រាជធានីភ្នំពេញ ៖ ចោរបិទមុខ១ក្រុមបានផ្លោះរបងចូលទៅក្នុងរោងរោងចក្រផលិតស្បែកជើង យីហោ «ម៉ារូ ឈុន » រួចបានគាស់ទ្វារបន្ទប់គណនេយ្យចូលទៅគាស់ទូដែលចំនួន២ ។ ដែលក្នុងនោះទូដែកមួយដាក់លុយ…
រាជធានីភ្នំពេញ ៖ ចោរបិទមុខ១ក្រុមបានផ្លោះរបងចូលទៅក្នុងរោងរោងចក្រផលិតស្បែកជើង យីហោ
«ម៉ារូ ឈុន » រួចបានគាស់ទ្វារបន្ទប់គណនេយ្យចូលទៅគាស់ទូដែលចំនួន២ ។ ដែលក្នុងនោះទូដែកមួយដាក់លុយ និងមួយទៀតដាក់ឯកសារសំខាន់ៗនៅក្នុងនោះ ប៉ុន្តែមិនដឹងពីទំហំនៃការបាត់បង់នេះប៉ុន្មាននៅឡើយទេ ចំណែកក្រុមចោរបានគេចខ្លួនបាត់ស្រមោល។
ហេតុការណ៍ខាងលើនោះបានបង្កឲ្យមានការភ្ញាក់ផ្អើលកាលពីវេលាម៉ោង៨និង២០នាទីព្រឹកថ្ងៃទី៣ ខែ
មិថុនា ឆ្នាំ២០១៨ នៅក្នុងរោងចក្រយីហោ«ម៉ារូ ឈុន» ដែលមានទីតាំងស្ថិតនៅក្នុងជិតផ្សារទួលពង្រ ស្ថិតនៅក្នុងភូមិទួលពង្រ សង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មានបានឲ្យដឹងថា តាមការត្រួតពិនិត្យកាមេរ៉ាសុវត្ថិភាពក្រុមចោរមានគ្នាច្រើននាក់ពាក់ម៉ាស់បិទមុខ ហើយបានធ្វើសកម្មភាពគាស់ទូដែកទាំង២នោះរយៈពេលយូរដែរទំរាំតែរួច។ មិនតែប៉ុណ្ណោះពួកចោរបានកាត់លួសបន្លារបងពីចំហៀងដែលជាកន្លែងស្ងាត់ចូលទៅក្នុងរោងចក្រ ហើយពេលធ្វើសកម្មភាពបានសម្រេចក៏បានចេញទៅវិញតាមច្រកដដែលនោះវិញដែរ។
ចំណែកប្រាក់ដែលត្រូវបាត់បង់នោះមិនទាន់ដឹងថាមានចំនួនប៉ុន្មាននៅឡើយទេ ប៉ុន្តែលុយសម្រាប់បើកឲ្យកម្មករនៅមិនទាន់បានយកទៅទុកនៅទីនោះនៅឡើយទេ។
ប្រភពដដែលបានបន្តទៀតថា ក្រុមចោរបានចូលទៅធ្វើសកម្មភាពនៅវេលាម៉ោងជិត៣ទៀបភ្លឺឈានចូលថ្ងៃទី៣ ខែមិថុនា ហើយសន្តិសុខដែលយាមនៅទីនោះមិនបានដឹងឡើយ ។ រហូតដល់វេលាម៉ោង៨និង២០នាទីព្រឹកថ្ងៃដដែលទើបមានការភ្ញាក់ផ្អើលបន្ទាប់ពីថៅកែចូលទៅដល់ក្នុងរោងចក្រ ហើយចូលទៅពិនិត្យឯកសារនៅក្នុងបន្ទប់នោះ ស្រាប់តែឃើញមានស្នាមគាស់បន្ទប់ និងគាស់ទូដែក ចំណែកអីវ៉ាន់មានស្ថានភាពរប៉ាត់រប៉ាយ ។ បន្ទាប់មកក៏បានទៅប្ដឹងនគរបាលឲ្យចុះទៅពិនិត្យមើលដើម្បីកសាងសំណុំរឿងស្រាវជ្រាវរកក្រុមចោរទាំងនោះនិងចាប់ខ្លួនចាត់ការតាមច្បាប់៕
ចែករំលែកព័តមាននេះ