ខេត្តប៉ៃលិន ៖ នគរបាលស្ទាក់ឃាត់ខ្លួនជនសង្ស័យបានចំនួន២នាក់ ដែលហេតុការណ៍ចុះឆ្មក់ចាប់ឃាត់ខ្លួននេះបានធ្វើឡើងកាលពីវេលាម៉ោង៦និង០០នាទីព្រលប់ថ្ងៃទី១ និងទី២ ខែមិថុនា ឆ្នាំ២០១៨ ស្ថិតក្នុងភូមិភ្នំព្រាល ឃុំស្ទឹងត្រង់ ស្រុកសាលាក្រៅ…
ខេត្តប៉ៃលិន ៖ នគរបាលស្ទាក់ឃាត់ខ្លួនជនសង្ស័យបានចំនួន២នាក់ ដែលហេតុការណ៍ចុះឆ្មក់ចាប់ឃាត់ខ្លួននេះបានធ្វើឡើងកាលពីវេលាម៉ោង៦និង០០នាទីព្រលប់ថ្ងៃទី១ និងទី២ ខែមិថុនា ឆ្នាំ២០១៨ ស្ថិតក្នុងភូមិភ្នំព្រាល ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ។
ប្រភពព័ត៌មានបានឱ្យដឹងថា មុនដំបូងនគរបាលបានធ្វើការឆ្មក់ចាប់ឃាត់ខ្លួនបានជនសង្ស័យចំនួន២នាក់ទី១- ឈ្មោះ នី សារ៉េន ហៅរ៉ង ភេទប្រុស អាយុ២៤ឆ្នាំ (អ្នកជួញដូរ) រស់នៅភូមិស្រាយជ្រុំ ឃុំអូរដា ស្រុកកំរៀង ខេត្តបាត់ដំបង ទី២ – ឈ្មោះ ឌី គា ភេទប្រុស អាយុ១៧ឆ្នាំ រស់នៅភូមិឃុំកើតហេតុខាងលើ អ្នកប្រើប្រាស់ ។
នគរបាលរកឃើញវត្ថុតាងម្សៅក្រាមពណ៌សថ្លា (ICE) ១កញ្ចប់តូច ថ្នាំគ្រាប់ពណ៌ផ្កាឈូកចំនួន១គ្រាប់កន្លះ ដាវសាម៉ូរ៉ៃ១ដើម និងម៉ូតូម៉ាកហុងដាឌ្រីម(Honda Dream 125) ពណ៌ខ្មៅ ពាក់ស្លាកលេខ បាត់ដំបង1T- 4486 ។
ប្រភពបន្តទៀតថា ក្រោយពីធ្វើការសាកសួររួចរហូតមកទល់វេលាម៉ោង១១និង០០នាទីព្រឹកថ្ងៃទី០២ ខែមិថុនា ឆ្នាំ២០១៨ កម្លាំងជំនាញរបស់អធិការដ្ឋាននគរបាលស្រុកសាលាក្រៅបានស្នើសុំកម្លាំងសហការពីស្នងការដ្ឋាននគរបាលខេត្តប៉ៃលិន និងកម្លាំងនគរបាលស្រុកកំរៀងដើម្បីធ្វើការចុះបង្ក្រាប និងឃាត់ជនសង្ស័យបានចំនួន២នាក់បន្ថែមទៀត ស្ថិតនៅក្នុងភូមិត្រាង ឃុំត្រាង ស្រុកកំរៀង ខេត្តបាត់ដំបងដែលជនសង្ស័យទាំង២នាក់នោះទី១-ឈ្មោះ ចេវ ពេជ្រ ភេទប្រុស អាយុ១៩ឆ្នាំ មុខរបរ មិនពិតប្រាកដ ទី២- ឈ្មោះ ចេវ ជីម ភេទប្រុស អាយុ៣០ឆ្នាំ មុខរបរមិនពិតប្រាកដ ហើយជនសង្ស័យទាំងពីរនេះមានទីលំនៅក្នុងភូមិឃុំកើតហេតុខាងលើ ។
នគរបាលរកឃើញវត្ថុតាងម្សៅក្រាមពណ៌សថ្លា (ICE) ចំនួន២កញ្ចប់តូច ១កញ្ចប់ធំ និងថ្នាំគ្រាប់ពណ៌ផ្កាឈូកចំនួន០៩គ្រាប់ មានកាំភ្លើងកែឆ្នៃ១ដើម និងដុំត្រាល AK-47មួយ មានគ្រាប់កាំភ្លើងកែឆ្នៃចំនួន២ប្រអប់ ពូថៅដៃចំនួន២ដើម ដាវសាម៉ូរ៉ៃចំនួន៣ដើម ស្លាកលេខម៉ូតូចំនួន៣សន្លឹក ។
ប្រជាពលរដ្ឋរស់នៅក្នុងភូមិខាងលើបានបង្ហើបឱ្យដឹងថា ជនសង្ស័យទាំងអស់នោះតែងតែបង្កភាពអនាធិបតេយ្យដល់ភូមិឃុំ ខណៈពេលយប់ម្តងៗពួកគេតែងតែដើរលួចឆក់ប្លន់ និងយកទ្រព្យសម្បត្តិរបស់ប្រជាពលរដ្ឋទៅលក់ ដើម្បីទិញថ្នាំញៀនប្រើប្រាស់ ។ ពួកគាត់ពិតជាសប្បាយរីករាយដែលឃើញខាងនគរបាលចាប់ឃាត់ខ្លួនពួកគេ បើសិនជាទុកបន្តិចទៀតអាចល្បួងនាំកូនចៅរបស់ពួកគាត់ឱ្យសេពគ្រឿងញៀនជាមួយពួកគេជាក់ជាមិនខានឡើយ ។
ពាក់ព័ន្ធនឹងបញ្ហានេះ បច្ចុប្បន្នកម្លាំងជំនាញ នៃអធិការដ្ឋាននគរបាលស្រុកសាលាក្រៅកំពុងរៀបចំកសាងសំណុំរឿង ដើម្បីបញ្ជូនទៅតុលាការឱ្យចាត់ការតាមនីតិវិធីច្បាប់ ៕
ចែករំលែកព័តមាននេះ