រាជធានីភ្នំពេញ ៖ កាលពីវេលាម៉ោង៣ទៀបភ្លឺថ្ងៃទី១ ខែមិថុនា ឆ្នាំ២០១៨ នៅតាមបណ្តោយផ្លូវ២០០៤
(ហៅផ្លូវម៉ៃដា) ដែលស្ថិតនៅចំណុចស្តុបវត្តអង្គតាមិញ ស្ថិតនៅភូមិគោកចំបក់ សង្កាត់ចោមចៅ១ ខណ្ឌពោធិ៍សែនជ័យ មានហេតុការណ៍ជនសង្ស័យប្លន់យកម៉ូតូពីបុរសម្នាក់ដែលទើបនឹងចេញពីជួយលក់បាយបងនៅម្តុំកែងផ្លូវ២០០៤ ។
បុរសម្ចាស់ម៉ូតូឈ្មោះសូរ ដារ៉ូ ភេទប្រុស អាយុ២៥ឆ្នាំ មុខរបរអ្នកគិតលុយក្នុងក្លឹបមួយកន្លែង រស់នៅសង្កាត់បឹងសាឡាង ខណ្ឌទួលគោក។ ម៉ូតូមួយគ្រឿងដែលជនសង្ស័យប្លន់យកទៅបាត់ម៉ាកឌូក ពណ៌ខ្មៅ ពាក់ស្លាកលេខភ្នំពេញ ១CV-២២២២។
តាមប្រភពព័ត៌មានពីបុរសម្ចាស់ម៉ូតូបាននិយាយថា នៅមុនពេលកើតហេតុ គាត់ និងមិត្តភក្ដិ២នាក់ទៀតចេញពីធ្វើការបានទៅជួយលក់បាយបងនៅម្តុំកែងផ្លូវ២០០៤ ហើយបាននាំគ្នាត្រឡប់ទៅផ្ទះវិញ ដោយជិះម៉ូតូ៣គ្រឿង ក្នុងនោះម៉ូតូម៉ាកឌូកចំនួន២គ្រឿង និងម៉ូតូកូនទាមួយគ្រឿង ខណៈពេលជិះចេញបានបន្តិច មិត្តភក្តិរបស់គាត់ម្នាក់បានភ្លេចមួកសុវត្ថិភាពនៅកន្លែងលក់បាយរបស់បងនោះ ។
ពេលនោះមិត្តភក្តិរបស់គាត់ម្នាក់ដែលជិះម៉ូតូម៉ាកឌូកដែរតែពណ៌លឿង បានត្រឡប់ទៅយកមួកសុវត្ថិភាព ហើយនៅសល់តែគាត់ និងមិត្តម្នាក់ទៀត នៅពេលនោះគាត់កំពុងនិយាយគ្នាជាមួយមិត្តភក្ដិដែលជិះម៉ូតូកូនទានោះ ស្រាប់តែមានជនសង្ស័យមានគ្នា២នាក់ជិះម៉ូតូមួយគ្រឿង ម៉ាកហុងដាឌ្រីម ពណ៌ខ្មៅ មិនចាំស្លាកលេខ ជិះមកកាក់ពីមុខរូបគាត់ ហើយនិយាយថា «អែងនិយាយអី» គាត់ក៏បានឆ្លើយថា «ទេ ខ្ញុំនិយាយជាមួយគ្នាខ្ញុំទេ» ជនសង្ស័យក៏បានដកកាំភ្លើងខ្លីពីកាបូប ម៉ាករ៉ូឡូ ហើយសួរគាត់ថា «អែងស្គាល់អានេះអត់» ពេលនោះគាត់ឈប់ នឹងបញ្ឈរម៉ូតូ ហើយបំរុងដកសោម៉ូតូ តែត្រូវជនសង្ស័យនិយាយថា «អែងសាកដកសោមើល អញបាញ់សំលាប់អែងចោលឥឡូវហើយ» ។ បន្ទាប់មកគាត់បានចុះពីលើម៉ូតូហើយរត់ទៅម្តុំស្ថានីយប្រេងដើម្បីឱ្យគេជួយ តែត្រូវជនសង្ស័យបាញ់មួយគ្រាប់ឡើងលើហើយជិះម៉ូតូរបស់គាត់ចេញទៅបាត់ ទើបមិត្តភក្ដិរបស់គាត់ម្នាក់ទៀតជិះម៉ូតូមួយគ្រឿងម៉ាកឌូកដែរបានមកដល់ ហើយខំជិះម៉ូតូដេញពីក្រោយជនសង្ស័យដែរ តែដេញមិនទាន់ ហើយក៏ត្រឡប់មកកន្លែងកើតហេតុវិញ ។
ក្រោយពេលកើតហេតុ បុរសម្ចាស់ម៉ូតូ និងមិត្តភក្តិបាននាំគ្នាទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលកាកាប១ តែដោយសារទីកន្លែងកើតហេតុជាប់ព្រំប្រទល់នគរបាលប៉ុស្តិ៍កាកាប១ ទើបសមត្ថកិច្ចបាននាំបុរសជាម្ចាស់ម៉ូតូខាងលើទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលចោមចៅ២ ដើម្បីសាកសួរ និងស៊ើបអង្កេតរកមុខសញ្ញាជនសង្ស័យប្លន់ម៉ូតូមកផ្តន្ទាទោសតាមច្បាប់ ៕
ចែករំលែកព័តមាននេះ