ខេត្តកំពត ៖ តាមសេចក្តីរាយការណ៍ពីការិយាល័យប្រឆាំងបទល្មើសគ្រឿងញៀន នៃស្នងការដ្ឋាននគរបាលខេត្តបានឲ្យដឹងថា នៅថ្ងៃទី៣១ ខែឧសភា ឆ្នាំ២០១៨ពេញមួយថ្ងៃ កម្លាំងអន្តរាគមន៍ឈុតខ្មៅរបស់ស្នងការខេត្តដឹកនាំដោយ លោកវរសេនីយឯក គង់ សុខន ស្នងការរងទទួលផែនប្រឆាំងបទល្មើសសេដ្ឋកិច្ច និងគ្រឿងញៀនបានចុះសហការជាមួយកម្លាំង អធិការដ្ឋានស្រុកពីរគឺ ស្រុកកំពង់ត្រាច និងស្រុកឈូក ចុះបង្ក្រាបបទល្មើសគ្រឿងញៀនបីករណីក្នុង ស្រុកទាំងពីរ ក្នុងនោះស្រុកកំពង់ត្រាចមានពីរករណី និងស្រុកឈូកមួយករណី។ ករណីទី១/- ស្រុកកំពង់ត្រាច នៅវេលាម៉ោង១១ និង៣០នាទីព្រឹក ថ្ងៃទី៣១ ខែឧសភា ឆ្នាំ២០១៨ កម្លាំងអន្តរាគមន៍ឈុតខ្មៅសហការជាមួយកម្លាំង អធិការដ្ឋាននគរបាលស្រុកកំពង់ត្រាច ចុះបង្ក្រាបមុខសញ្ញាជួញដូរ និងប្រើប្រាស់គ្រឿងញៀនមួយកន្លែងស្ថិតក្នុងភូមិកំពង់ត្រាចទី១ ឃុំកំពង់ត្រាចខាងកើត ស្រុកកំពង់ត្រាច ខេត្តកំពត ឃាត់ខ្លួនជនសង្ស័យបាន២នាក់ ថ្នាំញៀន១កញ្ចប់ តូច និងម៉ូតូមួយគ្រឿង។
ជនសង្ស័យទាំងពីរនាក់មានឈ្មោះ ១/-ម៉ម មករា ភេទប្រុស អាយុ២២ឆ្នាំ នៅភូមិកោះក្លូត ឃុំកំពង់ត្រាចខាងកើត ស្រុកកំពង់ត្រាច។ ២/-ឈ្មោះ ភូ ឃាង ភេទប្រុស អាយុ១៥ឆ្នាំ នៅភូមិកំពង់ត្រាចទី១ ឃុំកំពង់ត្រាចខាងកើត ស្រុកកំពង់ត្រាច ខេត្តកំពត។ ករណីទី២/-នៅវេលាម៉ោង ១៤ និង៣០នាទី កម្លាំងជំនាញខេត្ត សហការណ៍ជាមួយកម្លាំងអធិការស្រុកឈូក បានចុះបង្ក្រាបករណីចែកចាយគ្រឿងញៀន មួយកន្លែងស្ថិតក្នុងភូមិត្រពាំងគគីរ ឃុំល្បើក ស្រុកឈូក។ ឃាត់ខ្លួនជនសង្ស័យបានចំនួន០១នាក់ (ឈ្មោះ ស៊ី វណ្ណារ័ត្ន ភេទប្រុស អាយុ៤៩ឆ្នាំ នៅភូមិ-ឃុំកើតហេតុខាងលើ) និងដកហូតបានថ្នាំញៀនចំនួន០២កញ្ចប់តូច។
ករណីទី៣/-នៅវេលាម៉ោង១៧ និង៣០នាទី កម្លាំងការិយាល័យប្រឆាំងគ្រឿងញៀន ដឹកនាំដោយលោកស្នងការរងទទួលផែនប្រឆាំង បទល្មើសដដែល បានចុះបង្ក្រាបមុខសញ្ញាពាក់ព័ន្ធករណីជួញដូរ និងប្រើប្រាស់គ្រឿងញៀនចំនួន០១ ករណី ដែលប្រព្រឹត្តនៅភូមិលក ឃុំឫស្សីស្រុកខាងលិច ស្រុកកំពង់ត្រាច ខេត្តកំពត។ ឃាត់ខ្លួនមុខសញ្ញាចំនួន០៤នាក់ ដែលមានឈ្មោះដូច ខាងក្រោម៖ ទី១/-ឈ្មោះ ចៅ ចិន ភេទប្រុស អាយុ១៩ឆ្នាំ ទី២/.ឈ្មោះ សៀន រាប ហៅកយ ភេទប្រុស អាយុ១៨ឆ្នាំ ទី៣/-ឈ្មោះ ដាវ ឆាយលាង ភេទប្រុស អាយុ១៩ឆ្នាំ ទី៤./-ឈ្មោះ ហេង គុយ ហៅលី ភេទប្រុស អាយុ២៤ឆ្នាំ ទាំង០៤នាក់ រស់នៅក្នុងភូមិ ឃុំកើតហេតុខាងលើ ។ – វត្ថុតាងដកហូតបានថ្នាំញៀនចំនួន០៨ កញ្ចប់ ទម្ងន់ ៣,៣៥ ក្រាម កាំបិត០៣ ដើម និងសម្ភារប្រើប្រាស់គ្រឿងញៀនមួយចំនួន។ បច្ចុប្បន្នជនសង្ស័យទាំង០៧នាក់ រួមនឹងវត្ថុតាងត្រូវបានការិយាល័យប្រឆាំងបទល្មើស គ្រឿងញៀននៃស្នងការដ្ឋាននគរបាលខេត្ត កសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធី៕
ចែករំលែកព័តមាននេះ