណាជាក្រុមសំណព្វ
ចិត្តរបស់ប្រិយមិត្ត?
ចែករំលែកព័តមាននេះ