ការប្រកួតដណ្តើមពានរង្វាន់ពិភពលោក World Cup គឺធ្វើទៅតាមទម្រង់ប្រកួតជម្រុះយ៉ាងសាមញ្ញដូចដែល FIFA បានរៀបចំតាំងពីបង្កើតព្រឹត្តិការណ៍នេះដំបូង ។ ក្រុមជម្រើសជាតិទាំង៣២ប្រទេស ត្រូវបានចាប់ឆ្នោតបែកចែកជា៨ពូលដោយក្នុង១ពូលមាន៤ក្រុមដើម្បីប្រកួត
ប្រជែងស្វែងរកជើងខ្លាំងតែ២ក្រុមក្នុងមួយពូលប៉ុណ្ណោះឡើងទៅលេងវគ្គ១៦ក្រុមចុងក្រោយ ហើយពួកគេក៏ត្រូវប្រកួតជាបន្តបន្ទាប់ទៀតផងដែរ ។
សម្រាប់ពូល A ដំបូងគេនេះ ពួកគេនឹងត្រូវស្វែងរកពិន្ទុរៀងខ្លួនដើម្បីបន្តក្តីស្រមៃឡើងទៅវគ្គបន្ត ។ ខាងក្រោមនេះ គឺជាសមាសភាពក្រុមនីមួយៗ និងការវិភាគថាតើក្រុមណាមួយមានឱកាសច្រើនជាងគេ ។
*ពូល A ៖ រុស្ស៊ី (អឺរ៉ុប), អារ៉ាប៊ីសាអូឌីត (អាស៊ី), អេហ្ស៊ីប (អាហ្វ្រិក) និងអ៊ុយរូហ្គាយ (អាមេរិកខាងត្បូង)
១-រុស្ស៊ី
ក្នុងនាមជាម្ចាស់ផ្ទះនៃការប្រកួតពានរង្វាន់លំដាប់ពិភពលោកឆ្នាំនេះ រុស្ស៊ីមានទំនុកចិត្តខ្ពស់ជាងរដូវកាលមុនៗច្រើន ប៉ុន្តែប្រទេសមហាអំណាចសេដ្ឋកិច្ច យោធាមួយនេះ វិស័យកីឡាបាល់ទាត់របស់ពួកគេហាក់មានកម្រិតនៅឡើយ ។ ជាក់ស្ដែងប្រវត្តិនៃការប្រកួតនៅ World Cupទាំង១០លើកនាពេលកន្លងមក រុស្ស៊ីធ្វើមិនទាន់បានល្អនោះទេគិតចាប់តាំងពីការបង្ហាញខ្លួនដំបូងឆ្នាំ១៩៥៨ ។
នៅឆ្នាំ១៩៦៦ រុស្ស៊ីមានឱកាសឡើងដល់វគ្គពាក់កណ្តាលផ្តាច់ព្រ័ត្រប៉ុន្តែចាញ់អាល្លឺម៉ង់ ហើយការប្រកួតដណ្តើមចំណាត់ថ្នាក់លេខ៣ជាមួយព័រទុយហ្គាល់ពួកគេក៏ចាញ់ម្តងទៀត ។ ចំពោះវត្តមាននៅWorld Cup ចុងក្រោយកាលពីឆ្នាំ២០១៤ រុស្ស៊ីមិនបានឆ្លងផុតវគ្គជម្រុះតាមពូលនោះទេ ។ រីឯ៥ប្រកួតចុងក្រោយ ពួកគេមិនទាន់ស្គាល់ពាក្យថាឈ្នះម្តងឡើយ ដោយស្មើ១ និងចាញ់៤ ។
២-អារ៉ាប៊ីសាអូឌីត
ជំហានដែលអារ៉ាប៊ីសាអូឌីតបានឆ្លងកាត់មុនឡើងមកដល់វគ្គជម្រុះតាមពូលនេះ ពួកគេជួបឧបសគ្គយ៉ាងច្រើន ប៉ុន្តែរាល់ការឡើងមករាល់រដូវកាលនីមួយៗ ពួកគេបានវិវត្តខ្លួនគួរឱ្យកត់សម្គាល់ ។ អារ៉ាប៊ីសាអូឌីតបានបង្ហាញខ្លួនចំនួន៤លើកមកហើយនៅឆ្នាំ១៩៩៤, ១៩៩៨, ២០០២ និង២០០៦ ដោយខកខានវិញ២រដូវកាលចុងក្រោយនេះជាប់គ្នា ។
លទ្ធផលគាប់ប្រសើរសម្រាប់ក្រុមជម្រើសជាតិមួយនេះគឺបានត្រឹមឡើងដល់វគ្គ១៦ក្រុមចុងក្រោយប៉ុណ្ណោះកាលពីឆ្នាំ១៩៩៤ ដោយចាញ់ ស៊ុយអែត ខណៈការបង្ហាញខ្លួន៣លើកផ្សេងទៀតត្រូវធ្លាក់ចេញតាំងពីវគ្គជម្រុះតាមពូលម៉្លេះ ។ ចំពោះការប្រកួត៥លើកចុងក្រោយ អារ៉ាប៊ីសាអូឌីតឈ្នះ២ ស្មើ១ និងចាញ់២ ។ តើប្រទេសមកពីអាស៊ីមួយនេះ អាចធ្វើឱ្យពិភពលោកវាយតម្លៃក្នុងកម្រិតណា សម្រាប់រដូវកាល ២០១៨ ?
