ខេត្តព្រៃវែង ៖ ប្រជាកសិករជាច្រើនគ្រួសារដែលកំពុងធ្វើស្រែនៅតំបន់វាលទំនាបខាងមុខសាលាខេត្តព្រៃវែង កំពុងព្រួយបារម្ភជួបរឿងដូចឆ្នាំមុន ខណៈស្រូវមិនទាន់ទុំផង ទឹកជំនន់បានចាប់ផ្ដើមឡើងមកដល់ជិតស្រែរបស់ពួកគាត់ទៅហើយ ។
ពួកគាត់និយាយថា ដីស្រែនៅតំបន់វាលទំនាបនេះ ក្នុង១ឆ្នាំធ្វើស្រែបានតែម្តងទេ ដោយត្រូវរង់ចាំឲ្យទឹកស្រកអស់នៅអំឡុងខែមករា ឬខែកុម្ភៈ ទើបចាប់ផ្តើមភ្ជួររាស់ និងព្រោះដេញតាមទឹក ហើយពេលនេះ ស្រូវក្នុងស្រែនីមួយៗកំពុងដាក់គ្រាប់ និងស្រែខ្លះទុំស្លាបកំភេនទៅហើយ ប៉ុន្ដែទឹកជំនន់ក៏ឡើងមកដល់មើលទៅល្ហល្ហេវដែរ ។
កសិករទាំងនោះបញ្ជាក់ថា ៖« កាលពីឆ្នាំមុន ពួកយើងជួបបញ្ហានេះម្ដងហើយ គឺទឹកឡើងមកលឿនពេក ស្រូវមិនទាន់ទុំបានច្រូតផង ស្រាប់តែទឹកជន់លិចអស់ ខាតទាំងកម្លាំង ខាតទាំងលុយ » ។
ពួកគាត់បន្ដថា ៖« តាមធម្មតា កម្ពស់ទឹកនៅខេត្តកំពង់ចាមឡើងដល់កម្រិត១៣ម៉ែត្រ ទើបមានទឹកហូរចូលដល់ខេត្តព្រៃវែង ប៉ុន្តែឆ្នាំនេះ ទឹកនៅកំពង់ចាមទើបតែមានកម្ពស់ជាង៤ម៉ែត្រប៉ុណ្ណោះ បែរជាមានទឹកល្ហល្ហេវមកជិតដល់ដីស្រែរបស់ពួកគាត់ទៅហើយ ដូច្នេះហើយទើបពួកគាត់មានការព្រួយបារម្ភខ្លាចទឹកឆ្នាំនេះឡើងលឿនដូចឆ្នាំមុនទៀត » ។
ដីនៅតំបន់វាលទំនាបខាងមុខសាលាខេត្តព្រៃវែង ត្រូវប្រឈមនឹងទឹកជំនន់ជន់លិចរៀងរាល់ឆ្នាំ ប៉ុន្ដែកសិករទាំងនោះនៅតែតស៊ូមិនបោះបង់ ដោយសារតែដីនៅតំបន់នោះមានជីវជាតិខ្លាំង មិនសូវមានសត្វល្អិតយាយី និងផ្ដល់ទិន្នផលខ្ពស់ ដោយក្នុង១ហិកតាទទួលបានផលស្រូវប្រមាណពី៦ទៅ៨តោនឯណោះ ។
កសិករទាំងនោះនិយាយថា សម្រាប់ឆ្នាំនេះ បើទឹកឡើងមិនលឿនដូចឆ្នាំមុនទេ ពួកគាត់អាចនឹងចំណេញបានច្រើន ព្រោះស្រូវឆ្នាំនេះលក់បានថ្លៃជាងឆ្នាំមុនៗ ដោយក្នុង១គីឡូក្រាមតម្លៃជាង៩រយរៀល ខណៈឆ្នាំមុនលក់បានតម្លៃខ្ពស់បំផុតត្រឹមតែ៨០០រៀលប៉ុណ្ណោះ ៕
ចែករំលែកព័តមាននេះ