ខេត្តកំពង់ធំ ៖ ករណីប្រើអំពើហិង្សាដោយចេតនាទៅលើឪពុកបណ្ដាលអោយបែកក្បាល ហេតុការណ៍នេះបានកើតឡើងកាលពីវេលាម៉ោង៤ល្ងាចថ្ងៃទី១ ខែមិថុនា ឆ្នាំ២០១៨ នៅក្នុងភូមិត្រពាំងទឹម ឃុំបឹងល្វា ស្រុកសន្ទុក ខេត្តកំពង់ធំ ។
ប្រភពព័ត៌មានពីសមត្ថកិច្ចបានឱ្យដឹងថា ករណីប្រើអំពើហិង្សាមកលើឪពុកបង្កើតរបស់ខ្លួនខាងលើនេះ បានបង្កឡើងដោយជនសង្ស័យឈ្មោះ ប៉ុន សុខា ភេទប្រុស អាយុ២២ឆ្នាំ ត្រូវជាកូន បានយកដំបងឈើមកវាយក្បាលជនរងគ្រោះជាឪពុកឈ្មោះ វ៉ាន់ ផន អាយុ៥៧ឆ្នាំ បណ្ដាលអោយរងរបួសធ្ងន់បែកក្បាលហូរឈាម ។ អ្នកទាំងពីររស់នៅភូមិឃុំកើតហេតុខាងលើ ។
មូលហេតុដែលកូនប្រុសយកដំបងឈើមកវាយក្បាលឪពុក គឺដោយសារតែកូនប្រុសម្នាក់នេះខឹងនឹងឪពុកស្ដីបន្ទោសឲ្យខ្លួនរឿងមួយថ្ងៃៗគិតតែដើរលែង មិនជួយធ្វើការងារឪពុកម្តាយ ហើយគេចសាលា និងមិនចូលរៀនសូត្រ ដែលជាហេតុធ្វើឲ្យកូនប្រុសខឹងឪពុក ទើបធ្វើឲ្យគេហ៊ានលើកដៃវាយអ្នកមានគុណយ៉ាងដូច្នេះ ។
បច្ចុប្បន្ន ជនសង្ស័យជាកូនត្រូវបានកំលាំងនគរបាលប៉ុស្ដិ៍ធ្វើការឃាត់ខ្លួនយកមកសាកសួរ និងដើម្បីកសាងសំនុំរឿងចាត់ការតាមនិតិវិធីច្បាប់ ៕
ចែករំលែកព័តមាននេះ