រាជធានីភ្នំពេញ ៖ ការប្រកួតសន្សំពិន្ទុរវាងកីឡាករជើងចាស់ពីររូបនៅលើសង្វៀនទូរទស្សន៍អាស៊ីអាគ្នេយ៍ កាលពីយប់ថ្ងៃសៅរ៍ទី២ មិថុនា កន្លងទៅនេះ គេកត់សម្គាល់ថា កីឡាករជើងចាស់ទាំង២គឺលី ភា និងជ័យ ស៊ីនេត មិនទទួលបានការចាប់អារម្មណ៍នោះទេ ដោយសារតែអ្នកទាំងពីរប្រកួតគ្នាស្ទក់ៗស្ទើរទាំង៥ទឹក ។
ទោះបីយ៉ាងណា កីឡាករទាំងពីរក៏បានប្រឹងប្រែងអស់ពីសមត្ថភាពផងដែរ ថ្វីដ្បិតតែការប្រកួតទាំងមូលទទួលរងការរិះគន់ ខណៈដែលអ្នករៀបចំការប្រកួតក៏បានទទួលស្គាល់ថាការប្រកួតរបស់អ្នកទាំង២មិនសូវល្អមើល និងបានលើកនូវហេតុផលជាច្រើន ដើម្បីឱ្យអ្នកគាំទ្រយល់ថា ហេតុអ្វី លី ភា និង ជ័យ ស៊ីនេត ឡើងប្រកួតក្នុងថ្ងៃនោះមិនកើតទាំងពីរនាក់។
អ្នកទស្សនាភាគច្រើននៅយប់នោះ សុទ្ធតែបានលើកឡើងថា ការប្រកួតរវាងកីឡាករ លី ភា មកពីក្លិបសំរោងកោងកីឡា ខេត្តបាត់ដំបង និងកីឡាករ ជ័យ ស៊ីនេត មកពីក្លិបឃ្លាំងមឿងកីឡា ខេត្តពោធិសាត់ មិនបានល្អ ដោយសារតែកីឡាករទាំងពីរប្រកួតគ្នាស្ទក់ៗពេញរយៈពេល៥ទឹកមិនត្រូវចិត្តមហាជន ។ រយៈពេល២ទឹកដំបូង គេឃើញពួកគេឱបគ្នាច្រើនជាងវាយលុក ដោយកីឡាកររូបណាក៏មើលទៅស្ទក់ដៃស្ទក់ជើងទាំងអស់ដូចគ្នាដែរ ។ បើទោះជាកីឡាករ លី ភា បង្គោលក្រហមវាយបានល្អមួយស្នៀតៗជាពិសេសការវាយចេញត្រូវចំគោលដៅទៅលើកីឡាករ ជ័យ ស៊ីនេត តែគេនៅតែមើលឃើញថា មិនសូវរស់រវើក និងស្ទក់ៗ មិនអាចទាក់ទាញចំណាប់អារម្មណ៍អ្នកគាំទ្រដែលអង្គុយទស្សនា។
ការប្រកួតរបស់អ្នកទាំងពីរ លោកអាជ្ញាកណ្ដាលមិនសូវហត់ក្នុងការចាប់ក្រៀកនោះទេ ដោយសារតែកីឡាករទាំងពីរវាយចេញត្រូវមិនត្រូវបានតែមួយដៃ ឬមួយជើង ក៏ឱបគ្នាស្អិតមិនខុសពីគេចពីការប្រកួត ហើយមិនសូវចង់វ៉ៃគ្នា ។ អ្នកទស្សនាយល់ថា អ្នកទាំងពីរមិនចង់គេចពីការប្រកួតនោះទេ ប៉ុន្តែមកពីពួកគេឆាប់ហត់ និងស្ទក់ៗដៃជើងផង ទើបធ្វើឱ្យការប្រកួតទាំងមូលមិនសូវទាក់ទាញ ។ ក្នុងទឹកទី៤ កីឡាករ លី ភា វាយត្រូវបានច្រើនទៅលើគូប្រកួត បន្ទាប់ពីលោកអាជ្ញាកណ្ដាលចេញមុខព្រមានម្ដងជា២ដងធ្វើឱ្យមានការរិះគន់ពីសំណាក់អ្នកទស្សនា ។
ក្រោយបញ្ចប់ការប្រកួត កីឡាករបង្គោលក្រហមបានឈ្នះពិន្ទុ ដោយជ័យជម្នះនេះ ដ្បិតថា មិនធ្វើឱ្យលោកទទួលបាននូវមោទនភាព តែក៏បានធ្វើឱ្យលោកលេចមុខលេចមាត់ផងដែរនៅលើសង្វៀនទូរទស្សន៍អាស៊ីអាគ្នេយ៍ ។ ការប្រកួតមួយគូនេះទទួលរងការរិះគន់ដោយសារតែពួកគេមិនមែនប្រកួតគ្នាក្នុងនាមជាគូមិត្តភាពនោះទេប៉ុន្តែជាការប្រកួតសន្សំពិន្ទុឆ្ពោះទៅកាន់ការដណ្ដើមប្រាក់លានក្នុងពេលខាងមុខ ដោយការប្រកួតនេះមានកីឡាករសរុបចំនួន៨រូបចែកជា២ពូលដើម្បីស្វែងរកអ្នកមានពិន្ទុខ្ពស់ឱ្យឡើងប្រកួតដណ្ដើមទឹកប្រាក់ចំនួន២៥០០ដុល្លារ។
