ខេត្តសៀមរាប ៖ រយៈពេលប៉ុន្មានថ្ងៃ គិតត្រឹមប្រហែលតែមួយសប្តាហ៍ប៉ុណ្ណោះ ព្រៃលិចទឹកជិត៣០០ហិចតា ក្នុងតំបន់ពីរលើទំនប់លេខ៧៨ ត្រូវបានខាងសង្កាត់ជ្រាវ ដាក់គ្រឿងចក្ររាប់សិបគ្រឿងឈូសឆាយកាយកំទិចយ៉ាងរលូន ឡើងក្លាយជាវាលរហោឋានជិតបានសម្រេចដូចបំណងហើយ ក៏មានការតវ៉ាពីប្រជាពលរដ្ឋរាប់រយគ្រួសារ…
ខេត្តសៀមរាប ៖ រយៈពេលប៉ុន្មានថ្ងៃ គិតត្រឹមប្រហែលតែមួយសប្តាហ៍ប៉ុណ្ណោះ ព្រៃលិចទឹកជិត៣០០ហិចតា ក្នុងតំបន់ពីរលើទំនប់លេខ៧៨ ត្រូវបានខាងសង្កាត់ជ្រាវ ដាក់គ្រឿងចក្ររាប់សិបគ្រឿងឈូសឆាយកាយកំទិចយ៉ាងរលូន ឡើងក្លាយជាវាលរហោឋានជិតបានសម្រេចដូចបំណងហើយ ក៏មានការតវ៉ាពីប្រជាពលរដ្ឋរាប់រយគ្រួសារ ថែមទាំងមានការឌឺដងផ្លែផ្កាដាក់គ្នាពីក្រោយខ្នងពីសំណាក់លោក ខាំ លឿ អតីតមេឃុំកណ្តែកចាស់ និងលោក ក្តោប រ៉ន ចៅសង្កាត់ជ្រាវ និងលោក គង់ ប៊ិប ប្រធានក្រុមប្រឹក្សាជ្រាវផងដែរ។
សូមបញ្ជាក់ផងដែរថា កាលពីថ្ងៃទី៣១ ខែឧសភា ឆ្នាំ២០១៨ ថ្មីៗនេះ គេឃើញវត្តមានលោក ខាំ-លឿ អតីតមេឃុំកណ្តែក ស្រុកប្រាសាទបាគង ហែរហមអមដំណើរដោយតំណាងប្រជាពលរដ្ឋរាប់រយគ្រួសារចុះទៅតវ៉ា កន្លែងគ្រឿងចក្រឈូសឆាយព្រៃលិចទឹកខាងលើក្នុងគោលបំណងទប់ស្កាត់មិនឱ្យឈូសឆាយបន្ត ដោយលោកមេឃុំរូបនេះបានអះអាងថា ដីដែលកំពុងឈូសឆាយនេះជាចំណែកដីអាងស្តុកទឹករបស់ឃុំកណ្តែក មិនមែនជាកម្មសិទ្ធិរបស់សង្កាត់ជ្រាវនោះទេ។
លោក ខាំ លឿ កើតទុក្ខមិនសុខចិត្តរហូតដល់ថតវីដេអូបង្ហោះតាមហ្វេសប៊ុកផង ផ្តល់បទសម្ភាសន៍ដល់អ្នកកាសែតឱ្យជួយផ្សាយឱ្យផងថា ដីដែលខាងអាជ្ញាធរសង្កាត់ជ្រាវ និងសហគមន៍ជ្រាវកំពុងធ្វើការឈូសឆាយនេះ ជាដីព្រៃអាងស្តុកទឹករបស់ឃុំកណ្តែក ហើយលោក ខាំ លឿ បានសុំអំពាវនាវដល់លោក ឃឹម ប៊ុនសុង អភិបាលខេត្តសៀមរាប សូមជួយរកយុត្តិធម៌ឱ្យលោក និងប្រជារាស្ត្ររបស់លោកផង ព្រោះខាងសង្កាត់ជ្រាវ និងសហគមន៍ជ្រាវកំពុងរំលោភបំពានមកលើដែនដីរបស់ពួកគាត់ហើយ។
