រាជធានីភ្នំពេញ ៖ កូនភ្លោះស្រីបីនាក់របស់សម្តេចអគ្គមហាសេនាបតីតេជោហ៊ុន សែន និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បានប្រសូតកាលពីវេលាមោ៉ង៣និង១៥នាទីរសៀលថ្ងៃទី១៧ កុម្ភៈ នៅមន្ទីរពេទ្យកាល់មែ៉តហើយក្រោមការយកចិត្តទុកដាក់ពីគ្រូពេទ្យទាំងម្តាយ និងកូនមានសុខភាពល្អប្រសើរ ។
ស្រ្តីឈ្មោះ វ៉ាត សួន អាយុ២៦ឆ្នាំ ជាកសិកររស់នៅភូមិជ័យឧត្តម ឃុំជ័យឧត្តម ស្រុកលំផាត់ ខេត្តរតនគិរីនិយាយថា គាត់បានប្រសូតកូនភ្លោះស្រីបីនាក់ កាលពីវេលាម៉ោង៣និង១៥នាទីរសៀលថ្ងៃទី១៧ ខែកុម្ភៈ ឆ្នាំ២០១៣ ក្រោមការយកចិត្តទុកដាក់ពីក្រុមគ្រូពេទ្យសម្ភពនៃមន្ទីរពេទ្យកាល់ម៉ែតដែលកូនទី១-ឈ្មោះ ភួង ប៊ុនមី មានទម្ងន់២គីឡូក្រាមកន្លះ, កូនទី២-ឈ្មោះភួង ផាត់សី មានទម្ងន់២គីឡូក្រាម៣ខាំ និងកូនទី៣-ឈ្មោះភួង ម៉ារ៉ាស៊ី មានទម្ងន់២គីឡូក្រាម៣ខាំ។ កូនដែលប្រសូតបានបីនាក់នេះគឺជាកូនកើតលើកទី៣ ដែលលើកទី១ បានកូនស្រីម្នាក់ក្នុងអំឡុងឆ្នាំ២០០០ តែកូននោះបានស្លាប់និងលើកទី២បានកូនស្រីបច្ចុប្បន្នមានអាយុជាង២ឆ្នាំ លុះកើតលើកទី៣ស្រាប់តែកូនភ្លោះស្រីបីនាក់តែម្តង ។
ស្រ្តីឈ្មោះវ៉ាត សួន បានរំលឹកថា មុនពេលមានកំណើតកូនភ្លោះបីនេះគាត់មិនបានយល់សប្តិឃើញអ្វីនោះទេ ហើយតែងតែឧស្សាហ៍ទៅមន្ត្រីពេទ្យបង្អែកខេត្តរតនគិរីឲ្យគ្រូពេទ្យពិនិត្យពោះ និងតាមដានជាប្រចាំ ។ លុះជិតដល់ថ្ងៃឆ្លងទន្លេម្តាយនាងបាននាំទៅមន្ទីរពេទ្យត្រូវគ្រូពេទ្យប្រាប់ថា មានកូនភ្លោះបីហើយពេទ្យគ្មានលទ្ធភាពបង្កើតឡើយ សុំឲ្យទៅសម្រាលនៅមន្ទីរពេទ្យឯរាជធានីភ្នំពេញ ដើម្បីសុវត្ថិភាព ។
ស្រ្តីឈ្មោះ ឃួន ផល្លី អាយុ ៥០ឆ្នាំ ត្រូវជាម្តាយរបស់ស្រ្តីកូនភ្លោះ៣និយាយថា ក្រោយពីគ្រូពេទ្យនៅមន្ទីរពេទ្យបង្អែកខេត្តរតនគិរីប្រាប់រួចមក គាត់បានខ្ចីបុលលុយអ្នកជិតខាងហើយជួលរថយន្តឈ្មួលធ្វើដំណើរមកកាន់មន្ទីរពេទ្យកាល់ម៉ែតហើយកូនស្រីគាត់ក៏បានឆ្លងទន្លេប្រកបដោយសុវត្ថិភាព ។ ប៉ុន្តែអ្វីដែលជាការព្រួយបារម្ភនោះ គឺគ្រួសារគាត់មានជីវភាពខ្វះខាតស្រាប់ផងគឺរកមួយថ្ងៃសម្រាប់តែមួយថ្ងៃស្ទើរមិនគ្រប់ផង តើបានប្រាក់ឯណាទិញទឹកដោះគោឲ្យចៅបៅម្យ៉ាងទៀតប្រាក់ធ្វើដំណើរមកភ្នំពេញក៏ខ្ចីបុលគេដែរ ។
អ្នកស្រីបានលើកដៃប្រណមតាមរយៈសារព័ត៌មានកោះសន្តិភាព សុំសេចក្តីប្រោសប្រណីពីសម្តេចអគ្គមហាសេនាបតីតេជោ ហ៊ុន សែន និងលោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជាថា ពិតជាមិនមើលរំលងនោះទេ ដូចប្រសាសន៍សម្តេចតេជោតែងតែលើកឡើងថា “កូនភ្លោះបីគឺជាកូនរបស់សម្តេច” ៕
ចែករំលែកព័តមាននេះ