ខេត្តតាកែវ ៖ កាលពីវេលាម៉ោង១០ និង៣០នាទីព្រឹក ថ្ងៃទី៣១ ឧសភា ២០១៨ មានករណីអំពើហិង្សាដោយចេតនាមួយ បង្កដោយប្តីផឹកស្រាស្រវឹងខឹងប្រពន្ធដើរទៅផ្ទះម្តាយក្មេក តាមទៅវ៉ៃប្រពន្ធ…
ខេត្តតាកែវ ៖ កាលពីវេលាម៉ោង១០ និង៣០នាទីព្រឹក ថ្ងៃទី៣១ ឧសភា ២០១៨ មានករណីអំពើហិង្សាដោយចេតនាមួយ បង្កដោយប្តីផឹកស្រាស្រវឹងខឹងប្រពន្ធដើរទៅផ្ទះម្តាយក្មេក តាមទៅវ៉ៃប្រពន្ធ ប៉ុន្តែវ៉ៃប្រពន្ធមិនបានបែរជាទៅសំពងម្តាយក្មេកសន្លប់ឈឹងតែម្ដង។ ជនសង្ស័យឈ្មោះ អាយ ភ័ណ្ឌ ភេទប្រុស អាយុ៣៥ឆ្នាំ រស់នៅភូមិស្រុកចេក ឃុំអង្គតាសោម ស្រុកត្រាំកក់ ខេត្តតាកែវ។ចំណែកស្ត្រីរងគ្រោះត្រូវជាម្តាយក្មេកឈ្មោះ ប៉ាក ផៅ អាយុ៥៥ឆ្នាំ រស់នៅភូមិឃុំជាមួយគ្នា។
មុនកើតហេតុ ជនសង្ស័យបានផឹកស្រវឹង ហើយបានដើររកប្រពន្ធនៅផ្ទះតែរកមិនឃើញ ក៏ចេញទៅរកនៅផ្ទះម្ដាយក្មេក រួចបានឃើញប្រពន្ធនៅទីនោះ។ ដូច្នោះហើយបានជាជនសង្ស័យខឹងសម្បា និងបានដេញវ៉ៃប្រពន្ធ តែវ៉ៃមិនត្រូវដោយម្ដាយក្មេកចេះតែរារាំង និង ឃាត់កុំឲ្យវ៉ៃប្រពន្ធដែលជាកូនស្រីគាត់ ទើបជនសង្ស័យខឹងទ្រាំមិនបាន ក៏ស្ទុះយកបានដំបងឈើមកវ៉ៃម្ដាយក្មេករហូតសន្លប់ឈឹង។ អ្នកជិតខាងបានប្រាប់សមត្ថកិច្ចថា ឈ្មោះ អាយ ភណ្ឌ័ តែងតែផឹកស្រាវឹងរៀងរាល់ថ្ងៃ ហើយតែងរករឿងវាយប្រពន្ធកូនជាញឹកញាប់។ បន្ទាប់មកសមត្ថកិច្ចក៏បានឃាត់ខ្លួន ជនសង្ស័យដើម្បីកសាងសំណុំរឿងចាត់ការតាមច្បាប់៕
ចែករំលែកព័តមាននេះ