រាជធានីភ្នំពេញ ៖ បុរសម្នាក់បានផ្ញើប្រាណលើកូនរទេះរុញកែច្នៃមួយ ដោយបានអះអាងពីខ្សែជីវិតពិតថា រាជធានីភ្នំពេញនាពេលបច្ចុប្បន្ន ត្រូវបានអ្នកខ្លះគេហៅថា «ឋានសួគ៌សម្រាប់អ្នកមាន និងឋាននរកសម្រាប់អ្នកក្រ» ។ គាត់និយាយថា…
រាជធានីភ្នំពេញ ៖ បុរសម្នាក់បានផ្ញើប្រាណលើកូនរទេះរុញកែច្នៃមួយ ដោយបានអះអាងពីខ្សែជីវិតពិតថា រាជធានីភ្នំពេញនាពេលបច្ចុប្បន្ន ត្រូវបានអ្នកខ្លះគេហៅថា «ឋានសួគ៌សម្រាប់អ្នកមាន និងឋាននរកសម្រាប់អ្នកក្រ» ។ គាត់និយាយថា ស្ទើរតែនៅតាមដងវិថីធំតូចក្នុងក្រុង តាំងពីព្រលឹមទល់យប់ កូនរទះរុញកែច្នៃប្រើដោយដៃតូចល្មមបានផ្ទុករូបគាត់ជាបុរសកំព្រា និងពិការជើងទាំងសងខាង បរទៅបរមកឆ្លងកាត់ស្ទើរគ្រប់ច្រកល្អក ។ នៅរទេះពិការរបស់គាត់មានសរសេរផ្លាកដាក់ថា «សប្បុរសជនសូមមេត្តាជួយទិញផ្កា ឬក៏ទឹកត្រជាក់ៗពីជនពិការម្នាក់មួយផងបាទ ! សូមអរគុណ» ។
ពឹងផ្នែកលើករទេះរុញដោយដៃទាំងពីរ បុរសម្នាក់ដែលពិការជើងទាំងសងខាង ហើយមិនបាក់ទឹកចិត្តទេ ដោយខិតខំតស៊ូនឹងជីវិតមិនដើរសុំទាន គឺប្រកបរបរស្របច្បាប់ដោយជិះរទេះរុញលក់ភេសជ្ជៈ និងផ្កាភួងនៅលើផ្លូវសាធារណៈ ពីព្រឹកព្រលឹមរហូតដល់យប់ ដើម្បីបានប្រាក់ចំណូលចិញ្ជឹមជីវិត ។ គិតត្រឹមថ្ងៃទី៣១ ខែឧសភា ឆ្នាំ២០១៨ រទេះរុញបាននាំគាត់មកដល់ចំណុចមុខវិទ្យាល័យ ហ៊ុន សែន ចាក់អង្រែក្រោម តាមផ្លូវជាតិលេខ២ សង្កាត់ចាក់អង្រែក្រោម ខណ្ឌមានជ័យ ។
ដៃម្ខាងកាន់កម្រងភួងផ្កាម្លិះលើកសំដៅទៅអ្នកដំណើរ និងដៃម្ខាងទៀតខំបង្វិលកង់រទេះ ក្នុងកាយវិការឱនងើបៗ ខណៈដែលជើងទាំងពីររបស់អាជីវករចល័តរូបនេះ សូម្បីតែកម្រើកក៏មិនបានផង ។ គាត់និយាយយ៉ាងផ្អែមល្ហែមទៅកាន់អ្នកដំណើរថា «បងៗជួយទិញផ្កាឬភេសជ្ជៈខ្លះទៅបង !» ។ យូរៗម្តងគេបានឃើញដំណក់ទឹកបានហូរពីលើក្បាលគាត់ ដែលស្ថិតនៅមិនឆ្ងាយពីគម្របនៃកេសស្នោដាក់ភេសជ្ជៈ បានរអិលចុះមកថ្ពាល់គាត់នោះ គឺជាដំណក់ញើស ។
អាជីវករចល័តម្នាក់នេះ បានប្រាប់ថា គាត់មានឈ្មោះ ប៉ុក ណារ៉ុង ភេទប្រុស ជនជាតិខ្មែរ អាយុ៤០ឆ្នាំ ស្នាក់នៅបន្ទប់ជួលសង្កាត់ចាក់អង្រែក្រោម ខណ្ឌមានជ័យ មានស្រុកកំណើតនៅភូមិសង្គមថ្មី ឃុំតាំង ក្រសាំង ស្រុកសន្ទុក ខេត្តកំពង់ធំ ។ គាត់បានឲ្យដឹងថា គាត់ជាកូនកំព្រាឱពុកម្ដាយស្លាប់ចោលអស់តាំងពីនៅតូច ហើយគាត់មិនបានរៀនសូត្រជ្រៅជ្រះដែរ ដោយដើរស៊ីឈ្នួលគេទៅតាមបណ្ដាខេត្តនានារហូតទៅដល់ក្រុងប៉ៃលិន នៅក្នុងឆ្នាំ២០០៩ ។ ជាកម្មករ ពេលមួយនោះបានជិះម៉ូតូក៏ជួបគ្រោះថ្នាក់ចរាចរណ៍ មានម៉ូតូបុកពីក្រោយក៏បណ្ដាលឱ្យរូបគាត់មានរបួសត្រង់ចង្កេះនិងជើងកំរើកមិនរួច ។
គាត់បានលើកឡើងថា ពេលនោះគ្រូពេទ្យថា អាចប៉ះពាល់សរសៃណាមួយ តែដោយខ្លួនគាត់គ្មានទីពឹងពាក់ និងលុយកាក់ត្រូវព្យាបាលក៏ដើរមិនរួចជិះលើរទេះមកដល់បច្ចុប្បន្ន ។ ក្រោយមក ក៏រស់នៅភ្នំពេញដេកតាមវត្តអារាមរហូតប្រកបមុខរបររុញរទេះលក់ផួងផ្កា និងភេសជ្ជៈដើម្បីបានប្រាក់ចំណេញ ក៏មានលទ្ធភាពជួលបន្ទប់ជួល ។ បុរសរូបនេះបានបន្តទៀតថា ទោះបីគាត់ពិការជើងទាំងសងខាងដើរមិនរួចមែន តែខ្លួនខិតខំប្រឹងប្រែង ប្រកបរបរអ្វីឱ្យស្របនិងច្បាប់ណាមួយដោយសុចរិត ។ បេីតាមបុរសពិការជើងគាត់សួរគ្រូពេទ្យថា ប្រហែលជាមានលុយ៨០០ដុល្លារ និងអាចព្យាបាលជើងគាត់ជាវិញបាន ។
គាត់លើកឡើងថា ដោយសារជើងគាត់កំរើកបាន តែដើរមិនរួចនិងស្វិតផងដែរ ។ គាត់ថា នឹងខិតខំតស៊ូស្វែងរកលុយ ទៅតាមមុខរបរគាត់ដើម្បីព្យាបាលជើងឱ្យបានជាដូចដើមវិញ ។ គាត់ថា សព្វថ្ងៃមិន បាក់ ទឹកចិត្តទេ ទោះបីជាកូនកំព្រាក៏ដោយ សូម្បីតែប្រពន្ធកូនក៏គ្មានដែរ ។ តែសំខាន់ត្រូវតស៊ូរស់បន្តទៅមុខទៀត មិនបោះបង់ចោលមុខរបរ ឬទុកឱ្យជីវិតតែលតោលនោះទេ គឺតស៊ូជានិច្ចនូវមុខរបរប្រចាំជីវិតមួយនេះ ៕
ចែករំលែកព័តមាននេះ