រាជធានីភ្នំពេញ ៖ ក្លិបបាល់ទាត់វិសាខាដែលមានទីតាំងស្ថិតនៅក្នុងបុរីហ្គ្រេនភ្នំពេញ ខណ្ឌសែនសុខ កាលពីថ្ងៃទី៣០ ឧសភា កន្លងមកនេះ បានរៀបចំពិធីបង្ហាញកីឡាករចំណូលថ្មីចំនួន២រូបគឺកីឡាករ កែវ សុខផេង…
រាជធានីភ្នំពេញ ៖ ក្លិបបាល់ទាត់វិសាខាដែលមានទីតាំងស្ថិតនៅក្នុងបុរីហ្គ្រេនភ្នំពេញ
ខណ្ឌសែនសុខ កាលពីថ្ងៃទី៣០ ឧសភា កន្លងមកនេះ បានរៀបចំពិធីបង្ហាញកីឡាករចំណូលថ្មីចំនួន២រូបគឺកីឡាករ កែវ សុខផេង អតីតខ្សែប្រយុទ្ធក្លិបភ្នំពេញក្រោន ដែលទើបចែកផ្លូវគ្នាជាមួយក្លិបបាល់ទាត់មួយក្នុងលីគកំពូលម៉ាឡេស៊ី និងកីឡាករ សុខ សុវណ្ណ អតីតខ្សែការពារក្លិបបាល់ទាត់បឹងកេតអង្គរ។
លោក ហុក សុចិត្រា គ្រូបង្គោលក្លិបបាល់ទាត់វិសាខា បានថ្លែងថា វត្តមានសមាជិកថ្មីទាំង២រូបនាពេលនេះសង្ឃឹមថានឹងជួយឱ្យក្រុមបាល់ទាត់របស់លោកកាន់តែរឹងមាំនៅក្នុងរដូវកាលថ្មីនៃការប្រកួតពានរង្វាន់សម្ដេចតេជោហ៊ុន សែន និងលីគកំពូលកម្ពុជា ។ លោក ហុក ចិត្រា ឱ្យដឹងថា ការសម្រេចទទួលយកកីឡាករទាំង២រូបនេះមកលេងឱ្យក្លិបវិសាខាព្រោះតែយល់ឃើញថា ពួកគេមិនត្រឹមតែមានបទពិសោធន៍គ្រប់គ្រាន់ប៉ុណ្ណោះទេថែមទាំងជាកីឡាករស្ថិតនៅក្នុងក្រុមជម្រើសជាតិច្រើនឆ្នាំទៀតផងដែលធ្វើឱ្យលោកសង្ឃឹមថាកីឡាករទាំង២នឹងអាចជួយឱ្យក្លិបបាល់ទាត់វិសាខាកាន់តែរឹងមាំថែមទៀត ។
ជាមួយនឹងការចុះកិច្ចសន្យានាពេលនេះ លោកមិនបានប្រាប់ឱ្យដឹងថា មានរយៈពេល
ប៉ុន្មានឆ្នាំនោះទេ ដោយលោកគ្រាន់តែបញ្ជាក់ថា អាស្រ័យទៅលើការខិតខំប្រឹងប្រែងរបស់កីឡាករទាំង២ប៉ុណ្ណោះ។
កីឡាករ កែវ សុខផេង ដែលពាក់អាវលេខ៦៨ពេលក្លាយជាសមាជិកថ្មីរបស់ក្រុមបាល់ទាត់វិសាខាបានប្រាប់អ្នកសារព័ត៌មានថា ជាមួយនឹងបទពិសោធន៍នៃការលេងបាល់ទាត់ជាច្រើនឆ្នាំមកនេះ លោកនឹងខិតខំប្រឹងប្រែងជួយក្លិបបាល់ទាត់វិសាខាឱ្យកាន់តែរឹងមាំថែមទៀត ។ ចំណែកកីឡាករ សុខ សុវណ្ណ ដែលពាក់អាវលេខ៧៩បានថ្លែងស្រដៀងគ្នានេះដែរថា លោកនឹងសហការជាមួយសមាជិកក្រុមឱ្យបានល្អធ្វើយ៉ាងណាឱ្យក្លិបបាល់ទាត់វិសាខាកាន់តែខ្លាំង។
លោក ឈួ ម៉េងតុង អគ្គលេខាធិការក្លិបបាល់ទាត់វិសាខា បានថ្លែងឱ្យដឹងថា ក្លិបរបស់លោកមិនត្រឹមតែយកចិត្តទុកដាក់តែទៅលើកីឡាបាល់ទាត់ប៉ុណ្ណោះទេថែមទាំងយកចិត្តទុកដាក់ទៅលើកីឡាបាល់ទះទៀតផង ។ យើងដឹងហើយថា ការបង្កើតឱ្យមានក្រុមបាល់ទះនិងបាល់ទាត់ដែលមានលក្ខណៈអាជីពនេះឡើងត្រូវចំណាយច្រើនណាស់ រីឯចំណូលត្រឡប់មកវិញគឺបានតិចណាស់ ។ ទោះបីយ៉ាងណា ដោយសារតែការស្រឡាញ់ និងចង់ចូលរួមលើកស្ទួយវិស័យកីឡាទាំង២ឱ្យមានការរីកចម្រើន ទើបថ្នាក់ដឹកនាំក្លិបវិសាខាមិនរួញរាក្នុងការវិនិយោគលើការបង្កើតក្លិបបាល់ទាត់និងបាល់ទះនេះឡើង។
ពេលអ្នកសារព័ត៌មានសួរថា បើសិនកីឡាករក្លិបលោកលេងល្អមានឈ្មោះល្បីហើយត្រូវក្លិបបរទេសចង់ទិញយកទៅលេងឱ្យក្លិបរបស់គេ តើលោកគិតយ៉ាងម៉េច? លោក ឈួ ម៉េងតុង ថ្លែងថា ក្លិបរបស់លោកមិនត្រឹមតែមិនហាមឃាត់កីឡាករប៉ុណ្ណោះទេ ផ្ទុយទៅវិញមានតែសប្បាយចិត្តទៅវិញទេព្រោះវាជាមោទនភាពខ្លាំងណាស់ក្នុងនាមជាខ្មែរពេលបានឃើញកីឡាករខ្មែរទៅលេងនៅក្រៅប្រទេសបែបនេះ ។ ការចុះកិច្ចសន្យាទទួលយកកីឡាករ២រូបនេះមកលេងឱ្យក្លិបវិសាខាមិនទាន់គ្រប់គ្រាន់ទេ ព្រោះក្លិបលោកចង់បានកីឡាករល្អៗច្រើននាក់ទៀតមកជួយដើម្បីប្រកួតប្រជែងជាមួយក្លិបខ្លាំងៗនៅក្នុងលីគកំពូលកម្ពុជា៕
ចែករំលែកព័តមាននេះ