រាជធានីភ្នំពេញ ៖ ចោរបិទមុខ១ក្រុម បានផ្លោះរបងចូលទៅក្នុងរោងចក្រផលិតស្បែកជើងយីហោ «ម៉ារូឈុន» និងបានគាស់ទ្វារបន្ទប់គណនេយ្យចូលទៅគាស់ទូដែកចំនួន២ ។ ទោះបីជាបែបណាក្តី ទំហំនៃការបាត់បង់ មិនត្រូវបានគេបង្ហើបឱ្យដឹងឡើយ ។ ចំណែកក្រុមចោរក៏បានគេចខ្លួនបាត់ស្រមោល ដោយសុវត្ថិភាពអស់ដែរ ។ តាមប្រភពថា ទូដែកទាំង២ដែលចោរគាស់ គឺទូដែកមួយដាក់លុយ និងទូដែក១ទៀតដាក់ឯកសារសំខាន់ៗនានា ។
ហេតុការណ៍ខាងលើនោះ បានបង្កឲ្យមានការភ្ញាក់ផ្អើលកាលពីវេលាម៉ោង០៨ និង២០នាទីព្រឹក ថ្ងៃទី៣ មិថុនា ចូលម៉ោងធ្វើការនៅក្នុងរោងចក្រយីហោ«ម៉ារូ ឈុន» ដែលមានទីតាំងស្ថិតនៅជិតផ្សារទួលពង្រ ក្នុងភូមិទួលពង្រ សង្កាត់ចោមចៅ១ ខណ្ឌពោធិ៍សែនជ័យ ។
តាមប្រភពព័ត៌មានបានឲ្យដឹងថា តាមការត្រួតពិនិត្យកាមេរ៉ាសុវត្ថិភាព ក្រុមចោរមានគ្នាច្រើននាក់ពាក់ម៉ាស់បិទមុខ បានធ្វើសកម្មភាពគាស់ទូដែកទាំង២នោះ រយៈពេលយូរទម្រាំតែគាស់បាន ។ ចំណែកការបិទមុខរបស់ពួកចោរបានបង្ហាញថា អាចជាមនុស្សដែលគេស្គាល់ ។ ពួកចោរបានកាត់លួសបន្លារបងពីចំហៀង ដែលជាកន្លែងស្ងាត់ចូលទៅក្នុងរោងចក្រ ហើយពេលធ្វើសកម្មភាពបានសម្រេច ក៏បានចេញទៅវិញតាមច្រកដដែលនោះវិញដែរដោយសុវត្ថិភាព ។ ចំណែកប្រាក់ដែលត្រូវបាត់បង់នោះមិនទាន់ដឹងថាមានចំនួនប៉ុន្មាននៅឡើយទេ គ្មានអ្នកណាហ៊ាននិយាយ ។ ចំណែកតែលុយសម្រាប់បើកឲ្យកម្មករ នៅមិនទាន់បានយកទៅទុកនៅទីនោះនៅឡើយដែរ ។
ប្រភពដដែលបានបន្តទៀតថា ក្រុមចោរបានចូលទៅធ្វើសកម្មភាព នៅវេលាម៉ោង៣ទៀបភ្លឺឈានចូលថ្ងៃទី៣ មិថុនា ហើយសន្តិសុខដែលយាមនៅទីនោះមិនបានដឹងទេ ទំនងដេកលក់អស់ ។ រហូតដល់វេលាម៉ោង៨និង២០នាទីព្រឹកថ្ងៃដដែលទើបមានការភ្ញាក់ផ្អើល បន្ទាប់ពីថៅកែចូលទៅដល់ក្នុងរោងចក្រ ហើយចូលទៅពិនិត្យឯកសារនៅក្នុងបន្ទប់នោះ ស្រាប់តែឃើញមានស្នាមគាស់បន្ទប់និងគាស់ទូដែកយ៉ាងអារាត់អារាយ ។ ចំណែកអីវាន់មានស្ថានភាពរប៉ាត់រប៉ាយពេញបន្ទប់ ។ បន្ទាប់មកក៏បានទៅប្ដឹងនគរបាលឲ្យចុះទៅពិនិត្យមើល ដើម្បីកសាងសំណុំរឿងស្រាវជ្រាវរកក្រុមចោរទាំងនោះ ។
យូរៗម្តងរឿងចោរលួចគាស់ទូដែក តែងបានកើតមាន ហើយក៏ច្បាស់លាស់ថា បើចោរក្នុងមិនឱ្យដៃចោរក្រៅច្បាស់ជារកមិនឃើញនោះទេ ហើយចោរពីក្រៅប្រហែលមិនប្រថុយគាស់បន្ទប់ដាក់ទូដែករោងចក្របាននោះឡើយ ៕
ចែករំលែកព័តមាននេះ