រាជធានីភ្នំពេញ ៖ រថយន្តស៊េរីទំនើប២គ្រឿងក្នុងនោះ១គ្រឿងម៉ាក LEXUS-570 និង១គ្រឿងទៀតម៉ាក MAZDA បានរងការខូចខាតក្រពឹតរហែកខាងមុខដូចគ្នា បន្ទាប់ពីរថយន្តទាំង២គ្រឿងនេះបានបើកបរ ក្នុងទិសដៅបញ្ច្រាសគ្នា ហើយស្រាប់តែរេចង្កូតជ្រុលទៅបុកគ្នាយ៉ាងពេញទំហឹងលាន់សូរដូចរន្ទះ។
ខណៈនោះរថយន្តម៉ាក MAZDA បានខ្ទាតធ្លាក់ពីលើផ្លូវចូលទៅក្នុងប្រឡាយទឹកស្ថិតនៅអមផ្លូវ នោះថែមទៀតផង។ ឧប្បត្តិហេតុគ្រោះថ្នាក់ចរាចរណ៍នោះបានកើតឡើង កាលពីវេលាម៉ោង៤ និង១៥នាទីល្ងាច ថ្ងៃទី០៣ ខែមិថុនា ឆ្នាំ២០១៨ នៅលើកំណាត់ផ្លូវ៥០ម៉ែត្រ ស្ថិតនៅក្នុងភូមិ អន្លូងគងចាស់ សង្កាត់ព្រៃស ខណ្ឌដង្កោ រាជធានីភ្នំពេញ។ រថយន្តម៉ាក LEXUS-570 ពណ៌ស ពាក់ស្លាកលេខ ភ្នំពេញ 2AJ-5579។ ចំណែករថយន្តម៉ាក MAZDA ពណ៌សដូចគ្នា ពាក់ស្លាកលេខ ភ្នំពេញ 2Y-5922 ហើយបានរងការខូចខាតដាក់រហែកមុខខាងឆ្វេងដូចគ្នា។
ដោយឡែកអ្នកបើកបរ រថយន្តទាំង២គ្រឿងនេះមិនទាន់ត្រូវបានគេដឹងថា ជាជនជាតិចិន ឬខ្មែរនៅឡើយទេ ព្រោះភ្លាមៗបាន ចាកចេញពីកន្លែងកើតហេតុអស់បាត់ទៅហើយ បន្សល់ទុកតែរថយន្តនៅកន្លែងកើតហេតុតែប៉ុណ្ណោះ។ តាមប្រភពព័ត៌មានបានឲ្យដឹងថា នៅមុនពេលកើតហេតុរថយន្តស៊េរីទំនើបទាំង២គ្រឿងនេះ បានបើកបរធ្វើដំណើរក្នុងទិសដៅបញ្ច្រាសគ្នា ដោយរថយន្ត LEXUS-570 បើកបរពីជើងទៅត្បូង។ ចំណែករថយន្ត MAZDA បើកបរក្នុងទិសដៅពីត្បូងទៅជើងក្នុងល្បឿនរៀងៗខ្លួន មិនតែប៉ុណ្ណោះ កំណាត់ផ្លូវខាងលើកំពុងស្ថាបនាមិនទាន់ហើយរួចរាល់នៅឡើយ។ ប្រភពខាងលើបានបន្តទៀតថា ផ្លូវនោះត្រូវបានបើកឲ្យធ្វើចរាចរណ៍ម្ខាង និងបិទម្ខាង ចំណែករថយន្តទាំងពីរគ្រឿងក្រោយពេលបើកបរ ទៅដល់ត្រង់ចំណុចកើតហេតុខាងលើមិនដឹងថាមានឧបសគ្គអ្វីនោះឡើយ។
ស្រាប់តែបុកគ្នាពេញទំហឹង លាន់សូរដូចរន្ទះ បណ្ដាលឲ្យរថយន្តទាំង២គ្រឿងរងការខូចខាតក្រពឹតដាច់រយះមុខ ខាងឆ្វេងរៀងៗខ្លួន។ ប៉ុន្តែរថយន្ត MAZDA បានវិលមួយជុំ ហើយជ្រុលធ្លាក់ចូលទៅក្នុងប្រឡាយទឹកអមផ្លូវនោះ ហើយ អ្នកបើកបរមិនត្រូវបានគេស្គាល់អត្តសញ្ញាណនោះទេ ហើយក៏មិនបានដឹងថា រងរបួស ឬអត់នោះឡើយ ព្រោះបានចាកចេញពីកន្លែងកើតហេតុបាត់ទៅហើយដោយបន្សល់ទុករថយន្តនៅនឹងកន្លែងតែប៉ុណ្ណោះ។ក្រោយពេលកើតហេតុ នគរបាលចរាចរណ៍ខណ្ឌដង្កោ បានចុះទៅធ្វើការវាស់វែង និងនាំយករថយន្តទាំង២គ្រឿងទៅរក្សាទុកនៅអធិការដ្ឋានខណ្ឌរង់ចាំការដោះស្រាយគ្នាតាមផ្លូវច្បាប់៕
https://youtu.be/WsugdkjZXMM
ចែករំលែកព័តមាននេះ