រាជធានីភ្នំពេញ ៖ បន្ទាប់ពីផ្លូវជាតិលេខ១ ត្រូវបានស្ថាបនាជួសជុលឡើងវិញយ៉ាងស្អាតល្អហើយនោះ ការអភិវឌ្ឍវិស័យលំនៅឋានកំពុងងាកទៅប៉ែកខាងកើតជាបណ្ដើរៗ ជាពិសេសចន្លោះផ្លូវជាតិលេខ១ និងដងទន្លេ ត្រូវបានគេមើលឃើញថា កំពុងមានសក្ដានុពលខ្ពស់ សម្រាប់ការអភិវឌ្ឍលំនៅឋានប្រណីតដែលមានតម្លៃខ្ពស់ចាប់ពីរាប់សិបម៉ឺន រហូតដល់ខ្ទង់លានដុល្លារអាមេរិក ។
បើតាមលោក សេរ៉ាស់ សាត់ធឹន នាយកក្រុមហ៊ុនវាយតម្លៃ និងភ្នាក់ងារអចលនវត្ថុ Century 21st បានឲ្យដឹងថា តំបន់ប៉ែកខាកើតរាជធានីភ្នំពេញ ជាពិសេសនៅចន្លោះផ្លូវជាតិលេខ១ និងដងទន្លេ គឺជាតំបន់ដែលមានសក្ដានុពលខ្ពស់សម្រាប់អភិវឌ្ឍន៍លំនៅឋានទំនើប ស៊ីវិល័យ និងផ្ទះលំហែកាយសម្រាប់អ្នកមានចំណូលខ្ពស់ ក្នុងការស្នាក់នៅជាអចិន្ត្រៃយ៍ ឬស្នាក់នៅសម្រាប់លំហែកាយ ។ លោកថា ៖« តំបន់នេះ វាមានទេសភាពស្រស់ស្អាត នៅជាប់មាត់ទន្លេ ដែលអាចមើលទេសភាពនៅមាត់ទន្លេបានយ៉ាងច្បាស់ ហើយអាចស្រូបយកខ្យល់អាកាសដ៏ល្អបានទៀតផង »។
លោកបន្តថា ៖« បច្ចុប្បន្ននេះ យើងមើលឃើញគម្រោងធំៗមួយចំនួន បានចូលមកអភិវឌ្ឍន៍ជាលំនៅឋានសម្រាប់លំហែកាយ និងលំនៅឋានទំនើបដែលមានតម្លៃរាប់សិបម៉ឺនដល់ខ្ទង់លានដុល្លារអាមេរិក ។ ការចូលមកអភិវឌ្ឍន៍នៅក្នុងតំន់នោះ នឹងជំរុញឲ្យតម្លៃអចលនទ្រព្យជាពិសេសតម្លៃដីធ្លីកើនឡើងខ្ពស់បន្ថែមទៀត »។
លោក ប៉ូ អ៊ាវគង់ នាយកគ្រប់គ្រងក្រុមហ៊ុនអចលនទ្រព្យ Advance ក៏បានឲ្យដឹងផងដែរថា បើមើលពីចរន្តនៃការអភិវឌ្ឍទៅតំបន់នោះ គេឃើញមានគម្រោងលំនៅឋានជាច្រើនបានបាញ់ឆ្ពោះទៅទីនោះ ។ លោកថា ៖« កាលពីមុន តំបន់នោះគេឃើញមានបុរីលំនៅឋានមួយចំនួន បានអភិវឌ្ឍន៍ តែមិនសូវជាច្រើនទេ ប៉ុន្តែចាប់តាំងពីផ្លូវជាតិលេខ១បានចាប់ផ្ដើមស្ថាបនា ជួសជុលឡើងវិញរួច ក៏មានវិនិយោគិនផ្សេងទៀតបានចូលទៅអភិវឌ្ឍន៍ ដោយបានបន្ថែមការផ្គត់ផ្គង់លំនៅឋាន និងវិនិយោគទៅលើវិស័យធនាគារ មន្ទីរពេទ្យ សាលាអន្តរជាតិ និងមជ្ឈមណ្ឌលពាណិជ្ជកម្មជាដើម » ។
លោក ឌឹត ចណ្ណា បានលើកឡើងផងដែរថា តំបន់ភាគខាងកើតនេះ វាកំពុងមានសក្ដានុពលមែនសម្រាប់លំនៅឋាន ។ ជាក់ស្ដែងដូចបានឃើញស្រាប់ហើយ មានបុរីជាច្រើនកំពុងអភិវឌ្ឍន៍នៅទីនោះ ដូចជា បុរីប៉េង ហួត និងបុរីមួយចំនួនទៀត ។ លោកថា ៖« បើគិតមែនទែនទៅ តំបន់មួយនេះមិនឆ្ងាយប៉ុន្មានពីរាជធានីភ្នំពេញប៉ុន្មានទេ ក៏ប៉ុន្តែកាលពីមុន ដោយសារតែស្ថានភាពផ្លូវនៅចង្អៀត មានការកកស្ទះ ទើបមិនសូវមានការចាប់អារម្មណ៍ខ្លាំង តែនៅពេលផ្លូវជាតិលេខ១បានជួសជុលនិងស្ថាបនាថ្មីរួច ឃើញថា ការធ្វើដំណើរមានភាពងាយស្រួលជាងមុន និងលឿនជាងមុន ដែលធ្វើឲ្យការតភ្ជាប់ទំនាក់ទំនងរវាងទីក្រុងទៅតំបន់នោះ ប្រើពេលតិច ដូចនេះហើយទើបមានពលរដ្ឋចាប់អារម្មណ៍ច្រើនទៅរស់នៅតំបន់នេះ »។
លោកទេសរដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ក៏បានលើកឡើងកន្លងមកដែរថា បើនិយាយពីដីធ្លីនៅតំបន់នោះវិញ កាលពីមុនគ្មានអ្នកណាចាប់អារម្មណ៍ និងចង់បានប៉ុន្មានទេ ហើយតម្លៃក៏នៅទាបដែរ ប៉ុន្តែពេលនេះវិញ តម្លៃនៅតំបន់នោះមិនបាច់និយាយទេ គឺបានឡើងដល់ខ្ទង់ពាន់ដុល្លារអាមេរិកទៅហើយក្នុង១ម៉ែត្រការ៉េ ហើយសឹងតែរកដីទិញមិនបានផង ព្រោះមានគេដណ្ដើមទិញអស់ហើយសម្រាប់អភិវឌ្ឍន៍គម្រោងរបស់ពួកគេ ។
បច្ចុប្បន្ននេះ នៅតំបន់ប៉ែកខាងកើត មានគម្រោងធំៗមួយចំនួន កំពុងអភិវឌ្ឍន៍ដូចជាគម្រោង The Palm ដែលមានទុនវិនិយោគប្រមាណ១០០លានដុល្លារអាមេរិក អភិវឌ្ឍន៍លំនៅឋានប្រណីត និងគម្រោងមួយទៀតដែលអភិវឌ្ឍន៍ស្រដៀងគ្នានេះដែរ បានប្រកាសវិនិយោគជាផ្លូវការដើម្បីផ្គត់ផ្គង់លំនៅឋានស៊ីវិល័យ និងទំនើបដល់ប្រជាជនកម្ពុជាដែលមានទ្រព្យធនច្រើន ៕
ចែករំលែកព័តមាននេះ