សហរដ្ឋអាមេរិក ៖ រដ្ឋមន្ត្រីពាណិជ្ជកម្មអាមេរិកលោក WILBUR ROSS និយាយកាលពីថ្ងៃទី៣១ឧសភាថា ច្បាប់ពន្ធគយលើដែកថែប និងអាលុយមីនីញ៉ូមនាំចូលមកពីសហភាពអឺរ៉ុប កាណាដា និងម៉ិកស៊ិក ត្រូវចូលជាធរមានចាប់ពីថ្ងៃទី១ មិថុនា ទៅហើយ។
ក្នុងសន្និសីទសារព័ត៌មានមួយ លោក ROSS ថ្លែងទៅកាន់ក្រុមអ្នកកាសែតថា ប្រធានាធិបតីអាមេរិកលោកដូណាល់ ត្រាំ បានសម្រេចមិនពន្យារពេលការលើកលែងពន្ធបណ្ដោះអាសន្នសម្រាប់ការនាំចូលដែកថែប និងអាលុយមីនីញ៉ូម ពីដៃគូសំខាន់ទាំង៣ទៀតហើយ។
លោកបន្តថា យើងសង្ឈឹមបន្តការចរចាជាមួយកាណាដា និងម៉ិកស៊ិក ព្រមទាំងជាមួយគណៈកម្មាធិការអឺរ៉ុប ពីព្រោះមានបញ្ហាដទៃៗទៀតដែលត្រូវដោះស្រាយ។
ជាការតបតវិញចំពោះការសម្រេចចិត្តនេះរបស់អាមេរិក កាណាដា សម្រេចលើការយកពន្ធគយមានទឹកប្រាក់16,6ពាន់លានកាណាដា ប្រមាណ12,8ពាន់លានដុល្លារអាមេរិក លើដែកថែប និងអាលុយមីនីញ៉ូម និងផលិតផលឯទៀតៗមកពីសហរដ្ឋអាមេរិក។ នេះជាការអះអាងកាលពីថ្ងៃទី៣១ ឧសភា របស់រដ្ឋមន្ត្រីការបរទេសកាណាដា លោកស្រី CHRYSTIA FREELAND ។
ចំណែកម៉ិកស៊ិកថ្លែងនាថ្ងៃទី៣១ ឧសភាថា ខ្លួននឹងបង្កើតច្បាប់ពន្ធគយ លើបណ្ដាផលិតផលអាមេរិក ក្រោយពីអាមេរិកប្រកាសថា ម៉ិកស៊ិកត្រូវបង់ពន្ធគយ លើដែកថែបនិងអាល់លុយមីនីញ៉ូមនាំចូលប្រទេសខ្លួនចាប់ពីថ្ងៃទី១ មិថុនាទៅ។ ហើយក្នុងសេចក្ដីប្រកាសមួយ ក្រសួងសេដ្ឋកិច្ចម៉ិកស៊ិក សរសេរថា ម៉ិកស៊ិកអះអាងជាច្រើនលើកថា វិធានការបែបនេះ ដែលអនុម័តដោយលើកហេតុផលពីរឿងប៉ះពាល់ដល់សន្តិសុខជាតិ មិនសមស្របឡើយ។
ក្រុងម៉ិកស៊ីកូ គ្រោងតបតវិញដោយយកពន្ធគយក្នុងទំហំទឹកប្រាក់ប្រហាក់ប្រហែលគ្នា អនុវត្តលើផលលិតផលនាំចូលជាច្រើនពីអាមេរិក មានដូចជា ដែកថែបសំប៉ែត អំពូលភ្លើង សាច់សត្វនានា បណ្ដាផលិតផលស្បៀងកែឆ្នៃ ដំឡូងបារាំង ទំពាំងបាយជូរ ហ្វ្រូម៉ាព្រមទាំងផលិតផលឯទៀតៗ។
រីឯរដ្ឋមន្ត្រីសេដ្ឋកិច្ចបារាំងលោក BRUNO LE MAIRE វាយតម្លៃនាថ្ងៃទី៣១ ឧសភាថា ការបង្កើនពន្ធគយលើដែកថែប និងអាលុយមីនីញ៉ូម មកពីសហភាពអឺរ៉ុបជារឿងមិនសមហេតុផល អយុត្តិធម៌ និងគ្រោះថ្នាក់។ លោកបញ្ជាក់ថា បារាំង និងសហភាពអឺរ៉ុប ពុំចង់ធ្វើសង្គ្រាមពាណិជ្ជកម្មឡើយ។ មិត្តអាមេរិករបស់យើងត្រូវដឹងថា ប្រសិនបើធ្វើការសម្រេចចិត្តបំពារបំពាននានា ប្រឆាំងសហភាពអឺរ៉ុបនោះ អឺរ៉ុបនឹងមិនអាចនៅស្ងៀមដោយពុំបញ្ចេញប្រតិកម្មតបវិញនោះទេ។ វាធ្វើឲ្យប៉ះពាល់ដល់បណ្ដាផលប្រយោជន៍សេដ្ឋកិច្ចរបស់យើង ហើយក៏ជាការមើលស្រាលដល់កម្លាំងនយោបាយរបស់អឺរ៉ុបផងដែរ៕
ចែករំលែកព័តមាននេះ