៣-អេហ្ស៊ីប
អេហ្ស៊ីបដែលបច្ចុប្បន្នកំពុងទាញចំណាប់ខ្លាំងពីអ្នកស្នេហាវិស័យកីឡាបាល់ទាត់ ក្រោយភាពលេចធ្លោរបស់កីឡាករ Salah ធ្លាប់បានចូលរួមប្រកួតក្នុងព្រឹត្តិការណ៍ដ៏ធំនេះតែ២ដងប៉ុណ្ណោះអំឡុងឆ្នាំ១៩៣៤ និង១៩៩០ ប៉ុន្តែពួកគេត្រូវត្រឡប់ទៅផ្ទះវិញត្រឹមវគ្គចែកពូលទាំង២លើក ។
ការវិលមក World Cup ជាថ្មីម្តងទៀតនេះ គេសង្កេតឃើញថា អេហ្ស៊ីបមានទម្រង់លេងខុសប្លែកពីក្រុមដទៃ រីឯប្រព័ន្ធការពាររឹតតែពិបាកបំបែកថែមទៀតបើតាមរយៈជំនួបប្រកួតជម្រុះបឋមតាមតំបន់នាពេលកន្លងមក ។ អេហ្ស៊ីបមិនទាន់ធ្វើបានល្អនោះទេសម្រាប់ការប្រកួត៥លើកចុងក្រោយមកនេះ ដោយពួកគេឈ្នះម្តង ស្មើ២ និងចាញ់២ ។
៤-អ៊ុយរូហ្គាយ
បើនិយាយពីបទពិសោធន៍នៅ World Cup អ៊ុយរូហ្គាយគឺមានឫសគល់ជ្រៅជាងគេ ព្រោះប្រទេសនេះធ្វើម្ចាស់ផ្ទះដំបូងបំផុតអំឡុងពេលបង្កើតព្រឹត្តិការណ៍នេះឡើងនៅឆ្នាំ១៩៣០ ហើយពេលនោះពួកគេក៏ជាអ្នកលើកពានផងដែរ ។ ខ្សែប្រយុទ្ធឆ្នើមទាំងពីរ Cavani និង Suarez ដែលកំពុងលេងនៅក្លិបផ្សេងគ្នានឹងក្លាយជាទ័ពមុតស្រួចបំផុតសម្រាប់ជ្រោមជ្រែងក្រុមជម្រើសជាតិពួកគេ ។
វាជាការបង្ហាញខ្លួនលើកទី១៣ក្នុងប្រវត្តិសាស្ត្រ ហើយអ៊ុយរូហ្គាយធ្លាប់បានឈ្នះពានជើងឯកពីរលើកអំឡុងឆ្នាំ១៩៣០ និង១៩៥០ ក្នុងចំណោមការឡើងដល់វគ្គផ្តាច់ព្រ័ត្រ៥លើក(ជើងឯករងឆ្នាំ១៩៥៤, ១៩៧០ និង២០១០) ។ វត្តមានចុងក្រោយនៅ World Cup ឆ្នាំ២០១៤ ក្រុមដែលមកពីទ្វីបអាមេរិកខាងត្បូងមួយនេះមិនបានឆ្លងផុតវគ្គ១៦ក្រុមនោះទេ បន្ទាប់ពីចាញ់កូឡុំប៊ី ។ ពួកគេទើបតែចាញ់១ប្រកួតប៉ុណ្ណោះក្នុងចំណោម៥ប្រកួតចុងក្រោយ ដោយឈ្នះ៣ ស្មើ១ និងចាញ់១ ។
វិភាគ ៖ សមត្ថភាពក្រុមទាំង៤ក្នុងពូល A នេះ ប្រហាក់ប្រហែលគ្នាច្រើន ប៉ុន្តែរុស្ស៊ី និងអ៊ុយរូហ្គាយត្រូវបានគេវាយតម្លៃកម្រិតមួយផ្សេង។ រុស្ស៊ីនឹងលេងដោយទំនុកចិត្តខ្ពស់លើទឹកដីខ្លួនឯង ស្របពេលដែលអ្នកគាំទ្រដ៏ច្រើនរបស់ខ្លួនចូលរួមផងនោះ វានឹងធ្វើឱ្យពួកគេមានកម្លាំងចិត្តពុះពារកាន់តែខ្លាំង ។
យ៉ាងណាមិញ អេហ្ស៊ីបនៅតែជាសត្រូវដ៏គួរឱ្យខ្លាចចំពោះក្រុមម្ចាស់ផ្ទះរុស្ស៊ីក្នុងការដណ្តើមកៅអីលេខ២ ព្រោះជំហានបោះពួយមុនពួកគេឡើងដល់វគ្គនេះ គឺពិតជាខ្លាំង និងមានកីឡាករល្អច្រើនជាងមុន ។
រីឯអ៊ុយរូហ្គាយ ដែលសំបូរទៅដោយកីឡាករឆ្នើមច្រើនរូប រួមទាំងបទពិសោធន៍ចាស់វស្សានៅ World Cup ផងនោះ នឹងធ្វើឱ្យពួកគេមិនពិបាកប្រជែងពិន្ទុនៅវគ្គនេះទេ ហើយត្រូវបានគេរំពឹងថានឹងឈរនៅកំពូលតារាងទៀតផង ។ ចំពោះអារ៉ាប៊ីសាអូឌីតវិញ មានសង្ឃឹមតិចតួចណាស់ថានឹងអាចដណ្តើមបានកៅអីលេខ២ក្នុងពូល ។
តើប្រិយមិត្តមានយោបល់យ៉ាងណាដែរ? តើក្នុងពូលនេះក្រុមមួយណាជាក្រុមសំណព្វចិត្ត
របស់ប្រិយមិត្ត?
ចែករំលែកព័តមាននេះ