រាជធានីភ្នំពេញ ៖ បើនិយាយពីកម្រិតចំណូលរវាងតារាសម្តែងគឺហាក់ចាញ់តារាចម្រៀង។ តារាចម្រៀងនៅពេលបច្ចុប្បន្ននេះលេចធ្លោពេញនិយមណាស់សម្រាប់មហាជន ពិសេសយុវវ័យ ។ តារាសម្តែងបើគិតពីសមត្ថភាពគឺត្រូវមានទេពកោសល្យដែលមានភាពប៉ិនប្រសព្វ ហើយបត់បែនបានគ្រប់កាលៈទេសៈទៅតាមអ្នកដឹកនាំរឿង ឬផលិតករចង់បាន មិនថាតែតួអង្គអ្វីឡើយត្រូវសម្រេចឱ្យបាន…
រាជធានីភ្នំពេញ ៖ បើនិយាយពីកម្រិតចំណូលរវាងតារាសម្តែងគឺហាក់ចាញ់តារាចម្រៀង។ តារាចម្រៀងនៅពេលបច្ចុប្បន្ននេះលេចធ្លោពេញនិយមណាស់សម្រាប់មហាជន ពិសេសយុវវ័យ ។
តារាសម្តែងបើគិតពីសមត្ថភាពគឺត្រូវមានទេពកោសល្យដែលមានភាពប៉ិនប្រសព្វ ហើយបត់បែនបានគ្រប់កាលៈទេសៈទៅតាមអ្នកដឹកនាំរឿង ឬផលិតករចង់បាន មិនថាតែតួអង្គអ្វីឡើយត្រូវសម្រេចឱ្យបាន ។ បែបនេះហើយធ្វើឱ្យតារាភាពយន្ត ឬតារាសម្តែងយកចិត្តទុកដាក់ហាត់រៀន ឬឈ្វេងយល់ឱ្យបានល្អជាទីបំផុត។ ទម្រាំបានលេចធ និងចាប់អារម្មណ៍ពីទស្សនិកជន គឺត្រូវចំណាយពេលច្រើនគួរសម ។ ចំណែកការចូលមកកាន់អាជីពជាតារាចម្រៀងវិញត្រូវបានគេកត់សម្គាល់ឃើញថា ប្រើពេលមិនច្រើន ហើយហុចលទ្ធផលលេចធ្លោ និងប្រែប្រួលមុខមាត់លឿនជាងតារាសម្តែង ។ អ៊ីចឹងហើយឱ្យតែមានវេទិកាប្រឡងចម្រៀងថ្នាក់ពិភពលោក ឬកម្មវិធីធំដុំណាមួយ គឺថាមានយុវជនសម្រុកទិញពាក្យដាក់ប្រកួតប្រជែងគ្នាយ៉ាងកកកុញក្នុងន័យស្វែងរកពន្លឺតារាឱ្យបានស្របពេលតម្លៃទីផ្សារអ្នកចម្រៀង គឺកើនតម្លៃខ្លួនច្រើនជាងមុន ។
នាយចឺមដែលវិវឌ្ឍខ្លួនជាតារាចម្រៀង ហើយកំពុងតែពេញនិយមសម្រាប់យុវវ័យនោះបានឱ្យដឹងកាលពីពេល ថ្មីៗកន្លងមកថា«ខ្ញុំធ្លាប់ឆ្លងកាត់ការសម្តែងច្រើនដែរ ហើយយល់ថា តារាសម្តែងគឺតស៊ូណាស់ទៅថតតាមស្រុកភូមិ តាមដងអូរព្រៃភ្នំ ។ ពេលខ្លះចងអង្រឹងសម្រាកតាមដើមឈើក៏មាន ជួបនឹងភ្នែកអស់ហើយទម្រាំបានថតចប់ មួយរឿងៗ។ បើច្រៀងវិញមិនបាច់គិតច្រើនតែងតែខ្លួនដល់ម៉ោងឡើងច្រៀង៣ទៅ៤បទចប់បើកលុយទៅផ្ទះ ។ បើគេជាអ្នកចម្រៀង ល្បីៗវិញដូចបងប្អូនជ្រាបមកហើយថាបានប្រាក់កម្រៃថ្លៃប៉ុនណាឱ្យតែច្រៀងតាមក្រុមហ៊ុនតាមខេត្តគឺមិនធម្មតាទេ ។ ទោះបីជាយ៉ាងណាខ្ញុំសូមសរសើរទឹកចិត្តដល់ បងៗប្អូនតារាសម្តែងនៅតែស៊ូទ្រាំលំបាក ព្រោះតែស្រឡាស់សិល្បៈទាំងអស់គ្នាដើម្បីទស្សនិកជន »។
