រាជធានីភ្នំពេញ ៖ ខណ្ឌសែនសុខ បានក្លាយជាតារារះថ្មីមួយទៀតក្នុងចំណោមខណ្ឌសក្ដានុពលសេដ្ឋកិច្ចនៃរាជធានីភ្នំពេញ បន្ទាប់ពីវិនិយោគិនជាតិ និងអន្តរជាតិ សម្រុកទៅអភិវឌ្ឍន៍លើវិស័យលំនៅឋាន និងមជ្ឈមណ្ឌលពាណិជ្ជកម្ម ដែលធ្វើឲ្យតម្លៃដីធ្លីនៅខណ្ឌនេះ ហក់ឡើងយ៉ាងឆាប់រហ័ស…
រាជធានីភ្នំពេញ ៖ ខណ្ឌសែនសុខ បានក្លាយជាតារារះថ្មីមួយទៀតក្នុងចំណោមខណ្ឌសក្ដានុពលសេដ្ឋកិច្ចនៃរាជធានីភ្នំពេញ បន្ទាប់ពីវិនិយោគិនជាតិ និងអន្តរជាតិ សម្រុកទៅអភិវឌ្ឍន៍លើវិស័យលំនៅឋាន និងមជ្ឈមណ្ឌលពាណិជ្ជកម្ម ដែលធ្វើឲ្យតម្លៃដីធ្លីនៅខណ្ឌនេះ ហក់ឡើងយ៉ាងឆាប់រហ័ស ស្ទើរមិនគួរឲ្យជឿ ។
បើតាមលោកស្រី តាំង ហួរ អគ្គនាយិកាក្រុមហ៊ុន AMATAK Property service Co., Ltd. បានថ្លែងតាមទូរស័ព្ទកាលពីព្រឹកថ្ងៃទី១ មិថុនា ម្សិលមិញថា ខណ្ឌសែនសុខកំពុងមានការរីកចម្រើនយ៉ាងលឿនលើហេដ្ឋារចនាសម្ព័ន្ធពាណិជ្ជកម្មនានាដូចជា ហាងកាហ្វេល្បីៗ សណ្ឋាគារ ធនាគារ ភោជនីយដ្ឋាន បុរីលំនៅឋានប្រណីត និងមជ្ឈមណ្ឌលពាណិជ្ជកម្មជាច្រើនទៀត ។
លោកស្រីបន្តថា ក្នុងចំណោមសង្កាត់នៅក្នុងខណ្ឌនេះ សង្កាត់ភ្នំពេញថ្មីមានការរីកចម្រើនលឿនជាងគេ ដោយសារវត្តមានបុរីលំនៅឋាន, មជ្ឈមណ្ឌលពាណិជ្ជកម្ម គួបផ្សំនឹងសណ្ឋានដីមានភាពល្អប្រសើរ ងាយស្រួលក្នុងការអភិវឌ្ឍ ។
លោកស្រីថា ៖« ខ្ញុំសង្កេតឃើញការររៀបចំ ហេដ្ឋារចនាសម្ព័ន្ធនៅក្នុងខណ្ឌនេះមានភាពល្អប្រសើរ ដោយមានផ្លូវធំៗ និងទូលាយ ទើបធ្វើឲ្យគម្រោងអភិវឌ្ឍន៍ និងសកម្មភាពពាណិជ្ជកម្មរីកចម្រើនខ្លាំងនៅតំបន់នេះ » ។ លោកស្រីបន្តថា ៖« តម្លៃដីនៅក្នុងខណ្ឌនេះបានកើនឡើងយ៉ាងខ្លាំង ដោយហក់ឡើងតំបន់ខ្លះពី២០ទៅ៣០% និងតំបន់ខ្លះទៀតកើនខ្ពស់ជាងនេះ »។
ខណ្ឌដែលមានសកម្មភាពពាណិជ្ជកម្មធំៗជាងគេនៅរាជធានីភ្នំពេញ ពីមុនមកគេសម្គាល់ឃើញតែបួនប៉ុណ្ណោះ រួមមានខណ្ឌចំការមន, ខណ្ឌដូនពេញ, ខណ្ឌ៧មករា និងខណ្ឌទួលគោក ប៉ុន្ដែពេលនេះ ខណ្ឌសែនសុខកំពុងក្លាយជាតារារះថ្មីមួយទៀត ដែលមានសកម្មភាពពាណិជ្ជកម្មច្រើនប្រហាក់ប្រហែលខណ្ឌទាំងបួនផងដែរ ។
ការបង្ហាញវត្តមានផ្សារទំនើប MAKRO, AEON MALL 2 ព្រមទាំងបុរីលំនៅឋាន បានធ្វើឲ្យខណ្ឌនេះកាន់តែមានសកម្មភាពរស់រវើកលើផ្នែកពាណិជ្ជកម្ម ។
លោក គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានថ្លែងថា ខណ្ឌសែនសុខពិតជាមានការរីកចម្រើនលឿន ដោយសារកត្តាមួយចំនួនដូចជា ទី១ ការមានសណ្ឋានដីល្អ និងមិនមានរោងចក្រ សហគ្រាសដែលបំពុលផ្សែងដល់ប្រជាពលរដ្ឋ។ ទី២ កំណើនប្រជាសាស្ត្រយ៉ាងឆាប់រហ័ស ។ ទី៣ ការកើនឡើងនូវសកម្មភាពពាណិជ្ជកម្ម ផ្សារទំនើប សាលារៀន ធនាគារ និងទ៤ ហេដ្ឋារចនាសម្ព័ន្ធក្នុងខណ្ឌនេះមានភាពល្អប្រសើរ ។
លោកបន្តថា ៖« ភាពទាក់ទាញ និងកត្តាទាំងអស់នេះ បានជំរុញឲ្យតម្លៃដីធ្លីកើនឡើងខ្ពស់ ។ ជាក់ស្តែងដីនៅតំបន់ផ្សារទំនើបAEON MALL 2, ផ្សារMAKRO ពីមុនមកតម្លៃត្រឹមចន្លោះ១០០ទៅ២០០ដុល្លារទេ ប៉ុន្ដែបច្ចុប្បន្នដីនៅតំបន់នេះបានកើនដល់ចន្លោះ៨០០ទៅ១.៥០០ដុល្លារទៅហើយ ក្នុង១ម៉ែត្រការ៉េ »។
អគ្គនាយកក្រុមហ៊ុនអចលនទ្រព្យ L. Vibol Realty (Cambodia) លោក ឡាំ វិបុល បានមានប្រសាសន៍ស្រដៀងគ្នាទាក់ទងនឹងការរីកចម្រើនលើវិស័យលំនៅឋា និងមជ្ឈមណ្ឌលពាណិជ្ជកម្មនៅតំបន់នេះ ដោយធ្វើឲ្យតម្លៃដីធ្លីនៅតាមបណ្តោយផ្លូវអ្នកឧកញ៉ាម៉ុង ឫទ្ធី និងផ្លូវលេខ១០០៣ ភ្ជាប់ជាមួយផ្លូវហាណូយ កើនឡើងដល់តម្លៃចន្លោះពី១.៥០០ទៅ២.៥០០ដុល្លារក្នុង១ម៉ែត្រការ៉េ ។
លោកបន្តថា ៖« តំបន់នេះ កំពុងទាក់ទាញការវិនិយោគពីអ្នកវិនិយោគជាតិ និងអន្តរជាតិ ហើយតម្លៃដីធ្លី នឹងកើនឡើងបន្ថែមទៀតនាពេលអនាគត » ៕
ចែករំលែកព័តមាននេះ