លោក ញាណ សុធី អ្នករៀបចំការប្រកួតបានថ្លែងបញ្ជាក់ថា ការប្រកួតរបស់លី ភា និង ជ័យ ស៊ីនេត គឺជាការប្រកួតដណ្ដើមប្រាក់លាន តែស្ថិតក្នុងរូបមន្តឡើងប្រកួតសន្សំពិន្ទុដើម្បីស្វែងរកអ្នកមានពិន្ទុខ្ពស់ទៅប្រកួតយកប្រាក់លាននៅអំឡុងចុងខែមិថុនា ខាងមុខ ។ លោកថា ការប្រកួតមួយនេះ លោកថាមិនមានកីឡាករជើងខ្លាំងថ្មីៗនោះទេ គឺសុទ្ធតែជាកីឡាករជើងចាស់ៗដែលមានប្រវត្តិខ្លាំង ហើយធ្លាក់ដៃនៅក្នុងព្រឹត្តិការណ៍ប្រដាល់ ។
អ៊ីចឹងហើយទើបការប្រកួតមួយនេះ លោកទទួលស្គាល់ថា មិនសូវមានភាពរស់រវើកដោយសារកីឡាករដែលមានឈ្មោះឡើងប្រកួតនៅក្នុងវគ្គនោះមិនសូវល្អដូចគ្នានឹងកីឡាករក្មេងៗដែលកំពុងឡើងកូដ ។ លោកថា ហេតុផលដែលនាំឱ្យមានការប្រកួតបែបនេះ គឺដោយសារតែចង់រំលេចកីឡាករចាស់ៗដែលចាប់ផ្ដើមធ្លាក់កូដ ហើយនៅចង់ឡើងរេញមានមុខបានប្រកួតក្នុងពេលបន្តបន្ទាប់កុំឱ្យស្ងាត់ពេក ។ លោកថា កីឡាករចាស់ៗបើដាក់ឱ្យប្រកួតជាមួយកីឡាករក្មេងៗ គឺមិនខុសពីដាក់ឱ្យប្រកួតយកភាពអាម៉ាស់នៅចំពោះមុខមហាជននោះទេ ទើបលោកបង្កើតព្រឹត្តិការណ៍តម្រូវឱ្យកីឡាករចាស់ៗបានឡើងប្រកួតគ្នា ដោយលោកនិយាយថា បើទោះជាការវាយចេញរបស់ពួកគេស្ទក់ និងមិនរស់រវើកបន្តិចមែន ប៉ុន្តែក៏មានចំណែកជួយឱ្យកីឡាករទាំងនោះមានមុខនៅលើសង្វៀន ។
លោកថា កីឡាករដែលមានឈ្មោះប្រកួតដណ្ដើមប្រាក់លានទាំងនោះ សុទ្ធសឹងតែជាកីឡាករចាស់ៗ និងធ្លាប់មានឈ្មោះថាខ្លាំងទាំងអស់ ហើយលោកនៅតែកត់សម្គាល់ថា កីឡាករចាស់ៗមួយចំនួននៅប្រកួតល្អមើលផងដែរដូចជាកីឡាករលី ភា ជាដើម ។
លោកទទូចឱ្យអ្នកស្នេហាវិស័យប្រដាល់ បន្តគាំទ្រកីឡាករចាស់ៗ ជាពិសេសបន្ទាប់ពីលោកក៏បានដាក់ហ្សូនឱ្យកីឡាករទាំងនោះឡើងប្រកួតបើកឆាកនៅលើសង្វៀន ដើម្បីឱ្យមានភាពទាក់ទាញផង ។ លោកថា កីឡាករចាស់ៗដ្បិតថាវាយស្ទក់ និងមិនរស់វើកក៏ពិតមែន ប៉ុន្តែបើពួកគេនៅស្រឡាញ់ការប្រដាល់ ហើយនៅចង់បន្តឡើងរេញ ដើម្បីយកលុយចិញ្ចឹមក្រពះ គឺត្រូវតែផ្ដល់ឱកាសឱ្យ ។ លោកប្រកាសរៀបចំការប្រកួតក្នុងរង្វង់កីឡាករធ្លាក់ដៃ និងធ្លាក់កូដបែបនេះឱ្យបានកាន់តែច្រើនដើម្បីបន្តរំលេចកេរ្តិ៍ឈ្មោះរបស់ពួកគេកុំឱ្យបាត់មុខផង និងដើម្បីលើកកម្ពស់កីឡាករចាស់ៗឱ្យមានសង្វៀនឡើងប្រកួត ដោយកុំយកតែកីឡាករក្មេងៗឱ្យឡើងរេញដដែលៗនោះផង៕
ចែករំលែកព័តមាននេះ