ខេត្តកំពង់ស្ពឺ ៖ លោក ហ៊ុន ម៉ានី អ្នកតំណាងរាស្ត្រមណ្ឌលកំពង់ស្ពឺ បានថ្លែងថា ដោយសារតែការផ្លាស់ប្តូររបបបានធ្វើឲ្យកម្ពុជាទទួលរងយ៉ាងធ្ងន់ធ្ងរនូវរបបមួយដែលកម្ពុជាខ្លួនឯងជាអ្នករងទុក្ខ គឺរបបប៉ុលពត បំផ្លាញដល់ឫសគល់គ្មានសល់អ្វីឡើយ។ មិនតែប៉ុណ្ណោះទីកន្លែងសក្ការៈ សាលារៀន បានក្លាយជាគុក ជាកន្លែងទុកដាក់ស្រូវ ជី និងអំបិល។ល។ តែមកដល់សម័យបច្ចុប្បន្ន ទីកន្លែងទាំងនោះបានប្រែក្លាយទៅជាថ្នាលបណ្តុះបណ្តាល ជាកន្លែងជួបជុំពុទ្ធបរិស័ទ និងជាកន្លែង គោរពបូជារបស់បងប្អូនប្រជាពលរដ្ឋគ្រប់ៗគ្នា។ ការថ្លែងបែបនេះ ធ្វើឡើនៅថ្ងៃព្រហស្បតិ៍ ២រោច ខែជេស្ឋ ឆ្នាំច សំរិទ្ធិស័ក ព.ស២៥៦២ ត្រូវនឹងថ្ងៃទី៣១ ខែឧសភា ឆ្នាំ២០១៨នេះ នៅក្នុងពិធីកាត់ខ្សែបូ និងសម្ពោធសមិទ្ធផលនានាក្នុងវត្តបសេដ្ឋ ក្រោមអធិបតីភាពលោក ហ៊ុន ម៉ានី អ្នកតំណាងរាស្ត្រ មណ្ឌលកំពង់ស្ពឺ តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា អមដំណើរដោយ លោក វ៉ី សំណាង អភិបាល នៃគណៈអភិបាលខេត្តកំពង់ស្ពឺ លោក យឹម សុខុម ប្រធានក្រុមប្រឹក្សាខេត្តកំពង់ស្ពឺ និងមានការអញ្ជើញចូលរួមពីមន្ត្រីរាជការ ប្រជាពលរដ្ឋ លោកគ្រូ អ្នកគ្រូ សិស្សានុសិស្ស សរុបចំនួនជា១.០០០នាក់។
លោក ហ៊ុន ម៉ានី ក៏បានពាំនាំនៅការផ្តាំសាកសួរសុខទុក្ខពីសម្តេចតេជោ ហ៊ុន សែន ជូនចំពោះព្រះសង្ឃ មន្ត្រីរាជការ លោកគ្រូ អ្នកគ្រូ ព្រមទាំងប្រជាពលរដ្ឋទាំងអស់នៅក្នុងខេត្តកំពង់ស្ពឺទាំងមូល។ លោក វ៉ី សំណាង អភិបាល នៃគណៈអភិបាលខេត្តកំពង់ស្ពឺ បានលើកឡើងថា ដោយសារតែការដណ្តើមអំណាច ដោយនយោបាយខ្មៅងងឹត ពឹងផ្អែកលើបរទេសបានធ្វើឲ្យប្រទេសជាតិក្លាយជាផេះផង់ ត្រូវបានបរទេសនាំយកគ្រាប់ផ្លោងមកទម្លាក់លើមាតុភូមិរាប់សែនតោន មិនតែប៉ុណ្ណោះបង្ខំឲ្យរាជរដ្ឋាភិបាលសងលុយបំណុលថ្លៃសម្លាប់ពលរដ្ឋឯងប្រមាណជិត៦០០លានដុល្លារថែមទៀត។ លោកអភិបាលខេត្តបន្តថា ថ្ងៃនេះក្រោមនយោបាយឈ្នះៗរបស់សម្តេចតេជោ ហ៊ុន សែន បានប្រែក្លាយប្រទេសទៅស្មើមុខ ស្មើមាត់ទាំងក្នុងតំបន់ និងសហគមន៍អន្តរជាតិ ហើយខេត្តកំពង់ស្ពឺ បានប្រែក្លាយពីភាពក្រីក្របំផុត មកជាខេត្តដែលមានសក្ដានុពលវិស័យកាត់ដេរ បងប្អូនប្រជាជនទូទាំង ខេត្ត ទទួលបានចំណូលក្នុងមួយខែៗប្រមាណជា២០លានដុល្លារពីវិស័យកាត់ដេរនេះ។
សមិទ្ធផលដែលសម្ពោធនាពេលនេះរួមមាន ទី១.សាលាពុទ្ធិកបឋមសិក្សា១ខ្នង កម្ពស់៣ជាន់ ទំហំ ១៧ម៉ែត្រគុណនឹង១៧ម៉ែត្រ និងរូបកូរសមុទ្រទឹកដោះផង ចំណាយអស់ទឹកប្រាក់ចំនួន ១៨៦.២១៤ដុល្លារ។ ទី២.ស្រះទឹក១កន្លែង ទំហំ ៦៥ម៉ែត្រគុណនឹង៥៣ម៉ែត្រ ជម្រៅ ៣.៥០ម៉ែត្រ ចំណាយអស់ទឹកប្រាក់ចំនួន ១៧.១២៥ដុល្លារ និងទី៣. បង្គន់អនាម័យ រោងទទួលភ្ញៀវ១ខ្នង ទំហំ ៤១ម៉ែត្រគុណនឹង១៥ម៉ែត្រ ទិញតុកៅអី ជួសជុលបរិស្ថាន លាបពណ៌ខ្លោងទ្វារ រូបសំណាក សួនច្បារ និងក្រាលថ្មផេះពេញទីវត្តអារាមផងដែរ៕
ចែករំលែកព័តមាននេះ