តាមប្រភពព័ត៌មាន Marca បានឲ្យដឹងថា អ្នកចាត់ការក្លិបអធិរាជដែលទើបតែប្រកាសកាលពីយប់មិញថា បានចាកចេញពី Real Madrid បានប្រាប់ពីមូលហេតុនៅពីក្រោយការចាកចេញនេះ ។ ក្រោយពីឈ្នះពាន Champions League ហើយភ្លាម ស្រាប់តែអ្នកចាត់ការក្លិប លោក Zinedine Zidane បានប្រកាសលាឈប់ភ្លាម ។ នេះពិតជារឿងមួយដែលនឹកស្មានមិនដល់ ដោយសារតែអ្នកចាត់ការដែលនាំពានមកឲ្យក្រុម៣ដងជាប់ៗគ្នារូបនេះធ្លាប់បាននិយាយថានឹងមិនទៅណាចោល Real Madrid ទេ ។
នៅក្នុងការសម្ភាសជាមួយនឹងអ្នកកាសែតលោកបាននិយាយថា «អស់រយៈពេល៣ឆ្នាំមកនេះ ខ្ញុំគិតថាពេលនេះជាពេលគួរឲ្យចាកចេញហើយ ។ វាពិតជាពិបាកក្នុងការបន្តហ្វឹកហាត់ក្រុមរយៈពេលយូរបែបនេះ ។ ខ្ញុំមិនដឹងថាថ្ងៃមុខយើងអាចបន្តឈ្នះពានតទៅទៀតទេ ។ នេះជាពេលដែលខ្ញុំត្រូវចាកចេញ ប្រសើរជាងធ្វើឲ្យមានកំហុស» ។
អ្នកចាត់ការជនជាតិបារាំងរូបនេះបានប្រាប់ថា រូបលោកគ្មានមានក្លិបណាដែលចង់ទៅទេនៅពេលនេះព្រោះនេះជាការសម្រេចចិត្តភ្លាមៗមិនបានគ្រោងទុក ។ លោកបានបន្តថា «ខ្ញុំធ្លាប់ប្រកាសកាលពីខែកុម្ភៈ ថាមិនបានគិតនឹងចាកចេញទេ ។ ពិតណាស់ ពេលនោះខ្ញុំនិយាយចេញពីចិត្ត ។ ខ្ញុំក៏ធ្លាប់និយាយដែរថា អ្វីៗក្នុងក្លិបអាចនឹងបញ្ចប់ទៅក្នុងពេលមួយប៉ប្រិចភ្នែក ។ ពេលនេះអស់ពេលសម្រាប់ឲ្យខ្ញុំនៅទៀតហើយ» ។ តើនរណាអាចនឹងមកជំនួសកៅអីរបស់អ្នកចាត់ការឆ្នើមម្នាក់នេះ?
ចែករំលែកព័តមាននេះ