រាជធានីភ្នំពេញ ៖ ស្ត្រីម្នាក់មានជម្ងឺប្រចាំកាយច្រើនមុខពេកដេកស្លាប់នៅក្នុងបន្ទប់ជួលតែម្នាក់ឯង បង្កឲ្យមានការភ្ញាក់ផ្អើលកើតឡើងកាលពីវេលាម៉ោង៦យប់ថ្ងៃទី៣ ខែមិថុនា នៅផ្ទះគ្មានលេខ ក្នុងបន្ទប់ជួលលេខ C៦ ផ្លូវ៨BT ភូមិសន្សំកុសល១…
រាជធានីភ្នំពេញ ៖ ស្ត្រីម្នាក់មានជម្ងឺប្រចាំកាយច្រើនមុខពេកដេកស្លាប់នៅក្នុងបន្ទប់ជួលតែម្នាក់ឯង បង្កឲ្យមានការភ្ញាក់ផ្អើលកើតឡើងកាលពីវេលាម៉ោង៦យប់ថ្ងៃទី៣ ខែមិថុនា នៅផ្ទះគ្មានលេខ ក្នុងបន្ទប់ជួលលេខ C៦ ផ្លូវ៨BT ភូមិសន្សំកុសល១ សង្កាត់បឹងទំពុន១ ខណ្ឌមានជ័យ។
ស្ត្រីដែលស្លាប់ឈ្មោះ លីនី សាបេត ហៅក្រៅថា ស្រីនិច អាយុ៣៧ឆ្នាំ មានទីលំនៅម្តុំផ្សារដេប៉ូ ស្នាក់នៅបន្ទប់ជួលកើតហេតុខាងលើរយៈពេល៧ឆ្នាំហើយ។
តាមប្រភពពីសាច់ញាតិជនរងគ្រោះម្នាក់ដែលត្រូវជាប្អូនស្រីបង្កើតរបស់ស្ត្រីដែលស្លាប់បានប្រាប់អោយដឹងថា ស្ត្រីម្នាក់នេះមានជម្ងឺរុំារៃប្រចាំកាយ ជាយូរណាស់មកហើយ ដោយមានជំងឺខ្សោយដូង និងឧស្សាហ៍គាំងបេះដូង ហើយធ្លាប់ធ្វើការព្យាបាលច្រើនដងហើយ និងទទួលការវះកាត់ចំនួន២ដងរួចមកហើយ រាល់ថ្ងៃគាត់ ត្រូវលេបថ្នាំជាប្រចាំ និងបានចាកចេញពីផ្ទះមករស់នៅ នឹងធ្វើការខាងក្រៅតែម្នាក់ឯងច្រើនឆ្នាំមកហើយ។
ប្រភពពីប្រជាពលរដ្ឋដែលរស់នៅបន្ទប់ជួលជាប់គ្នាជាមួយបន្ទប់ស្ត្រីរងគ្រោះបានឱ្យដឹងថា ស្ត្រីដែលបានដេកស្លាប់នោះ នាងមករស់នៅទីនេះរយៈពេល៧ឆ្នាំមកហើយ ពួកគាត់ក៏ដឹងថាមានជម្ងឺខ្សោយបេះដូងផងដែរ នៅមុនពេលមានការភ្ញាក់ផ្អើលកើតឡើងនោះ គឺនៅវេលាម៉ោង៩ព្រឹក មិនឃើញនាងបើកទ្វារបន្ទប់សោះ ធ្វើឲ្យអ្នកជិតខាងគោះទ្វារហៅអោយក្រោករកញ៉ាំបាយញ៉ាំទឹកពេលព្រឹក តែមិនលឺសំឡេងឆ្លើយតប ពួកគាត់ស្មានតែមិនទាន់ក្រោកពីគេង ក៏ឈប់គោះទ្វារហៅ ហើយក៏ចេញទៅវិញរៀងៗខ្លួន ។ លុះដល់ម៉ោង១១នឹង៣០នាទីថ្ងៃត្រង់ ពួកគាត់បានមកហៅម្តងទៀត នៅតែមិនមានសម្លេងឆ្លើយតប ពួកគាត់គិតថាប្រហែលជានាងមិនស្រួលខ្លួន លេបថ្នាំគេងលក់ពេលថ្ងៃហើយទើបមិនឆ្លើយតប ដោយខ្លាចរំខាន ពួកគាត់ក៏ចេញមកវិញអស់ លុះមកដល់វេលាកើតហេតុ នៅតែមិនឃើញនាងចេញពីក្នុងបន្ទប់ទៀត ដោយសង្ស័យក៏ទៅហៅម្តងទៀត នៅតែមិនឆ្លើយតបទៀត ទើបពួកគាត់បានរាយការណ៍ទៅម្ចាស់ផ្ទះ ហើយក៏សម្រេចចិត្តនាំគ្នាគាស់ទ្វារបន្ទប់ចូល ស្រាប់តែឃើញស្ត្រីរងគ្រោះបានដេកស្លាប់នៅគ្រែតែម្នាក់ ដោយពួកគាត់មិនដឹងច្បាស់ថាស្លាប់តាំងពីពេលណានោះទេ។
ភ្លាមៗនោះដែរ ក៏បានរាយការណ៏ទៅសមត្ថកិច្ចជំនាញនៅមូលដ្ឋានចុះមកធ្វើការត្រួតពិនិត្យ នឹងធ្វើកោសល្យវិច័យបានឲ្យដឹងថា ស្ត្រីរងគ្រោះពិតជាស្លាប់ដោយសារជំងឺពិតមែន ដោយខាងសមត្ថកិច្ចដាក់ការសន្និដ្ឋានបណ្តាលមកពីគាំងបេះដូង ។
នៅក្នុងបន្ទប់ជួលនោះដែរ សមត្ថកិច្ចបានរកឃើញមានថ្នាំជាច្រើន គឺសុទ្ធតែជាថ្នាំសម្រាប់អ្នកមានជម្ងឺខ្សោយបេះដូង នឹងថ្នាំមួយប្រភេទទៀតគឺជាថ្នាំរំលាយឈាម។ ក្រោយពីពិនិត្យនឹងធ្វើកោសល្យវិច័យរួចមក សពត្រូវបានប្រគល់អោយសាច់ញាតិទទួលយកទៅវត្តទឹកថ្លាដើម្បីធ្វើបុណ្យតាមប្រពៃណី ៕
ចែករំលែកព័តមាននេះ