ប្រធានកិច្ចការប្រយុទ្ធប្រឆាំងសារធាតុញៀនរបស់ចិនបាននិយាយថា ខ្លួនពិតជាភ្ញាក់ផ្អើលខ្លាំងក្រោយពីមន្ត្រីជាន់ខ្ពស់ភ្នាក់ងារប្រឆាំងសារធាតុញៀនពិភពលោក (WADA)ចោទប្រកាន់ថា ផលិតផលអាហាររបស់ចិន៩៩ភាគរយគឺមានដាក់សារធាតុខុសច្បាប់ ។
នៅក្នុងការឆ្លើយតបទៅនឹងសម្តីរបស់អគ្គនាយក WADAលោក David Howmanប្រធានកិច្ចការប្រយុទ្ធប្រឆាំងសារធាតុញៀនចិនលោក Jiang Zhixueបានបញ្ជាក់ថា៖«យើងឆ្ងល់ថា តើ ៩៩ភាគរយនេះបានមកពីណា ហើយតើគាត់មានភស្តុតាងអ្វីដើម្បីបញ្ជាក់។ យើងបានសុំឱ្យ WADAពន្យល់ឱ្យបានពិស្តារបន្ថែមទៀត។ យើងពិតជារន្ធត់ខ្លាំងណាស់ចំពោះសម្តីរបស់លោក Howman »។
ទីភ្នាក់ងារព័ត៌មានស៊ីនហួបានរាយការណ៍ថា ការចោទប្រកាន់របស់លោក Howman បានទាញចំណាប់អារម្មណ៍យ៉ាងខ្លាំងពីសំណាក់រដ្ឋបាលទូទៅទទួលបន្ទុកផ្នែកកីឡាដែលជាស្ថាប័នកីឡាកំពូលរបស់ចិន ។ យ៉ាងណាក៏ដោយ ការចោទប្រកាន់នេះទោះចង់ឬមិនចង់បានរុញចិនឱ្យចូលជ្រៅក្នុងចំណុចកណ្តាលនៃបញ្ហាសារធាតុញៀនដែលបានក្លាយជាប្រធានបទក្តៅក្នុងវិស័យកីឡាក្នុងខែថ្មីៗកន្លងមកនេះ ៕
ចែករំលែកព័តមាននេះ