តារាចម្រៀងប៉ាច គីមមួយ ជាអតីតបេក្ខជនប្រឡងចម្រៀងឌឹវយរដូវកាលទី១ធ្លាប់សម្តែងរឿងភាគឱ្យទូរទស្សន៍ហង្សមាសរឿង«បិសាចគួរឱ្យស្រឡាញ់» ហើយនាងយល់ថាពិបាកបើឱ្យនាងរើស គឺជ្រើសរើសការច្រៀងច្រើនជាងសម្តែង ។
គីមមួយនិយាយថា «សម្តែងប្រើអារម្មណ៍ផ្លាស់ប្តូរច្រើនទាំងកាយវិការទាំងទឹកមុខ កែវភ្នែក និងត្រូវចាំប៉ារ៉ូលនិយាយ ហើយត្រូវធ្វើឱ្យសមតាមធម្មជាតិ ។ ដូចនេះការសម្តែងត្រូវតម្រូវឱ្យមានការព្យាយាម បើច្រៀងវិញតែមួយភ្លែតតុបតែងកាយឱ្យល្អទៅឱ្យទាន់ម៉ោងចប់ការងារមកសម្រាកវិញលឿនជាងសម្តែង »។
អ្នកនាងខាត់ សុឃីម ដែលមានស្នាដៃច្រើនគួរសមលើការសម្តែងភាពយន្តដែរនោះនិយាយថា«តាមអារម្មណ៍យល់ឃើញតារាគួរតែចេះឱ្យបានច្រើនទៅនឹងអ្វីដែលជាសិល្បៈព្រោះនេះជាមុខមាត់សិល្បៈដូចគ្នា ។ បើទោះជាបច្ចុប្បន្នវិស័យចម្រៀងមានទីផ្សារក៏ពិតមែន តែបើអ្នកចម្រៀងវិលងាកមកសម្តែងក៏មើលទៅម្យ៉ាងហើយអាចឱ្យអ្នកគាំទ្រវាយតម្លៃការសម្តែងធ្វើយ៉ាងណាឱ្យល្អតទៅទៀត »។
អ្នកនាងឈួន សុវណ្ណឆៃ ទើបតែបញ្ចប់ការសម្តែងរឿង«កូនពស់កេងកង»ឱ្យទូរទស្សន៍ហង្សមាសដឹកនាំដោយលោកហ្វៃ សំអាង និយាយថាហែលឆ្លងការសម្តែងភាពយន្តបានប៉ុន្មានរឿង គឺមើលទៅមិនធម្មតាទេ កំណត់តាំងពីពេលវេលា ការទៅដល់ទីតាំង សូម្បីតែការឡើងគីឡូពេកក៏មិនត្រូវបណ្តោយ ។ ម្ល៉ោះហើយនាងនៅតែសរសើរអ្នកអាជីពសម្តែង គឺអាចទ្រាំបានទាំងនេះកើតចេញពីចិត្ត ពិតៗដែលស្រឡាញ់ហើយមិនចុះចាញ់ ព្រោះមានតារាសម្តែងជើងចាស់មួយចំនួននៅតែបើកចិត្តបន្តអាជីពសម្តែងមកទល់ពេលនេះគឺសូមសរសើរដល់ពួកគាត់ ។
លោកទេព រិនដារ៉ូ តារាភាពយន្តចាត់ទុកថាការសម្តែងគឺទេពកោសល្យមួយល្អ ប្រសិនបើយល់ និងដឹងពីតិចនិកសម្តែងបាននោះនឹងជំរុញឱ្យតារារូបនោះពេញនិយម ។ លើសពីនេះអាស្រ័យលើការព្យាយាម ការហាត់ ចេះច្បិចពីអ្នកនៅជុំវិញខ្លួន និងការប្រើស្ទីលសម្តែងរបស់តារាបរទេសក៏ជួយខ្លាំងដែរ ។ ចំណុចទាំងនេះអាចរក្សាលំនឹងទីផ្សារឱ្យអ្នកសម្តែងនៅតែពេញនិយម តែអ្នកចម្រៀងគេស្រួលយកលុយជាង ៕
ចែករំលែកព័តមាននេះ