លោក ខាំ លឿ បានប្រាប់តាមទូរស័ព្ទបន្ថែមថា «លោកក្អោប រ៉ន ចៅសង្កាត់ជ្រាវនេះខូចណាស់ ចង់បានដីនេះយូរឆ្នាំហើយ ពីមុនមកសុំទិញឱ្យលោក ខូវ ផល្លាបុត្រ តែខ្ញុំមិនព្រមលក់ ខ្ញុំទុកឱ្យប្រជាពលរដ្ឋស្តុកទឹកទុកធ្វើស្រែ តែឥឡូវវាមកយកស្រស់ៗតែម្តង សូមឱ្យអ្នកព័ត៌មានជួយគិតពិចារណាផង តើអាណាខូច អាណាល្អ មិនចាំបាច់ខ្ញុំនិយាយច្រើនទេ»។
ឆ្លើយតបទៅនឹងការចោទប្រកាន់របស់លោក ខាំ លឿ អតីតមេឃុំកណ្តែដែលចោទថា ខាងសង្កាត់ជ្រាវ រំលោភយកដីរបស់ឃុំកណ្តែកនោះ លោក ក្អោប រ៉ន ចៅសង្កាត់ជ្រាវបានប្រាប់ថា ដីដែលឈូសឆាយខាងលើនេះ ជាដីរបស់សង្កាត់ជ្រាវទេ ហើយការឈូសឆាយនេះ ជាគម្រោងរបស់សម្តេចសង្ឃ ទេព-វង្ស ឈូស ដើម្បីធ្វើបារាយណ៍ ហើយក៏មានច្បាប់គ្រប់គ្រាន់ដែលបានសុំតាំងតែពីឆ្នាំ២០១៣មកម្ល៉េះ ប៉ុន្តែកាលមុនមិនទាន់បានធ្វើដោយសារមានបញ្ហាផ្នែកថវិកា ឥឡូវសម្តេចសង្ឃរកដៃគូរវិនិយោគបានហើយ។
លោកចៅសង្កាត់បន្តថា «បើគ្មានគម្រោងច្បាស់លាស់ អ្នកណាថ្លើមធំ ទៅហ៊ានរំលោភបំពានយកដីរដ្ឋនោះ ឥឡូវសូមឱ្យរង់ចាំមើលទាំងអស់គ្នាទៅថា ដីនេះឈូសលក់ ឬឈូសធ្វើបារាយណ៍»។
លោក ក្អោប រ៉ន បានបន្ថែមថា «ខ្ញុំមិនចេះនិយាយជាមួយពួកមនុស្សឆ្កួតនោះទេ (លោកសំដៅទៅលើលោក ខាំ លឿ) ឆ្កួតៗនិយាយយកតែឈ្នះ អាងអីអាង កាំបិត ផ្គាក់ ពូថៅ តែខាងរាស្ត្ររបស់ខ្ញុំនៅខាងភូមិខ្នារ ឯណេះវិញ មិនដែលហ៊ានក្អកជាមួយគេទេ ព្រោះគេអាងកាប់អាងចាក់»។
សូមបញ្ជាក់បន្ថែមថា នៅក្នុងសង្កាត់ជ្រាវ និងឃុំកណ្តែកនេះ កន្លងទៅ និងក្នុងពេលថ្មីៗនេះ មានការឈូសឆាយដីព្រៃលិចទឹកដែលជាជម្រកត្រីពង ឥឡូវនាំគ្នាយកធ្វើជាកម្មសិទ្ធិរបស់ខ្លួនពីសំណាក់អ្នកមានលុយ មានអំណាច។ អ្នកខ្លះឈូសទុកសិន រង់ចាំដីឡើងថ្លៃនឹងលក់បន្ត អ្នកខ្លះឈូសជួលឱ្យគេធ្វើស្រែ អ្នកខ្លះឈូសធ្វើដីឡូតិ៍លក់ អ្នកខ្លះកាយយកអាចម៍ដីលក់ ឬកាយយកអាចម៌ដីចាក់ដីឡូតិ៍ខ្លួនឯង សរុបសេចក្តីទៅមានគ្រប់បែបគ្រប់យ៉ាង ហើយព្រៃលិចទឹកនៅក្នុងខេត្តសៀមរាបនេះ បើថ្នាក់ដឹកនាំក្នុងខេត្តមិនរឹតបន្តឹងក្នុងការការពារឱ្យបានល្អទេនោះ វាមិនលើសពីរបីឆ្នាំទៀតទេ វាច្បាស់ជារលាយហិនហោចខ្លោចផ្សាអស់ជាក់ជាមិនខាន់ឡើយ ៕
ចែករំលែកព័តមាននេះ