រាជធានីភ្នំពេញ ៖ បុគ្គលិកបម្រើការងារនៅភោជនីដ្ឋានរ៉ូយ៉ាល់ហ្គោលថោន ស៊ុគីស៊ុប ម្នាក់ កាលពីល្ងាចថ្ងៃទី០៣ មិថុនា ២០១៨ ត្រូវបានចៅក្រមស៊ើបសួរសាលាដំបូងរាជធានីភ្នំពេញ សម្រេចចេញដីកាឃុំខ្លួនដាក់ពន្ធនាគារជាបណ្តោះអាសន្ន ក្រោមការចោទប្រកាន់ពីបទ(លួច) និង រំលោភលើទំនុកចិត្ត។ ជនសង្ស័យរូបនោះឈ្មោះ នូ លាងហាន ភេទប្រុស អាយុ២៥ឆ្នាំ មានអាស័យដ្នានស្នាក់នៅផ្ទះលេខ២០៦អឺ២ សង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ។ ចៅក្រមសាលាដំបូងរាជធានីភ្នំពេញ សម្រេចឃុំខ្លួនជនសង្ស័យខាងលើនេះ បន្ទាប់ពីសមត្តកិច្ចនគរបាល ព្រហ្មទណ្ឌក្រសួងមហាផ្ទៃ ចាប់ឃាត់ខ្លួនតាមពាក្យបណ្តឹងរបស់ម្ចាស់ភោជនីដ្ឋានរ៉ូយ៉ាល់ហ្គោលថោន ស៊ុគីស៊ុប ដែលមានអាស័យដ្ឋានស្ថិតនៅតាមមហាវិថីកម្ពុជាក្រោម ទល់មុខវិទ្យាល័យសន្ធរមុខ។
ដើមចម នៃពាក្យបណ្តឹងនោះបានបញ្ចាក់ថា នៅក្នុងអំឡុងឆ្នាំ២០១៧ និង២០១៨ ឈ្មោះ នូ លាងហាន និង ឈ្មោះ នូ លាងហាក់ ជាបងប្អូនបង្កើត បានឃុបឃិតគ្នាលួចកិបកេងប្រាក់ពីថៅកែភោជនីដ្ឋាន ស៊ុគីស៊ុប ប្រមាណ៨ម៉ឺន១ពាន់៥រយ៩៣ដុល្លារអាមេរិក តាមរូបភាពមាន៥ចំណុច៖ ១.ការប្រើប្រាស់ (Systerm) ផ្ទាល់ខ្លួន មកពីខាងក្រៅ,២.ការបង្កើតប្រាក់ចំណាយក្លែងក្លាយ, ៣.ការលួចកិបកេងលុយ នៅក្នុងទូរដែក, ៤.ការលួចកិបកេងលុយដើម្បីបង្កើត Entertainment ក្លែងក្លាយ,៥.ការលួចលុយ និងរំលោភទំនុកចិត្ត តាមរយៈសុំប្រាក់យកទៅទិញទំនិញ។ ក្នុងពាក្យបណ្តឹងបានបញ្ជាក់ទៀតថា បងប្អូន២នាក់នោះម្នាក់ឈ្មោះ នូ លាងហាក់ ត្រូវបានថៅកែភោជនីដ្ឋានប្រគល់ការងារឲ្យធ្វើជា គណៈនេយ្យគ្រប់គ្រងលុយកាក់។
ចំណែកឈ្មោះ នូ លាងហាន ជាអ្នកជួយការងារទូទាត់ ប្រាក់ចំណេញចំណូល ទាំងឡាយជាមួយឈ្មោះ នូ លាងហាក់ ដែរ ដោយរូបគេមានជំនាញខាងអាយធី ។ ដូច្នេះហើយទើបបានជា២នាក់បងប្អូន មានល្បិចកិបកេង និងលួចលុយថៅកែភោជនីដ្ឋាន ដោយសារពួកគេស្ទាត់ជំនាញខាងជំនាញកុំព្យួទ័រ។ នៅដំណាក់កាលសមត្ថកិច្ចក៏ដូចនៅអយ្យការ នៃសាលាដំបូងរាជធានីភ្នំពេញ ជនសង្ស័យឈ្មោះ នូ លាងហាន បានសារភាពទទួលស្គាល់កំហុស ដែលខ្លួន និងឈ្មោះ នូ លាងហាក់ ប្រព្រឹត្តដូចការចោទ ប្រកាន់នោះមែន។ គ្រាន់តែថាពេលនេះ សមត្ថកិច្ចទើបបានចាប់ខ្លួនឈ្មោះ នូ លាងហាន ម្នាក់និង បានបញ្ជូនទៅឃុំខ្លួននៅពន្ធនាគារ ព្រៃសរួចហើយដែរ ចំណែកឈ្មោះ នូ លាងហាក់ មិនទាន់បានចាត់ការនៅឡើយទេ៕
ចែករំលែកព័តមាននេះ