រាជធានីភ្នំពេញ ៖ បច្ចុប្បន្ននេះ ទីផ្សារកាហ្វេនៅកម្ពុជា ត្រូវបានគេប្រសិទ្ធនាមថា ជាសករាជកាហ្វេ ដោយសារតែអាជីវកម្មមួយនេះបាននិងកំពុងរីកដុះដាលយ៉ាងខ្លាំង មិនថានៅរាជធានី និងតាមបណ្ដាខេត្ត ជាពិសេសអាជីវកម្មកាហ្វេមានម៉ាកយីហោច្បាស់លាស់…
រាជធានីភ្នំពេញ ៖ បច្ចុប្បន្ននេះ ទីផ្សារកាហ្វេនៅកម្ពុជា ត្រូវបានគេប្រសិទ្ធនាមថា ជាសករាជកាហ្វេ ដោយសារតែអាជីវកម្មមួយនេះបាននិងកំពុងរីកដុះដាលយ៉ាងខ្លាំង មិនថានៅរាជធានី និងតាមបណ្ដាខេត្ត ជាពិសេសអាជីវកម្មកាហ្វេមានម៉ាកយីហោច្បាស់លាស់ ហៅថា កាហ្វេប្រេន ។ ទោះយ៉ាងនេះក្ដី កាហ្វេដែលបង្កើតក្នុងស្រុក នៅតែពិបាកក្នុងការប្រកួតប្រជែងជាមួយនឹងម៉ាកនាំចូល និងមិនសូវទទួលបានការគាំទ្រពីពលរដ្ឋឡើយ ។
លោក ដួង តារា ស្ថាបនិកហាងកាហ្វេប្រេនក្នុងស្រុកមួយ បានឲ្យដឹងថា ការប្រកួតប្រជែងរវាងម៉ាកក្នុងស្រុកនិងក្រៅស្រុក នៅតែមានចំពោះអាជីវកម្មកាហ្វេ ហើយអ្នកដែលយកម៉ាកកាហ្វេក្នុងស្រុកទៅធ្វើបន្ត នៅតែមានបញ្ហាប្រឈមពិបាកប្រកួតប្រជែងជាមួយអ្នកយកម៉ាកកាហ្វេពីខាងក្រៅ ។ លោកថា ៖« កាហ្វេប្រេនដែលនាំចូលពីក្រៅ គេមានឈ្មោះល្បីរួចទៅហើយ ដូចនេះ ពលរដ្ឋយើងមិនពិបាករកនោះទេ ហើយម្យ៉ាងទៀត អ្នកយកប្រេនមកធ្វើបន្ត ក៏ជាអ្នកមានធនធានដែរ អីចឹង ដំណើរការអាជីវកម្មប្រាកដជាមិនពិបាកដូចអ្នកយកប្រេនក្នុងស្រុកឡើយ » ។
លោកបន្តថា ទុនសម្រាប់ពង្រីកម៉ាក គឺជាឧបសគ្គសំខាន់មួយទៀតសម្រាប់អាជីវករ ព្រោះអាជីករដែលយកម៉ាកក្នុងស្រុកទៅធ្វើបន្ត មិនសូវជាមានទុនច្រើនដូចជាអាជីវករដែលយកប្រេនពីក្រៅទេ ។ បើសិនជារាជរដ្ឋាភិបាលបង្កើតធនាគារសម្រាប់សហគ្រាសខ្នាតតូច និងមធ្យម ហើយផ្ដល់កម្ចីដល់សហគ្រិនខ្នាតតូច និងមធ្យម លោកនឹងប្រើកម្ចីនោះ ដើម្បីពង្រីកម៉ាកក្នុងស្រុកឲ្យកាន់តែធំ និងល្បីជាងនេះ ។
លោកបញ្ជាក់ថា ការបង្កើតប្រេន ក៏ដូចជាយកប្រេនក្នុងស្រុកទៅធ្វើអាជីវកម្ម គឺបានផ្ដល់ប្រយោជន៍ច្រើនសម្រាប់ប្រជាពលរដ្ឋ និងប្រទេសជាតិទាំងមូល ។ ជាក់ស្ដែង វាបានផ្ដល់ការងារដល់ពលរដ្ឋ និងចរន្តលុយបានចរាចរតែក្នុងស្រុក ដោយមិនបង់ទៅម្ចាស់ប្រេននៅខាងក្រៅស្រុក ព្រោះការទិញសិទ្ធិធ្វើអាជីវកម្មបន្តពីខាងក្រៅ ត្រូវបង់ទៅម្ចាស់ម៉ាក ហើយរាល់សម្ភារ និងគ្រឿងផ្សំនានាត្រូវតែយកពីគេមកធ្វើដែរ ។
លោក ជ័យ ពិសិដ្ឋ ស្ថាបនិកកាហ្វេប្រេនក្នុងស្រុកមួយដែរនោះបានឲ្យដឹងដែរថា ការបង្កើតហាងកាហ្វេមួយ ជាចាំបាច់ណាស់ត្រូវការទីតាំងច្បាស់លាស់ ហើយទីតាំងនោះដែរ បើអាច គួរតែកុំជួលគេ ទើបអាចរកប្រាក់ចំណេញបាន បើមិនអីចឹងទេ ក្នុង១ខែៗ ប្រាក់ចំណូលទុកគ្រាន់តែបង់ថ្លៃជួលទីតាំងអស់ល្មម ។ លោកថា ៖« ការជួលទីតាំងសម្រាប់ធ្វើអាជីវកម្មកាហ្វេ មានហានិភ័យខ្ពស់ណាស់ ព្រោះទីតាំងត្រូវការបង់ជាប្រចាំខែ និងត្រូវកក់មុនរយៈពេលប៉ុន្មានខែទៅតាមការចរចា តែបើសិនជាមានទីតាំងផ្ទាល់ខ្លួននោះ អាជីវករនឹងអាចរកប្រាក់ចំណេញបានច្រើន » ។
លោកបន្តថា កាលពីមុន មនុស្សយកបារីសម្រាប់ការជួបជុំគ្នា ក្រោយមកក៏យកគ្រឿងស្រវឹង តែបច្ចុប្បន្នភាគច្រើនបានយកហាងកាហ្វេជាកន្លែងសម្រាប់ជួបជុំ និងធ្វើកិច្ចការផ្សេងៗ ។ ជាក់ស្ដែង និស្សិតតាមសាកលវិទ្យាល័យនានា បានយកហាងកាហ្វេសម្រាប់ជាកន្លែងពួកគេធ្វើកិច្ចការសាលា ហើយអ្នកជំនួញមួយចំនួនក៏បានយកហាងកាហ្វេជាកន្លែងជជែកពីមុខជំនួញដែរ ៕
ចែករំលែកព័តមាននេះ