ខេត្តព្រៃវែង ៖ ក្រុមអាជីវករលក់សាច់ជ្រូកនៅផ្សារកំពង់ពពិលដែលស្ថិតនៅក្នុងឃុំកំពង់ពពិល ស្រុកពារាំង ខេត្តព្រៃវែងបានចោទប្រកាន់លោក ឡាំ ហ៊ាង ម្ចាស់ឡសត្វឃាដផ្សារកំពង់ពពិលថា បានជំរិតទារលុយពីក្រុមអាជីវករថ្លៃកាប់ជ្រូកនៅក្នុងឡសត្វឃាដ លើសចំនួនកំណត់នៅក្នុងសៀវភៅបន្ទុក ហើយការជំរិតទារបែបនេះ គឺបានកើតឡើងច្រើនឆ្នាំមកហើយ ។
ក្រុមអាជីវករទាំងនោះបានឲ្យដឹងថា បើតាមដែលពួកគាត់ធ្លាប់បានដឹងនៅក្នុងសៀវភៅបន្ទុករបស់មន្ទីរសេដ្ឋកិច្ច និងហិរញ្ញវត្ថុគេកំណត់ឲ្យម្ចាស់ឡសត្វឃាដយកពីក្រុមអាជីវករថ្លៃកាប់ជ្រូក១ក្បាលតែ៥ពាន់រៀលនោះទេ ប៉ុន្តែគេយកជាក់ស្តែងសព្វថ្ងៃនេះ គឺ១ក្បាល៧ពាន់រៀលឯណោះ ចំណែកសត្វគោវិញអាជីវករកាប់នៅតាមផ្ទះរៀងៗខ្លួនមិនដែលចូលកាប់ក្នុងឡសត្វឃាដទេ ប៉ុន្តែក៏ម្ចាស់ឡតម្រូវឲ្យបង់ក្នុងមួយក្បាល៥ពាន់រៀលដែរ ហើយបើអ្នកណាមិនព្រមបង់ឬតវ៉ាគេមិនកាប់ជ្រូកឲ្យ និងមិនឲ្យដាក់លក់ក្នុងផ្សារតែម្តង ។
អាជីវករទាំងនោះបានបញ្ជាក់ថា ក្រៅពីការទារយកលុយលើសសៀវភៅបន្ទុកហើយនោះក្រុមអាជីវករមួយចំនួនដែលយកសាច់ពីផ្សារផ្សេងៗនៅក្នុងឃុំជិតៗគ្នា ដែលបងប្អូនផ្ញើឲ្យជួយលក់នៅក្នុងផ្សារកំពង់ពពិលនេះក៏លោកឡាំ ហ៊ាង ម្ចាស់ឡសត្វឃាដបង្ខំឲ្យបង់ប្រាក់ដូចគ្នាដែរ ទោះបីមិនបានចូលកាប់នៅក្នុងឡរបស់លោកក៏ដោយ ។ ដោយលោកអះអាងថា លោកបានម៉ៅការដាច់ពីរដ្ឋហើយ នៅក្នុងបរិវេណផ្សារកំពង់ពពិលនេះ ដូច្នេះទោះកាប់សាច់នៅឯណាក៏ដោយ ឲ្យតែយកមកលក់នៅក្នុងផ្សារនេះ គឺត្រូវតែបង់លុយឲ្យលោក បើមិនបង់មិនឲ្យលក់ដាច់ខាត ។
ជុំវិញការចោទប្រកាន់ខាងលើនេះក្រុមអ្នកសារព័ត៌មានបានចុះទៅដល់ទីតាំងឡសត្វឃាដផ្សារកំពង់ពពិល និងផ្ទះរបស់លោកឡាំ ហ៊ាង ដើម្បីសុំការបំភ្លឺ ប៉ុន្តែលោកឡាំ ហ៊ាង ពេលឃើញអ្នកសារព័ត៌មានបែរជាចូលសំង្ងំក្នុងផ្ទះ ធ្វើមិនដឹង ដោយមិនព្រមជួប និងផ្តល់ព័ត៌មានដល់ក្រុមអ្នកព័ត៌មានឡើយ ។
ដោយឡែកលោក ស្រេង វ៉ន អនុប្រធានមន្ទីរសេដ្ឋកិច្ច និងហិរញ្ញវត្ថុខេត្តព្រៃវែងបានឲ្យដឹងតាមទូរសព្ទ័ថា ចំពោះឡសត្វឃាដនៅផ្សារកំពង់ពពិលនេះ នៅក្នុងសៀវភៅបន្ទុកកំណត់ឲ្យម្ចាស់ឡយកពីអាជីវករជ្រូកមួយក្បាលតម្លៃតែ៥ពាន់រៀលប៉ុណ្ណោះ ប៉ុន្តែបើមានការយកលើសពីនេះ គឺខុសច្បាប់ហើយ ។ ជាមួយគ្នានោះរឿងបងប្អូនអាជីវករយកសាច់ពីទីតាំងផ្សេងមកលក់នៅក្នុងផ្សារកំពង់ពពិលនោះ វាជាកាតព្វកិច្ចរបស់មន្ត្រីពេទ្យសត្វដែលត្រូវចុះទៅពិនិត្យមុនឲ្យដាក់លក់ គឺមិនពាក់ពន្ធ័ និងខាងម្ចាស់ឡសត្វឃាដនោះទេ ហើយម្ចាស់ឡក៏គ្មានសិទ្ធិទៅទារយកប្រាក់ពីអាជីវករដែរ បើមានការទារយកមែន វាជារឿងខុសច្បាប់ អាជីវករមានសិទ្ធិប្តឹង ។
លោក ស្រេង វ៉នបានបញ្ជាក់ថា ជុំវិញរឿងរ៉ាវនៅក្នុងផ្សារកំពង់ពពិលនេះមិនដែលមានអាជីវករ ឬអ្នកស្រុកណារាយការណ៍ប្តឹងទៅខាងអាជ្ញាធរ ឬមន្ត្រីជំនាញឡើយ ហេតុនេះហើយទើបខាងមន្ទីរមិនបានដឹង ប៉ុន្តែនៅពេលនេះ លោកនិងចាត់ឲ្យមន្ត្រីជំនាញចុះស្រាវជ្រាវមើល និងចាត់វិធានការទៅតាមច្បាប់ ៕
ចែករំលែកព័តមាននេះ