ទីភ្នាក់ងារព័ត៌មានរ៉យទ័រកាលពីពេលថ្មីៗកន្លងទៅនេះ បានបើកការស្ទង់មតិលើក្រុមអ្នកជំនាញហិរញ្ញវត្ថុ ដែលធ្លាប់ព្យាករលទ្ធផលការប្រកួតបាល់ទាត់ពិភពលោក World Cup ឲ្យដឹងថា ក្រុមឥន្ទ្រីដែកអាល្លឺម៉ង់ នឹងការពារបានដោយជោគជ័យនូវពានជើងឯកបាល់ទាត់ពិភពលោក(World Cup) ឆ្នាំ២០១៨…
ទីភ្នាក់ងារព័ត៌មានរ៉យទ័រកាលពីពេលថ្មីៗកន្លងទៅនេះ បានបើកការស្ទង់មតិលើក្រុមអ្នកជំនាញហិរញ្ញវត្ថុ ដែលធ្លាប់ព្យាករលទ្ធផលការប្រកួតបាល់ទាត់ពិភពលោក World Cup ឲ្យដឹងថា ក្រុមឥន្ទ្រីដែកអាល្លឺម៉ង់ នឹងការពារបានដោយជោគជ័យនូវពានជើងឯកបាល់ទាត់ពិភពលោក(World Cup) ឆ្នាំ២០១៨ ដែលរៀបចំធ្វើនៅក្នុងទីក្រុងមូស្កូ ប្រទេសរុស្ស៊ី ដើម្បីតាមស្មើកំណត់ត្រា៥លើករបស់ក្រុមសាំបាប្រេស៊ីល ។
នៅក្នុងការស្ទង់មតិដែលចាប់ផ្ដើមធ្វើពីថ្ងៃទី១៦ ដល់ថ្ងៃទី៣១ ឧសភា កន្លងមកលើអ្នកចូលរួមវិភាគដែលសុទ្ធតែអ្នកជំនាញហិរញ្ញវត្ថុមកពីទូទាំងសាកលលោក បានឲ្យដឹងថា ក្រុមឥន្ទ្រីដែកអាល្លឺម៉ង់មានចំនួនភាគរយខ្ពស់ជាងគេបំផុត ពោលគឺពួកគេទទួលបាន៤៣សំឡេងក្នុងចំណោមអ្នកវិភាគ១៤៥នាក់ ថានឹងឈ្នះពាន World Cup នៅខែកក្កដា ២០១៨ ខាងមុខនេះ។
ចំណែកក្រុមសាំបាប្រេស៊ីល ឈរនៅលំដាប់ថ្នាក់ទី២ទទួលបាន៣៧សំឡេងលើការស្ទង់មតិនេះ ជាហេតុធ្វើឲ្យក្រុមជម្រើសជាតិទាំង២នេះមានភាគរយខ្ពស់ថានឹងជួបគ្នានៅក្នុងវគ្គផ្តាច់ព្រ័ត្រផងដែរ ។ គួររំលឹកថា កាល៤ឆ្នាំ អាល្លឺម៉ង់ បានផ្តល់មេរៀនដ៏ជូរចត់បំផុតមួយដល់ក្រុមម្ចាស់ផ្ទះប្រេស៊ីល ជាមួយនឹងការយកឈ្នះ៧-១នៅក្នុងទឹកដី Estádio Mineirão ។
លោក Frank Blackmore ជាអ្នកសេដ្ឋកិច្ចដ៏សំខាន់មួយរូបនៅក្នុងក្រុមហ៊ុន EFConsultមានមូលដ្ឋាននៅក្នុងទីក្រុង Johannesburg ប្រទេសអាហ្វ្រិកខាងត្បូងបាននិយាយថា ក្រុមឥន្ទ្រីដែកអាល្លឺម៉ង់ ជាក្រុមពហុជំនាញ និងមានវិន័យល្អ ។ ទោះបីក្រុមមួយនេះមិនមានតារាបាល់ទាត់ណាម្នាក់លេចធ្លោខ្លាំងក៏នៅតែខ្លាំងដោយសារពួកគេលេងស្មើជើងគ្នាល្អណាស់ ៕
ចែករំលែកព័តមាននេះ