ប្រទេសកូរ៉េខាងជើង ៖ ពេលជួបសន្ទនាជាមួយរដ្ឋមន្ត្រីការបរទេសរុស្ស៊ី លោកស័រហ្គេយឡាវរ៉ួ វនៅក្នុងព្យុងយ៉ាង មេដឹកនាំកូរ៉េខាងជើង លោកគីម ជុងអ៊ុ នអះអាងជាថ្មីពីការសន្យារបស់លោករំសាយនុយក្លេអ៊ែរនៅឧបទ្វីបកូរ៉េ ហើយសង្ឃឹមថា ដំណើរការមួយនេះមានការរីកចម្រើនដើម្បីដោះស្រាយបញ្ហា។
យោងតាមទីភ្នាក់ងារព័ត៌មានកូរ៉េខាងជើង KCNA ថា លោកគីម ជុងអ៊ុន បញ្ជាក់ថា ឆន្ទៈរបស់កូរ៉េខាងជើងរំសាយនុយក្លេអ៊ែរ នៅឧបទ្វីបកូរ៉េនៅតែគ្មានការផ្លាស់ប្ដូរ។ លោកសង្ឃឹមថា ទំនាក់ទំនងរវាងកូរ៉េខាងជើង និងសហរដ្ឋអាមេរិក និងការរំសាយនុយក្លេអ៊ែរនៅឧបទ្វីបកូរ៉េ នឹងដោះស្រាយបានជាដំណាក់ៗ។
លោកគីម ជុងអ៊ុន បញ្ជាក់ទៀតថា បញ្ហារំសាយនុយក្លេអ៊ែរ ត្រូវដោះស្រាយតាមរយៈការចរចាដ៏មានប្រសិទ្ធភាព និងស្ថាបនា ហើយលោកអំពាវនាវឲ្យមានការខិតខំប្រឹងប្រែងដើម្បីស្វែងរកដំណោះស្រាយមួយដែលអាចឆ្លើយតបដល់ផលប្រយោជន៍របស់ភាគីនីមួយៗតាមរយៈវិធីសាស្ត្រថ្មីក្នុងសករាជថ្មីមួយ។
លោកឡាវរ៉ូវបានសរសើរលោកគីម ជុងអ៊ុន ដែលបានទាក់ទងជាមួយកូរ៉េខាងត្បូង និងសហរដ្ឋអាមេរិក ដោយលោកនិយាយថា សភាពការណ៍នៅឧបទ្វីបកូរ៉េ ចូលក្នុងដំណាក់កាលថ្មីមួយនៃស្ថេរភាព។ លោកសម្ដែងការគាំទ្រទាំងស្រុងចំពោះការសន្យារបស់កូរ៉េខាងជើងរំសាយនុយក្លេអ៊ែរ។
លោកឡាវរ៉ូវ និងលោកគីម ជុងអ៊ុន ក៏បានព្រមព្រៀងគ្នារៀបចំការជួបគ្នាកំពូលរវាងលោកគីម និងលោកពូទីន នាឆ្នាំនេះ៕
ចែករំលែកព័តមាននេះ