ខេត្តក្រចេះ ៖ ទោះបីជានៅឆ្ងាយពីរាជធានីភ្នំពេញ ប៉ុន្តែរមណីយដ្ឋានកោះទ្រង់ស្ថិតក្នុងខេត្តក្រចេះ ក្នុងរយៈពេល៥ខែដើមឆ្នាំ២០១៨នេះ មានភ្ញៀវទេសចរជាតិ និងអន្តរជាតិមកសម្រាកកម្សាន្តក្នុងកំណើនជាង៣០% បើធៀបនឹងរយៈពេលដូចគ្នាឆ្នាំ២០១៧ ។ នេះបើតាមប្រធានមន្ទីរទេសចរណ៍ខេត្តភាគឦសានមួយនេះ ។
លោក ប៊ុន បាន ប្រធានមន្ទីរទេសចរណ៍ខេត្ត បានរៀបរាប់ថា ៖« កោះទ្រង់បានបង្ហាញនូវសក្តានុពលទេសចរណ៍យ៉ាងខ្លាំងសម្រាប់ទាក់ទាញភ្ញៀវទេសចរ ហើយភ្ញៀវទេសចរដែលបានទៅកាន់តំបន់រមណីយដ្ឋានកោះទ្រង់ សុទ្ធតែកោតសរសើរពីទេសភាពធម្មជាតិ រួមទាំងសេវាកម្ម ការរាក់ទាក់ភ្ញៀវពីសហគមន៍ ក៏ដូចជាប្រជាពលរដ្ឋរស់នៅតំបន់នោះផងដែរ ។ កោះទ្រង់មានទំហំប្រមាណ២២២ហិកតា » ។
លោកបញ្ជាក់ថា ក្នុងរយៈពេល៥ខែដើមឆ្នាំ២០១៨នេះ កោះទ្រង់ទទួលបានភ្ញៀវទេសចរជាតិ-អន្តរជាតិប្រមាណ១៣.៦០០នាក់ ក្នុងកំណើនជាង៣០% ហើយអ្វីដែលបានទាក់ទាញ ភ្ញៀវទៅកម្សាន្តនៅកោះទ្រង់ រួមមាន សម្រស់ឆ្នេរខ្សាច់ធម្មជាតិ ចម្ការក្រូចថ្លុង សួនបន្លែសហគមន៍ ការចិញ្ចឹមត្រី និងជិះសេះ ជិះកង់-ម៉ូតូ ជិះរទេះគោកម្សាន្ត ជាដើម ។
លោកក៏បានឲ្យដឹងដែរថា មកដល់ពេលនេះ ខេត្តក្រចេះមានសហគមន៍ទេសចរណ៍ចំនួន៣សំខាន់ៗ ហើយសហគមន៍ទាំងនោះបាននិងកំពុងធ្វើសកម្មភាពគួរឲ្យកត់សម្គាល់ រួមមាន សហគមន៍កោះទ្រង់ សហគមន៍កាំពី និងសហគមន៍កោះផ្តៅ ។ លោកថា ៖« ក្នុងចំណោមសហគមន៍ទាំង៣នេះ យើងសង្កេតឃើញថា សហគមន៍ចំនួន២ គឺសហគមន៍កោះទ្រង់ និងសហគមន៍កាំពី មានសកម្មភាពល្អ និងទទួលបានជោគជ័យយ៉ាងខ្លាំងក្នុងការទាក់ទាញភ្ញៀវទេសចរ » ។
ទោះជាយ៉ាងណា លោកប្រធានមន្ទីររូបនេះអះអាងថា តំបន់រមណីយដ្ឋានកាំពីទទួលបានភ្ញៀវទេសចរច្រើនជាងរមណីយដ្ឋានណាៗទាំងអស់ ព្រោះនៅទីនោះមានសម្រស់ទឹកហូរខ្លាំង និងមានផ្សោត ហើយមានចម្ងាយតែ១៦គីឡូម៉ែត្រប៉ុណ្ណោះពីទីរួមខេត្តក្រចេះ ខណៈផ្លូវធ្វើដំណើរក៏បង្កភាពងាយស្រួល បើធៀបនឹងរមណីយដ្ឋានកោះទ្រង់ និងរមណីយដ្ឋានផ្សេងៗទៀត ។
លោកប្រធានមន្ទីរបានអំពាវនាវដល់ភ្ញៀវជាតិ និងអន្តរជាតិ ឲ្យធ្វើដំណើរទៅកម្សាន្តនៅតាមបណ្តារមណីយដ្ឋាននានាក្នុងខេត្តក្រចេះ ជាពិសេស រមណីយដ្ឋានកោះទ្រង់ និងរមណីយដ្ឋានកាំពី ព្រោះទីនោះមានសក្តានុពលទេសចរណ៍ប្រកបដោយភាពទាក់ទាញបំផុត នៅពេលភ្ញៀវទេសចរទៅដល់ប្រាកដជាកោតសរសើរ និងជក់ចិត្តមិនខាន ។
តំបន់រមណីយដ្ឋានទេសចរណ៍ទាំងនេះបានរៀបចំនូវហេដ្ឋារចនាសម្ព័ន្ធគ្រប់គ្រាន់សម្រាប់ទទួលភ្ញៀវទេសចរ ដោយមិនលំបាកដូចពេលមុនឡើយ ហើយអាជ្ញាធរ និងប្រជាពលរដ្ឋនៅតំបន់នេះបានត្រៀមខ្លួនរួចជាស្រេច ដើម្បីស្វាគមន៍ភ្ញៀវទេសចរជាតិ និងអន្តរជាតិ ។
ទីប្រឹក្សាសមាគមទីភ្នាក់ងារទេសចរណ៍កម្ពុជា និងជានាយកគ្រប់គ្រងក្រុមហ៊ុនទេសចរណ៍ World Express Tours & Travel លោក ហូ វណ្ឌី បានថ្លែង អំឡុងពេលនេះ ជាពេលដែលមានភ្ញៀវតិច ក៏ប៉ុន្ដែយើងឃើញការមកដល់នៃភ្ញៀវទេសចរបរទេសចូលមកទស្សនាកើនឡើងជាបន្តបន្ទាប់ ។
លោកថា « អ្វីដែលជំរុញកំណើននេះ គឺដោយសារតែការភ្ជាប់ជើងហោះហើរតាមគោលដៅសហគមន៍របស់យើងនៅអាស៊ី ជាពិសេសប្រទេសចិន » ។
ដើម្បីទាក់ទាញភ្ញៀវទេសចរអន្តរជាតិមកទស្សនាកាន់តែច្រើនថែមទៀត អាជ្ញាធរ និងមន្ត្រីពាក់ព័ន្ធ គួរយកចិត្តទុកដាក់លើការការពារ ថែរក្សាបរិស្ថាន និងអនាម័យ ឲ្យបានស្អាត ព្រោះសំរាមជាសត្រូវរបស់ភ្ញៀវទេសចរ ។ នេះបើតាមលោក ហូ វណ្ឌី ៕
ចែករំលែកព័តមាននេះ