សហរដ្ឋអាមេរិក ៖ ទាហានប្រមាណជា១៨០០០នាក់របស់ប្រទេស១៩ ពិសេសជាសមាជិកអូតង់ ចូលរួមក្នុងសមយុទ្ធយោធាឈ្មោះ SABER STRIKE ដែលចាប់ផ្ដើមនាថ្ងៃទី៣មិថុនា នៅប្រទេសប៉ូឡូញ និងក្នុងបណ្ដាប្រទេសនៃតំបន់បាល់ទិក។ សមយុទ្ធនេះនាំមុខដោយអាមេរិកនៅចង្កេះខាងកើតរបស់អូតង់។
សមយុទ្ធដែលមានការដាក់ពង្រាយទាហានអាមេរិកច្រើនបំផុតនៅអឺរ៉ុបតាំងពីចប់សង្គ្រាមត្រជាក់មក គឺសំដៅធានាដល់កិច្ចការពារបណ្ដារដ្ឋអឺរ៉ុប ជាសម្ព័ន្ធមិត្តក្រុងវ៉ាស៊ិនតោន ស្ថិតនៅចុងខាងកើតអឺរ៉ុប ដែលមានការព្រួយបារម្ភចំពោះសមយុទ្ធយោធារុស្ស៊ីជាច្រើន នៅក្បែរព្រំដែនពួកគេ ព្រមទាំងជម្លោះនៅអ៊ុយក្រែន។
សមយុទ្ធនេះដែលប្រព្រឹត្តទៅពីថ្ងៃទី៣ ដល់ទី១៥ មិថុនា ជួនពេលគ្នាជាមួយព័ត៌មានមួយកាលពីសប្ដាហ៍មុននៅប៉ូឡូញ ដែលថា ប្រទេសនេះចូលរួមចេញប្រាក់សម្រាប់វត្តមានកាន់តែច្រើន នៃកងទ័ពអាមេរិកនៅលើដែនដីខ្លួន។
យោងតាមលោក PAWEL SOLOCH ប្រមុខការិយាល័យសន្តិសុខជាតិរបស់ប្រធានាធិបតីប៉ូឡូញថា ឯកសារមួយរៀបរៀងដោយក្រសួងការពារប្រទេស លើកឡើងពីទំហំទឹកប្រាក់រវាងពី1,5ទៅ២ពាន់លានដុល្លារ ដែលប្រទេសលោកអាចចំណាយ លើការដាក់ពង្រាយកងឯកភាពរថពាសដែកមួយរបស់អាមេរិក។ ប្រទេសរុស្ស៊ីបានបញ្ចេញប្រតិកម្មថា ការដាក់ពង្រាយកងទ័ពអាមេរិកមួយបែបនេះ មិនអំណោយផលដល់សន្តិសុខ និងស្ថេរភាពនៅទ្វីបអឺរ៉ុបឡើយ៕
ចែករំលែកព័តមាននេះ