ខេត្តកំពង់ធំ ៖ តាមសេចក្តីរាយការណ៍បឋមបានឲ្យដឹងថា មានករណីស្រវឹងស្រាទាស់សម្តីជាមួយប្រពន្ធបានពន្លះមួយពូថៅរយះក្បាលរត់គេចខ្លួនបាត់ ។ ករណីអំពើហិង្សានេះបានកើតឡើងកាលពីវេលាម៉ោង២១និង១០នាទីយប់ ថ្ងៃទី៣១ ខែឧសភា ឆ្នាំ២០១៨ ស្ថិតនៅក្នុងភូមិចេក ឃុំកំពង់ចិនជើង ស្រុកស្ទោង ខេត្តកំពង់ធំ ។
សេចក្តីរាយការណ៍បន្តថា សមត្ថកិច្ចបានឲ្យដឹងថា ជនរងគ្រោះឈ្មោះ ឆន ស្រី ភេទស្រី អាយុ៤៣ឆ្នាំ មុខរបរកសិករនៅភូមិកើតហេតុខាងលើ ដែលបង្កឡើងដោយបុរសជាប្តីឈ្មោះ រួន រ អាយុ៤០ឆ្នាំ មុខរបរកសិករ ។
បើយោងតាមការបំភ្លឺរបស់ជនរងគ្រោះបានបញ្ជាក់ថា នៅយប់ថ្ងៃកើតហេតុប្តីខ្លួនបានមកពីផឹកស៊ីវិញមានសភាពស្រវឹងជោគជាំលុះមកដល់ផ្ទះវិញក៏បានរករឿងឈ្លោះប្រកែកគ្នាជាមួយប្រពន្ធ បណ្តាលឲ្យកើតជាអំពើហិង្សា ហើយក៏បានស្ទុះទៅយកពូថៅ រួចកាប់មកលើខ្លួនមួយកន្លែងចំក្បាល ផ្នែកខាងក្រោយ បណ្តាលឲ្យមានរបួសរយះប្រវែង៣សង់ទីម៉ែត្រ ដោយមានឈាមហូរខ្លាំងពេកសាច់ញាតិក៏នាំទៅសម្រាកព្យាបាល នៅមន្ទីពេទ្យបង្អែកស្រុកស្ទោង បន្ទាប់ពីបានកាប់ប្រពន្ធរបួសហើយប្តីគាត់ក៏បានរត់គេចខ្លួនបាត់ ។
ចំពោះករណីនេះសមត្ថកិច្ចក៏កំពុងតែតាមស្វែងរកចាប់ខ្លួនជនបង្កជាប្តី ដើម្បីមកទទួលទោសតាមច្បាប់ផងដែរ ៕
ចែករំលែកព័តមាននេះ