ខេត្តកំពត ៖ គេឃើញសំណង់អនាធិបតេយ្យសង់រំលោភចុះទៅក្នុងទឹកព្រែក កំពង់កណ្តាល ដែលតភ្ជាប់ មកព្រែកកំពង់បាយ(ក្រុងកំពត) ដែលការសាងសង់ ជាសំណង់រឹងនេះបានរៀបខឿនថ្មចូលទៅក្នុង ទឹកព្រែកកំពង់កណ្តាលយ៉ាងជ្រៅ ធ្វើឲ្យបាត់បង់សោភណ័ភាពតាមតំបន់ឆ្នេរ…
ខេត្តកំពត ៖ គេឃើញសំណង់អនាធិបតេយ្យសង់រំលោភចុះទៅក្នុងទឹកព្រែក កំពង់កណ្តាល ដែលតភ្ជាប់ មកព្រែកកំពង់បាយ(ក្រុងកំពត) ដែលការសាងសង់ ជាសំណង់រឹងនេះបានរៀបខឿនថ្មចូលទៅក្នុង ទឹកព្រែកកំពង់កណ្តាលយ៉ាងជ្រៅ ធ្វើឲ្យបាត់បង់សោភណ័ភាពតាមតំបន់ឆ្នេរ ដោយសារតែការរំលោភ យកដីក្នុងព្រែកសង់ជាលំនៅឋានបណ្តុះសសរបេតុងបុកគ្រឹះយ៉ាងរឹងមាំនៅក្នុងទឹក។ សំណង់អនាធិបតេយ្យខាងលើ ធ្វើនៅចំណុចជាប់ស្ពានកំពង់កណ្តាល ខាងកើតក្បាលស្ពាន ស្ថិតក្នុងភូមិកំពង់កណ្តាល ឃុំជុគ្រៀល ស្រុកទឹកឈូ ខេត្តកំពត។ ការសាងសង់សំណង់ដ៏រឹងមាំ រំលោភចូលក្នុងព្រែកកំពង់កណ្តាលខាងលើ ត្រូវបានប្រជាពលរដ្ឋជាច្រើននៅក្នុងខេត្ត រួមទាំងភ្ញៀវទេសចរណ៍ផងដែរ បានរិះគន់យ៉ាងធ្ងន់ៗមកលើអាជ្ញាធរ និងស្ថាបន័ពាក់ព័ន្ធនៅក្នុងខេត្តថា បុគ្គលដែលហ៊ានរំលោភសង់សំណង់រឹងមាំចុះក្នុងទឹកព្រែកយ៉ាងរំភើយដោយមិនញញើតច្បាប់ ហាមឃាត់ខាងលើ បើអាជ្ញាធរ និងមន្ទីរជំនាញពាក់ព័ន្ធមិនបើកភ្លើងខៀវម្លេះ បុគ្គលអ្នកសាងសង់នេះ មិនហ៊ានសាងសង់សំណង់រឹងរំលោភក្នុងទឹកព្រែកនោះទេ។
ទាក់ទិននឹងករណីសង់សំណង់រឹង អនាធិបតេយ្យរំលោភក្នុងទឹកព្រែកខាងលើ កោះសន្តិភាពបានភ្ជាប់ទូរសព្ទ័ទៅលោក នាក់ សុវណ្ណរី អភិបាលនៃគណៈ អភិបាលស្រុកទឹកឈូ ដើម្បីសុំឲ្យលោកជួយស្រាយបំភ្លឺជុំវិញការសាងសង់ លំនៅឋានរំលោភទឹកព្រែកខាងលើ ត្រូវបានលោកអភិបាលស្រុក នាក់ សុវណ្ណរី មានប្រសាសន៍ថា សំណង់ដែលសង់រំលោភចូលក្នុងទឹកព្រែកខាងលើគឺការសង់នេះគ្មានច្បាប់នោះទេគ្មានអ្នកណា ឬស្ថាប័នណាហ៊ានអនុញ្ញាតច្បាប់នោះទេ ហើយការសង់សំណង់ខាងលើកន្លងមកក្រុមការងារថ្នាក់ស្រុក ក៏បានទៅបញ្ឈប់ឲ្យផ្អាកការសាងសង់ម្តងរួចមកហើយកាលពីប្រហែលជាមួយខែមុននេះ។ លោកអភិបាលបានបន្តទៀតថា នៅពេលឲ្យផ្អាកនៃការសាងសង់នេះ ក្រុមការងារបានធ្វើកំណត់ហេតុ រាយការណ៍ជូនគណៈកម្មការការងារថ្នាក់ខេត្តពីការឲ្យផ្អាកការសាងសង់នេះដែរ ហើយលោកបានចាត់ មន្ត្រីប៉ុស្តិ៍ និងមេឃុំឲ្យជួយឃ្លាំមើលក្រែងម្ចាស់សំណង់ខាងលើមានការសាងសង់បន្តទៀត។
ប៉ុន្តែម្ចាស់លួចសាងសង់បន្តលោកមិនបានឃើញប៉ុស្តិ៍ និងឃុំរាយការណ៍មកស្រុកសោះ បើនៅមានលួចសាងសង់បន្តលោកនឹងចាត់កម្លាំងក្រុមការងារឲ្យចុះពិនិត្យ និងបញ្ឈប់ម្តងទៀត។ ជាមួយគ្នានេះដែរទាក់ទិននឹងស្រុករាយការណ៍ឲ្យមកក្រុមការងារគណៈកម្មការខេត្ត ដើម្បីដឹងពីសំណង់អនាធិបតេយ្យខាងលើត្រូវបាន លោក ង៉ែត សាវឿន ប្រធានក្រុមការងារមាន ប្រសាសន៍ ប្រាប់កោះសន្តិភាព ថា ថ្មីៗនេះក្រោយពីស្រុកទឹកឈូបានរាយការណ៍ ពីករណីការសង់សំណង់រឹងចុះក្នុងទឹកព្រែកពីសំណាក់ជនឆ្លៀតឱកាសមួយក្តាប់តូចខាងលើក្រុមការងារ គណៈកម្មការរបស់ខេត្ត បានចុះទៅពិនិត្យដល់កន្លែងសំណង់ជាក់ស្តែង ប៉ុន្តែមិន បានជួបជាមួយម្ចាស់សំណង់នោះទេ គឺជួបតែអ្នកម៉ៅការសំណង់ហើយក្រុមការ ងារយើងក៏បានឲ្យផ្អាកការសាងសង់ខាងលើនេះដែរ ដោយបានធ្វើកំណត់ហេតុ បញ្ឈប់ការសាងសង់បន្តសំណង់ខាងលើនេះទៀតផង។
លោក ង៉ែត សាវឿន បានឲ្យដឹងទៀតថា ចំពោះម្ចាស់សំណង់ដែលសាងសង់នេះលោកពុំបានស្គាល់អត្តសញ្ញាណនោះទេ បើលោកខាងសារព័ត៌មានចង់ដឹងសូមសួរទៅលោក នៃ គង់ អភិបាលរងខេត្តទៅដឹងហើយ ពីព្រោះលោកជាប្រធានគណៈកម្មការក្រុមការ ងារក្នុងការគ្រប់គ្រងសំណង់អនាធិបតេយ្យ នៅតាមតំបន់នានាក្នុងខេត្ត។ ភ្នាក់ងារកោះសន្តិភាពមិនអាចទំនាក់ទំនងទៅលោក នៃ គង់ អភិបាលរងខេត្តបានទេ ដោយសារលោកជាប់បំពេញបេសកកម្មនៅក្រៅប្រទេស។ បើតាមមន្ត្រីក្នុងជួរថ្នាក់ដឹកនាំខេត្តម្នាក់សុំមិនបញ្ចេញឈ្មោះ បានព្រលយប្រាប់អ្នកកាសែតនៅតុកាហ្វេថា ដីនៅតាមតំបន់ឆ្នេរព្រែកកំពង់បាយ គ្មានប្រជារាស្ត្រតូចតាចហ៊ានរំលោភបំពានទៅសាងសង់ជា សំណង់រឹងនោះទេ មានតែអ្នកមានអំណាច និងអ្នកមានលុយទេដែលហ៊ានរំលោភមិនខ្លាចច្បាប់នោះ៕
ចែករំលែកព័តមាននេះ