ខេត្តបាត់ដំបង ៖ សេចក្តីរាយការណ៍ឱ្យដឹងថា កម្លាំងចម្រុះបានចុះពិនិត្យ និងកម្ទេចចោលនូវទីតាំងធ្វើរ៉ែមាសជាច្រើនកន្លែង កាលពីថ្ងៃទី០១ មិថុនា នៅក្នុងស្រុកភ្នំព្រឹក ក្រោយពីពិនិត្យនិងរកឃើញថា ទីតាំងធ្វើរ៉ែមាសទាំងនោះ បានសំងំយករ៉ែមាសដោយគ្មានច្បាប់ ។ នេះបើតាមរបាយការណ៍បឋមរបស់សមត្ថកិច្ច ។
សមត្ថកិច្ចបានឱ្យដឹងថា កិច្ចប្រតិបត្តិការនោះ កម្លាំងចម្រុះបានចុះត្រូតពិនិត្យលើទីតាំងការដ្ឋានរ៉ែមានចំនួន៥កន្លែង ហើយមានតែ១កន្លែងប៉ុណ្ណោះដែលមានច្បាប់ រីឯ៤កន្លែងទៀត គ្មានច្បាប់នោះទេ។ បើតាមរបាយការណ៍បឋមនេះ ម្ចាស់ទីតាំងការដ្ឋានរ៉ែមាសចំនួន៤កន្លែង ដែលគេរកឃើញថា គ្មានច្បាប់អនុញ្ញាតនោះរួមមាន ១-ឈ្មោះខេង សុវណ្ណ ក្នុងភូមិបារាំងធ្លាក់ ឃុំបារាំងធ្លាក់ ស្រុកភ្នំព្រឹក ២-ឈ្មោះបូ ខៀវ ភូមិភ្នំព្រឹក ឃុំភ្នុំព្រឹក ស្រុកភ្នុំព្រឹក ៣-ឈ្មោះកាំង តាំង ភូមិភ្នំព្រឹក ឃុំភ្នុំព្រឹក ស្រុកភ្នំព្រឹក និង៤-ឈ្មោះខូវ ចិត្រា ភូមិភ្នំព្រឹក ឃុំភ្នុំព្រឹក ស្រុកភ្នុំព្រឹក ។ ដោយឡែក ម្ចាស់ទីតាំងឈ្មោះឡាយ ស្រីពៅ ភូមិភ្នំព្រឹក ឃុំភ្នុំព្រឹក ស្រុកភ្នំព្រឹក ទំនងជាមានច្បាប់ ឬមានអាជ្ញាបណ្ណ។ សមត្ថកិច្ចក៏បានបញ្ជាក់ដែរថា ទីតាំងការដ្ឋានរ៉ែមាស ដែលគ្មានច្បាប់អនុញ្ញាត នឹងត្រូវកម្ទេចចោល រីឯសម្ភារត្រូវបានរឹបអូសតែម្ដង ។
បើតាមសេចក្ដីរាយការណ៍បានឱ្យដឹងទៀតថា សម្ភារនិងវត្ថុតាងត្រូវរឹបអូសរួមមាន ១-ម៉ាស៊ីនកិនកំទេចថ្មរ៉ែ ៨គ្រឿង, ២-ម៉ាស៊ីនអុកបំបែកថ្ម ១គ្រឿង, ៣-សារធាតុគីមីមួយចំនួនទៀត, ៤-គីបខ្យល់ (បំពង់ជ័រ) ១០៧០, ៥-គីបអគ្គីសនី ២០៣០, ៦-ក្បាលកិន៤ ៧- ម្សៅ Amoni Nitrat hat. (24 បាវ × 25. Kg)
៨. Sodium Cyanide 20ធុង និងសារធាតុគីមីមួយចំនួនទៀត ។ បច្ចុប្បន្ន សម្ភារនិងវត្ថុតាង បានប្រគល់ឱ្យជំនាញរក្សាទុក ។
បើតាមប្រភពព័ត៌មានបានបង្ហើបទៀតថា ការដ្ឋានធ្វើអាជីវកម្មរ៉ែមាសនៅស្រុកភ្នព្រឹកនេះ បានដំណើរការច្រើនឆ្នាំហើយ តែគ្មានសមត្ថកិច្ច ឬអាជ្ញាធរ ឬស្ថាប័នជំនាញមួយណា ចុះត្រូតពិនិត្យសួរនាំឡើយ មានតែការឃុបឃិតសំងំទទួលផលប្រយោជន៍ពីម្ចាស់ការដ្ឋានរ៉ែមាសតែប៉ុណ្ណោះ ។ លុះដល់ផ្ទុះរឿងរ៉ាវស្លាប់មនុស្ស ដោយសារពុលថ្នាំ ឬសារធាតុគីមីនៅខេត្តក្រចេះ ទើបមានផែនការចុះរុះរើទីតាំងរ៉ែមាសនេះ ។
ប្រភពដដែលបានឱ្យដឹងទៀតថា ម្ចាស់ទីតាំរ៉ែមាសនៅស្រុកភ្នំព្រឹកមួយចំនួនជាសាច់ញាតិរបស់មន្ទីរជំនាញនៅក្នុងខេត្តតែម្ដង ហើយម្នាក់ៗសំងំធ្វើអាជីវកម្មរ៉ែមាសនេះ ទាំងគ្មានច្បាប់ឡើងដុះស្លែទៅហើយ រហូតដល់ពេលនេះ ទើបភ្ញាក់ខ្លួនចុះបង្ក្រាប ។
ចែករំលែកព័តមាននេះ