ខេត្តកំពត ៖ រថយន្តតទ្រុងវែង២គ្រឿងបានបុកគ្នា បណ្តាលឱ្យមនុស្ស២នាក់រងរបួសធ្ងន់ និងស្រាល ហើយរថយន្តទាំង២គ្រឿងរងការខូចខាតយ៉ាងដំណំទាំងសងខាង ចំណែកភាគីអ្នកបើកបររថយន្តម្ខាងទៀតបានរត់គេចខ្លួនបាត់ មុនពេលកំលាំងសមត្ថកិច្ចទៅដល់។ ហេតុការណ៍នេះកើតឡើងកាលពីវេលាម៉ោង៨និង៤០នាទីព្រឹកថ្ងៃទី៣ ខែមិថុនា…
ខេត្តកំពត ៖ រថយន្តតទ្រុងវែង២គ្រឿងបានបុកគ្នា បណ្តាលឱ្យមនុស្ស២នាក់រងរបួសធ្ងន់ និងស្រាល ហើយរថយន្តទាំង២គ្រឿងរងការខូចខាតយ៉ាងដំណំទាំងសងខាង ចំណែកភាគីអ្នកបើកបររថយន្តម្ខាងទៀតបានរត់គេចខ្លួនបាត់ មុនពេលកំលាំងសមត្ថកិច្ចទៅដល់។
ហេតុការណ៍នេះកើតឡើងកាលពីវេលាម៉ោង៨និង៤០នាទីព្រឹកថ្ងៃទី៣ ខែមិថុនា ឆ្នាំ ២០១៨ នៅលើផ្លូវជាតិលេខ៣ កំពត-វាលរេញ ត្រង់ចំណុចភូមិគីឡូ១២ ឃុំកោះតូច ស្រុកទឹកឈូ ខេត្តកំពត។
លោកនាយការិយាល័យចរាចរផ្លូវគោកឲ្យដឹងថា ជនរងគ្រោះក្នុងហេតុការណ៍ខាងលើ រួមមានអ្នកបើកបររថយន្តតទ្រុងវែងម៉ាក FUSO ដែលរងរបួសធ្ងន់ ឈ្មោះ ស៊ុន ចន្ថា ភេទប្រុស អាយុ២៣ឆ្នាំ មានទីលំនៅភូមិព្រៃដុំ ឃុំស្វាយរំពារ ស្រុកបរសេដ្ឋ ខេត្តកំពង់ស្ពឺ និងអ្នករួមដំណើរម្នាក់ទៀតឈ្មោះ ឡុក តិច ភេទប្រុស អាយុ៤៥ឆ្នាំ( ជាឪពុកអ្នកបើកបររថយន្តម៉ាក FUSO) រងរបួសស្រាល មានទីលំនៅភូមិឃុំជាមួយគ្នា ។ ជនរងគ្រោះទាំង២នាក់ត្រូវបានបញ្ជូនទៅសង្គ្រោះនៅមន្ទីរពេទ្យបង្អែកខេត្តកំពត។
លោកវរសេនីយ៍ទោ ពុធ សឺង នាយការិយាល័យចរាចរផ្លូវគោកនៃស្នងការដ្ឋាននគរបាលខេត្តបានឲ្យដឹងថាករណីគ្រោះថ្នាក់ចរាចរខាងលើបានបង្កឡើងរវាងរថយន្តនឹងរថយន្ត គឺរថយន្តមួយគ្រឿងម៉ាក HINO តទ្រុងវែង ពណ៌ស ពាក់ស្លាកលេខ សៀមរាប ៣A-១៥០៥ បើកបរមកពីទិសខាងលិចទៅកើត លុះមកដល់ចំណុចកើតហេតុក៏ជ្រុលចង្កូតទៅបុករថយន្តមួយគ្រឿងទៀតម៉ាក FUSO តទ្រុងវែង ពណ៌ស ពាក់ស្លាកលេខ ព្រះសីហនុ ៣A-១៣៧២ ក្នុងទិសដៅពីកើតទៅលិចយ៉ាងពេញទំហឹង បណ្តាលឲ្យអ្នកបើកបររថយន្តម៉ាក FUSO រងរបួសធ្ងន់ និងអ្នករួមដំណើរត្រូវជាឪពុកអ្នកបើកបរ រងរបួសស្រាល ហើយរថយន្តទាំងពីរគ្រឿងខូចខាតយ៉ាងដំណំ ។
ចំណែកអ្នកបើកបររថយន្តបង្កម៉ាក HINO ក្រោយពេលកើតហេតុ បានរត់គេចខ្លួនបាត់ មុនកំលាំងសមត្ថកិច្ចចុះទៅដល់កន្លែងកើតហេតុ។
ក្រោយពេលកើតហេតុ រថយន្តទាំងពីរគ្រឿងត្រូវបានសមត្ថកិច្ចចរាចរនាំយកទៅរក្សាទុកជាបណ្តោះអាសន្ននៅប៉ុស្តិ៍រដ្ឋបាលឃុំកោះតូច រង់ចាំភាគីទាំងពីរចូលខ្លួនទៅដោះស្រាយគ្នាតាមផ្លូវច្បាប់៕
ចែករំលែកព័តមាននេះ