ព្រមានបណ្តេញមេការចិនក្នុងក្រុមហ៊ុនរ៉ែមាសមួយ (មានវីដេអូ)
- មណ្ឌលគិរី
ខេត្តមណ្ឌលគីរី ៖ លោក ឡោ សុខា ស្នងការនគរបាលខេត្តមណ្ឌលគិរី បានព្រមានបណ្តេញជនជាតិចិនមិនឲ្យបន្តធ្វើការងារនៅ ក្រុមហ៊ុនរ៉ែមាស រ៉ុង ឆេង…
ខេត្តមណ្ឌលគីរី ៖ លោក ឡោ សុខា ស្នងការនគរបាលខេត្តមណ្ឌលគិរី បានព្រមានបណ្តេញជនជាតិចិនមិនឲ្យបន្តធ្វើការងារនៅ ក្រុមហ៊ុនរ៉ែមាស រ៉ុង ឆេង ក្នុងទឹកដីខេត្តមណ្ឌលគិរីនោះទេ បើសិនជារកឃើញថា មិនមានសៀវភៅការងារត្រឹមត្រូវតាមច្បាប់។ សារព្រមាននេះ ត្រូវបានធ្វើឡើងនាប្រតិបត្តិការចុះត្រួតពិនិត្យការប្រើប្រាស់រំសេវជាតិផ្ទុះនៅតាមបណ្តាក្រុមហ៊ុន សហគមន៍ ដែលកំពុងធ្វើអាជីវកម្មរុករករ៉ែមាស ស្ថិតក្នុងនៅឃុំចុងផ្លាស់ ស្រុកកែវសីមា ខេត្តមណ្ឌលគិរី កាលពីថ្ងៃទី០១ ខែមិថុនា ឆ្នាំ២០១៨ ។
សមត្ថកិច្ចបានឲ្យដឹងថា ក្រុមការងារបានត្រួតពិនិត្យជាក់ស្តែងលើការស្តុកទុក ការប្រើប្រាស់ និងការដាក់គ្រឿងផ្ទុះបម្រើឲ្យអាជីវកម្មរុករករ៉ែមាស ជាលទ្ធផលក្រុមការងារបានរកឃើញក្រុមហ៊ុនមួយ និងសហគមន៍មួយ ពុំបានប្រើប្រាស់រំសេវជាតិផ្ទុះឲ្យបានត្រឹមត្រូវទៅតាមលក្ខណៈបច្ចេកទេសនៅឡើយទេ។ ក្រុមហ៊ុន រ៉ុង ឆេង គឺជាក្រុមហ៊ុនចិនរុករករ៉ែមាស មានលក្ខណៈទ្រង់ទ្រាយធំ ចំណែកសហគមន៍ សេង ឌី ជាសហគមន៍ប្រកបអាជីវកម្មរុករករ៉ែមាសជាលក្ខណៈគ្រួរសារទ្រង់ទ្រាយតូច។
សមត្ថកិច្ចបានឲ្យដឹងទៀតថា ក្រុមការងារបានត្រួតពិនិត្យ និងវាយតំលៃឃើញថា ក្រុមហ៊ុន និងសហគមន៍ខាងលើនេះ ពុំបាន សហការឲ្យបានល្អជាមួយមន្ត្រីជំនាញពាក់ព័ន្ធ និងនគរបាលមូលដ្ឋានជុំវិញការគ្រប់គ្រង ត្រួតពិនិត្យ និងការប្រើប្រាស់រំសេវគ្រឿងផ្ទុះបានល្អនៅឡើយ (កម្លាំងយោធាជាអ្នកការពារទីតាំងក្រុមហ៊ុន) ព្រមទាំងការប្រើប្រាស់សារធាតុផ្ទុះ និងជាតិពុលពុំបានត្រឹមត្រូវតាមលក្ខណៈបច្ចេកទេស និងការប្រើប្រាស់សារធាតុគីមីមានកំរិតហានិភ័យខ្ពស់ ដែលជាហេតុបង្កគ្រោះថ្នាក់ដល់ជីវិតមនុស្ស និងសត្វនៅក្នុងមូលដ្ឋាន។
បច្ចុប្បន្នក្រុមហ៊ុនរុករករ៉ែមាស និងសហគមន៍ខាងលើ ត្រូវបានផ្អាកដំណើរការរុករករ៉ែមាសក្នុងតំបន់នោះ មូលហេតុដោយស្ថាប័នជំនាញរកឃើញមានប្រើប្រាស់សារធាតុគីមីដែលមានកំរិតហានិភ័យខ្ពស់៕
ចែករំលែកព័តមាននេះ