ខេត្តកំពង់ធំ ៖ ករណីបុកគ្នា៣កន្លែងស្លាប់៣ និងរបួសធ្ងន់ស្រាល៨នាក់ ក្នុងថ្ងៃតែមួយ ករណីទី១-យុវជនម្នាក់ដើរឆ្លងថ្នល់ត្រូវរថយន្ដមិនស្គាល់ម៉ាកបើកបុកស្លាប់នៅកន្លែងកើតហេតុ បានកើតឡើងកាលពីវេលាម៉ោង២០និង៣០នាទីយប់ថ្ងៃទី០១ ខែមិថុនា ឆ្នាំ២០១៨ លើផ្លូវជាតិលេខ០៦…
ខេត្តកំពង់ធំ ៖ ករណីបុកគ្នា៣កន្លែងស្លាប់៣ និងរបួសធ្ងន់ស្រាល៨នាក់ ក្នុងថ្ងៃតែមួយ ករណីទី១-យុវជនម្នាក់ដើរឆ្លងថ្នល់ត្រូវរថយន្ដមិនស្គាល់ម៉ាកបើកបុកស្លាប់នៅកន្លែងកើតហេតុ បានកើតឡើងកាលពីវេលាម៉ោង២០និង៣០នាទីយប់ថ្ងៃទី០១ ខែមិថុនា ឆ្នាំ២០១៨ លើផ្លូវជាតិលេខ០៦ ចន្លោះគីឡូម៉ែត្រ១២០-១២១ ចំណុចភូមិត្រពាំងឈូក ឃុំបឹង ស្រុកបារាយណ៍ ខេត្តកំពង់ធំ ។
ប្រភពព័ត៌មានពីសមត្ថកិច្ចបានឲ្យដឹងថា ករណីរថយន្តបុកអ្នកថ្មើរជើងបណ្តាលឲ្យស្លាប់ រួចបើករថយន្ដគេចបាត់ជនរងគ្រោះឈ្មោះ នៅ គឿន ភេទប្រុស អាយុ២៥ឆ្នាំ នៅភូមិទួលដំណាក់ ឃុំចុងដូង ស្រុកបារាយណ៍ ខេត្តកំពង់ធំ ក្រោយពេលកើតហេតុសមត្ថកិច្ចចុះវាស់វែងធ្វើកំណត់ហេតុ រួចក៏ប្រគល់សពជូនសាច់ញាតិក្រុមគ្រួសារចាត់ចែងធ្វើបុណ្យ និងបន្ដស្រាវជ្រាវរកអត្តសញ្ញាណអ្នកបើករថយន្តបង្ក ដើម្បីឲ្យចូលខ្លួនដោះស្រាយគ្នាតាមច្បាប់ ។ ករណីទី២- ម៉ូតូបុកជាមួយរ៉ឺម៉កម៉ូតូស្លាប់ម្នាក់ របួសធ្ងន់ និងស្រាល៧នាក់ កាលពីវេលាម៉ោង២០និង៤០នាទីយប់ថ្ងៃទី០១ ខែមិថុនា ឆ្នាំ២០១៨ ហេតុការណ៍នេះបានកើតឡើងត្រង់ចំណុចមុខផ្លូវបត់ចូលអនុវិទ្យាល័យដំរីជាន់ខ្លា តាមបណ្ដោយផ្លូវជាតិលេខ០៦ ស្ថិតនៅភូមិសង្កាត់ដំរីជាន់ខ្លា ក្រុងស្ទឹងសែន បណ្ដាលឲ្យក្មេងស្រីម្នាក់ស្លាប់ និងរបួសធ្ងន់ស្រាល៧នាក់ ។
សមត្ថកិច្ចបានឲ្យដឹងថា មានអ្នកបើកបររ៉ឺម៉កម៉ូតូ C១២៥ពណ៌ខ្មៅ ពាក់ផ្លាក់ស្លាកលេខស្វាយរៀង ១D- ៦០៧៤ អ្នកបើកឈ្មោះ ងួន វាសនា ភេទប្រុស អាយុ៤៥ឆ្នាំ ជាប្តី មុខរបរលក់ដូរ រស់នៅភូមិ សង្កាត់កើតហេតុខាងលើ រងរបួសស្រាល អ្នករួមដំណើរជាមួយមានប្រពន្ធ ឈ្មោះ គឺ ម៉េងគីម អាយុ៣៥ឆ្នាំ លក់ដូរ របួសស្រាល និងកូនៗចំនួន៤នាក់ របួសស្រាល៣ ស្លាប់ម្នាក់ឈ្មោះ ងួន សុវណ្ណឆៃលាង ភេទស្រី អាយុ២ឆ្នាំ របួសធ្ងន់ ស្លាប់នៅមន្ទីពេទ្យខេត្ត ។
ចំណែកម្ខាងទៀតអ្នកបើកម៉ូតូC១២៥ ឈ្មោះលួន ម៉ាប់ ភេទប្រុស អាយុ២៣ឆ្នាំ មុខរបរធ្វើតុទូ រស់នៅភូមិពោធិតាអ៊ុន សង្កត់ស្រយ៉ូវ ក្រុងស្ទឹងសែន របួសធ្ងន់ និងអ្នករួមដំណើរឈ្មោះ ចាន់ ថាវី ភេទប្រុស អាយុ២៧ឆ្នាំ រស់នៅភូមិប្រាសាទអណ្ដែត ឃុំមានរិទ្ធិ ស្រុកសណ្តាន់ មុខរបរជាងផ្សារដែក (របួសធ្ងន់) ក្រោយកើតហេតុសមត្ថកិច្ចបានចុះវាស់វែងធ្វើកំណត់ហេតុ រួចយកវត្ថុតាងទៅរក្សាទុកនៅការិយាល័យចរាចរណ៍ខេត្តរង់ចាំដំណោះស្រាយ ។
ករណីទី៣- ម៉ូតូ និងម៉ូតូពន្លះគ្នាស្លាប់ម្នាក់ និងរបួសធ្ងន់ម្នាក់បានកើតឡើងនៅវេលាម៉ោង៥និង៣០នាទីល្ងាចថ្ងៃទី០១ ខែមិថុនា ស្ថិតនៅលើផ្លូវក្រាលកៅស៊ូមួយកន្លែង ក្នុងភូមិព្រែកស្បូវ សង្កាត់អូរកន្ធរ ក្រុងស្ទឹងសែន អ្នកបើកម៉ូតូសេ១២៥ ពាក់ស្លាកលេខ កំពង់ធំ1D-2123 ឈ្មោះ កែវ រស្មី ភេទប្រុស អាយុ២២ឆ្នាំ រស់នៅភូមិកើតហេតុ របួសធ្ងន់ ខណៈកំពុងបើកម៉ូតូផ្លូវត្រង់ ហើយបុកជាមួយនឹងម៉ូតូសេ១០០ អាល់ហ្វា ពាក់ស្លាកលេខ 1F-5731 បត់ឆ្វេងបើកបរដោយឈ្មោះ ស សឿន ភេទប្រុស អាយុ៥៥ឆ្នាំ រស់នៅភូមិសង្កាត់កើតហេតុខាងលើ រងរបួសធ្ងន់ ហើយបានស្លាប់នៅពេលដែលបញ្ជូនទៅសង្គ្រោះនៅមន្ទីរពេទ្យ ។
ក្រោយពេលកើតហេតុបន្ទាប់ពីសមត្ថកិច្ចវាស់វែងរួច វត្ថុតាងត្រូវបានយកទៅរក្សាទុក ដើម្បីដោះស្រាយ ៕
ចែករំលែកព័តមាននេះ