ខេត្តកណ្ដាល ៖ បុរសម្នាក់បានស្លាប់ដោយសារតែទៅមើលស្រែហើយដើរជាន់ខ្សែលួសឆក់កណ្ដុរដែលអ្នក ធ្វើស្រែជាប់គ្នារាយឆក់កណ្ដុរ ហេតុការណ៍នេះកើតឡើងកាលពីម៉ោង៣ជិតភ្លឺឈានចូលថ្ងៃទី៣១ ឧសភា នៅចំណុចដីស្រែប្រាំងក្រោយភូមិឈើទាលភ្លោះ ឃុំស្វាយអំពារ ស្រុកមុខកំពូល ។
មន្ត្រីនគរបាលស្រុកបានឱ្យដឹងថា ជនរងគ្រោះឈ្មោះ វ៉ាយ ទឹម ភេទប្រុស អាយុ៥៦ឆ្នាំ រស់នៅភូមិឈើទាលភ្លោះ ឃុំស្វាយអំពា ស្រុកមុខកំពូល មុខរបរកសិករ ចំណែកអ្នករាយខ្សែលួសឆក់កណ្ដុរក្នុងស្រែរបស់ខ្លួន ឈ្មោះស៊ឹម ម៉ាប់ ភេទប្រុស អាយុ៤៧ឆ្នាំ នៅភូមិ-ឃុំជាមួយគក្នា មុខរបរកសិករ។ ហើយវត្ថុតាងមាន អាគុយម៉ាក BB N70L មួយ អាំងម៉ូទ័រ១គ្រឿង ខ្សែលួសពណ៌សប្រវែង១២០ម៉ែត្រ និងជន្ទុលឬស្សីខ្លីៗមួយចំនួន។
មន្ត្រីនគរបាលឱ្យដឹងបន្តថា មុនកើតហេតុ នៅម៉ោង៧យប់ ថ្ងៃទី៣០ ឧសភា ម្ចាស់ស្រែបានយកអាគុយ៧០អាំពែ និងម៉ូទ័រទៅរាយឆក់កណ្ដុរនៅកន្លែងកើតហេតុដូចសពដង ដោយមានដាក់ឈើខ្វែង និងស្បោងកៅស៊ូជាសំគាល់ឱ្យគេដឹង លុះម៉ោង១០យប់មេឃភ្លៀងក៏ឈប់ឆក់មកផ្ទះវិញរហូតដល់ម៉ោង២ទៀបភ្លឺថ្ងៃទី៣១ ក៏យកឧបករណ៍ទៅរាយឆក់កណ្ដុរបន្តទៀត ។ ក្រោយពីរាយរួចបានប្រហែល១ម៉ោង ទើបដើរទៅរើសសត្វកណ្ដុរ ស្រាប់តែឃើញជនរងគ្រោះដើរមកមើលសន្ទូងរបស់ខ្លួនដែលនៅជាប់ព្រំដីគ្នាខាងជើង ។ ពេលនោះអ្នករាយខ្សែលួសឃើញជនរងគ្រោះដើរចូលមកក៏ស្រែកប្រាប់ថា «ខ្ញុំមិនទាន់ដកអាគុយទេ» តែជនរងគ្រោះមិនលឺនៅតែដើរចូលទៀតជិតដល់ ម្ចាស់ភ័យក៏រត់ទៅដកដង្គៀបចេញពីក្បាលអាគុយ រួចងាកទៅមើលជនរងគ្រោះឆក់ដួលបាត់ទៅហើយ។
លោកបន្តទៀតថា ក្រោយមកម្ចាស់ស្រែក៏មកជួយធ្វើចលនាឱ្យជនរងគ្រោះ តែជនរងគ្រោះស្លាប់បាត់ហើយ លុះម៉ោង៦ព្រឹកកូនជនរងគ្រោះ និងបងប្អូនក្នុងភូមិនាំគ្នាយកសពជនរងគ្រោះមកតម្កល់ទុកនៅផ្ទះ ហើយរាយការណ៍មកសមត្ថកិច្ចប៉ុស្តិ៍ស្វាយអំពារតែម្តង។
ក្រោយពេលទទួលដំណឹងកម្លាំងជំនាញបានចុះដល់កន្លែងកើតហេតុ ដើម្បីធ្វើការពិនិត្យសព រួចសន្និដ្ឋានថាជនរងគ្រោះពិតជាស្លាប់ដោយសារឆក់ចរន្តអគ្គិសនីមែន ក្រោយមកសពត្រូវប្រគល់ជូនក្រុមគ្រួសារធើ្វបុណ្យតាមប្រពៃណី ចំណែកអ្នករាយខែលួសឆក់កណ្តុរត្រូវនគរបាលឃាត់ខ្លួន ដើម្បីកសាងសំណុំរឿងចាត់ការតាមនីតិវិធី៕
ចែករំលែកព័តមាននេះ